އޭޝިއަން ކަރާޓޭ ޗެމްޕިއަންޝިޕްގެ އެއްވަނަ ރާއްޖެއަށް

އިންޑިއާގެ ޓަމިލްނާޑޫގެ ތިރުނަވެލީގައި ހުންނަ ވީ.އޯ.ސީ ސްޓޭޑިއަމްގައި ކުރިއަށް ދިޔަ އޭޝިއަން ކަރާޓޭ މުބާރާތުގެ އެއްވަނަ ދިވެހިރާއްޖެއިން ހޯދައިފިއެވެ.

ރާއްޖެއިން މުބާރާތުގެ އެއްވަނަ ހޯދާފައިވަނީ އިންޑިއާގެ 10 ސްޓޭޓެއްގެ މައްޗަށް ކުރި ހޯދައިގެންނެވެ. މިއީ ބައިނަލްއަޤުވާމީ ކަރާޓޭ މުބާރާތެއްގައި ރާއްޖެއިން ބައިވެރިވި ފުރަތަމަ ފަހަރެވެ. މުބާރާތުގައި ވާދަ ކުރި ރާއްޖެ ޓީމުގައި ހިމެނެނީ 14 އެތުލީޓުންނެވެ. އެއީ ޣިޔާޘުއްދީން ސްކޫލުގެ ނުވަ ދަރިވަރުންނާއި، ފިންލޭންޑް ސްކޫލުގެ ހަތަރު ދަރިވަރަކާއި މަޖީދިއްޔާ ސްކޫލުގެ އެއް ދަރިވަރެކެވެ.

ދިވެހި އެތުލީޓުން ވަނީ އެކި ކެޓަގަރީތަކުގައި ވާދަކޮށް ޖުމުލަ 17 ރަން މެޑައްޔާއި، ފަސް ސިލްވާ މެޑަލްގެ އިތުރުން 16 ބްރޯންޒް މެޑަލް ހޯދާފައެވެ. ރާއްޖެއިން މުބާރާތުގައި ވާދަކޮށް، މެޑަލް ހޯދި އެތުލީޓުންނަކީ އެލްމާ މުޙައްމަދު ޢަބްދުﷲ، އަލާނާ އައިޝާ ސާމިހް، މަލިސާ މަރްޔަމް ސާމިހް، މުޙައްމަދު މިޒާން އިމްދާދު، ޔޫސުފް އިލާން އާޒިމް، އީޝަލް އަލީ ފައުޒީ، ޒޯހާ އަޒްކާ އަޙުމަދު، ރައުޝާނާ އަސްމާ، އިޔާން އަޙުމަދު ނަސްރު، މުޙައްމަދު މައާން އަޙުމަދު ޠައްލަތު، ޒޯހާ ޢަބްދުﷲ، ޔަނާލް އަޙުމަދު ހުޝާމް، އައިޝަތު އަރްޝީ ޝިޔާޒް ސައީދު އަދި މުޙައްމަދު ނަޒާން ނާޝިދުއެވެ.

މުބާރާތުގައި ވާދަކުރި ޓީމުތަކަކީ ރާއްޖޭގެ އިތުރުން އަންދްރާ ޕްރަދޭޝް، ކެރެލާ، ޓަމިންނާޑޫ، ކަރްނަޓަކާ، ޓެލަންގަނާ، ގުޖްރާތު، މަހާރަސްތްރާ، މަދްޔާ ޕްރަދޭޝް، ޖާގަންޑް ޓީމް، އަދި ޕުންޖާބްއެވެ.

މުބާރާތް ނިންމުމުގެ ރަސްމިއްޔާތު އާދިއްތަ ދުވަހުގެ ރޭ ވަނީ ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ ޓަމިންނާޑުގެ ޕާލަމަންޓު ސްޕީކާއެވެ. މި ރަސްމިއްޔާތުގައި ވަނީ ދިވެހި ޓީމަށް ޓްރޮފީ ހަވާލުކޮށްފައެވެ.

މި މުބާރާތް ކުރިއަށް ގެންގޮސްފައިވަނީ މި މަހުގެ 23 ން 24 ގެ ނިޔަލަށެވެ.

މިއީ ރާއްޖޭގައި ހުރިހާ ކުޅިވަރަކަށް ހަމަހަމަ ފުރުސަތު ތަނަވަސްކޮށްދިނުމަށް އަދުގެ ސަރުކާރުން ކުރާ މަސައްކަތަށް އިތުރުވެގެންދާ ބޮޅެކެވެ.