ރަންވަނަ ހޯދި ކަރާޓޭ ޓީމު ރާއްޖެ އަތުވެއްޖެ

އިންޑިއާގައި ކުރިއަށްދިޔަ އޭޝިއަން ކަރާޓޭ މުބާރާތުގެ އެއްވަނަ ހާސިލްކުރި ރާއްޖޭގެ ކަރާޓޭ ޓީމު އެނބުރި ރާއްޖެއަށް އަތުވެއްޖެއެވެ.

ޓީމު ރާއްޖެއައީ މިރޭ 7:15ހާއިރުއެވެ. މި މުބާރާތުގައި ރާއްޖެއިން އެއްވަނަ ހޯދިއިރު، 17 ރަން މެޑަލް، 7 ރިހި މެޑަލް އަދި 18 ލޯ މެޑަލް ހޯދާފައިވެއެވެ. އެނބުރި ގައުމަށް އައުމަށްފަހު، މުބާރާތުގައި ބައިވެރިވި ރާއްޖޭގެ އެތުލީޓުން ބުނީ މިއީ އެ އެތުލީޓުންނަށް ލިބުނު ވަރަށް ބޮޑު ކާމިޔާބީއެއް ކަމަށެވެ. އަދި ރާއްޖެއިން ބޭރުގައި ބާއްވާ މިފަދަ ގިނަ މުބާރާތްތަކަކުން ފުރުސަތު ލިބުމުގެ މުހިންމުކަން ފާހަގަކުރިއެވެ.

ރާއްޖެއިން މުބާރާތުގެ އެއްވަނަ ހޯދާފައިވަނީ އިންޑިއާގެ 10 ސްޓޭޓެއްގެ މައްޗަށް ކުރިހޯދައިގެންނެވެ. މިއީ ބައިނަލްއަގުވާމީ ކަރާޓޭ މުބާރާތެއްގައި ރާއްޖެއިން ބައިވެރިވި ފުރަތަމަ ފަހަރެވެ. މުބާރާތުގައި ވާދަކުރި ރާއްޖެ ޓީމުގައި ހިމެނެނީ 14 އެތުލީޓުންނެވެ. އެއީ ޣިޔާސުއްދީން ސްކޫލުގެ 9 ދަރިވަރުންނާއި، ފިންލޭންޑް ސްކޫލުގެ 4 ދަރިވަރުންނާއި މަޖީދިއްޔާ ސްކޫލުގެ ދަރިވަރެކެވެ.

ރާއްޖެއިން މުބާރާތުގައި ވާދަކޮށް، މެޑަލް ހޯދި އެތުލީޓުންނަކީ އެލްމާ މުހައްމަދު އަބްދުﷲ، އަލާނާ އައިޝާ ސާމިހް، މަލިސާ މަރްޔަމް ސާމިހް، މުހައްމަދު މިޒާން އިމްދާދު، ޔޫސުފް އިލާން އާޒިމް، އީޝަލް އަލީ ފައުޒީ، ޒޯހާ އަޒްކާ އަހުމަދު، ރައުޝާނާ އަސްމާ، އިޔާން އަހުމަދު ނަސްރު، މުހައްމަދު މައާން އަހުމަދު ތައްލަތު، ޒޯހާ އަބްދުﷲ، ޔަނާލް އަހުމަދު ހުޝާމް، އައިޝަތު އަރްޝީ ޝިޔާޒް ސައީދު އަދި މުހައްމަދު ނަޒާން ނާޝިދުއެވެ.

ރާއްޖޭގެ އިތުރުން މުބާރާތުގައި ވާދަކުރީ; އަންދްރާ ޕްރަދޭޝް، ކެރެލާ، ޓަމިންނާޑޫ، ކަރްނަޓަކާ، ޓެލަންގަނާ، ގުޖްރާތު، މަހާރަޝްތްރާ، މަދްޔާ ޕްރަދޭޝް، ޖާގަންޑް ޓީމް، އަދި ޕަންޖާބެވެ.

މިއީ ރާއްޖޭގައި ހުރިހާ ކުޅިވަރަކަށް ހަމަހަމަ ފުރުސަތު ތަނަވަސްކޮށްދިނުމަށް އަދުގެ ސަރުކާރުން ކުރާ މަސައްކަތަށް އިތުރުވެގެންދާ ބޮޅެކެވެ.