ހުކުރު މިސްކިތު އިމާރާތުގެ ހާލަތު ދެެނެގަތުމަށް ސަރވޭއެއް
ހުކުރު މިސްކިތަކީ ދިވެހީންގެ އިސްލާމީ ވަޙުދަތާއި، ދިވެހީންގެ ހުނަރުވެރިކަމާއި ފަންނުވެރިކަން ދައްކުވައިދޭ އެންމެ ދުވަސްވީ އެއް ބިނާ
ހުކުރު މިސްކިތް
އިންޑިއާގެ އެހީތެރިކަމާއެކު މާލޭގެ ހުކުރު މިސްކިތުގެ އާބާތުރަ ފިލުވުމަށް ފަށާފައިވާ މަސައްކަތުގެ ތެރެއިން މިސްކިތުގެ އިމާރާތުގެ އެތެރޭގެ ބައިތަކުގެ ދިރާސާތައް ކުރިއަށްގެންގޮސްފިއެވެ.
މާލޭ ހުކުރު މިސްކިތަކީ ދިވެހީންގެ އިސްލާމީ ވަޙުދަތާއި، ދިވެހީންގެ ހުނަރުވެރިކަމާއި ފަންނުވެރިކަން ދައްކުވައިދޭ އެންމެ ދުވަސްވީ އެއް ބިނާއެވެ.
މިސްކިތުގެ ގޯތިތެރޭގައި ހުރި، ހިރިގަލު މަހާނަތައް ދިގުމުއްދަތަށް ފެންނާނެހެން ބެހެއްޓުމަށް ބޭނުންވާ ފަރުވާ ދިނުމުގެ މަސައްކަތްތައް މިހާރު ނިމިފައިވާ ކަމަށް ނެޝަަނަލް ސެންޓަރ ފޮރ ކަލްޗަރަލް ހެރިޓޭޖުން މަޢުލޫމާތުދެއެވެ.
މިސްކިތުގެ އިމާރާތުގެ ބިންގަލާ، އަދި އިމާރާތުގެ އެތެރޭގެ ސްޓްރަކްޗަރގެ ހާލަތު ދެނެގަތުމުގެ މަސައްކަތަށް އިންޑިއާގެ ޚާއްސަ ދިރާސާ ޓީމެއް ރާއްޖެ އައިސް އެ މަސައްކަތް މިހާރު ފަށާފައިވާ ކަމަށްވެސް ސެންޓަރ ފޮރ ކަލްޗަރަލް ހެރިޓޭޖުން ބުނެފައިވެއެވެ.
އެގޮތުން ހުކުރު މިސްކިތުގެ ލާގޭގެ ސްޓްރަކްޗަރަލް އެނެލިސިސް ތައްޔާރުކުރުމަށް އިންޑިޔާގެ "ސެންޓްރަލް ބިލްޑިންގ ރިސަރޗް އިންސްޓިޓިއުޓް"ގެ 3 ސައިންޓިސްޓުންގެ ޓީމެއް ރާއްޖެއަށް ޒިޔާރަތްކޮށް މިސްކިތުގެ ސަރވޭއަށް ބޭނުންވާ މަޢުލޫމާތު ވަނީ އެއްކޮށްފައެވެ. ދިރާސާގެ މަސައްކަތަށްފަހު، އިމާރާތަށް ބޭނުންވާ ފަރުވާ ދޭންވެސްވަނީ ފަށާފައެވެ.
