ފަރިތަކުރުންތަކަށް ޤައުމީ ކެރަމް ޓީމު ހިންނަވަރަށް
މިއީ މިއަހަރުގެ އޮކްޓޫބަރު މެލޭޝިޔާގައި އޮންނަ ކެރަމް ވޯލްޑް ޗެމްޕިއަންޝިޕަށް ތައްޔާރުވުމުގެ ގޮތުން ޤައުމީ ކެރަމް ޓީމުން ކުރިއަށް ގެންދާ ކޭމްޕެއް
ކޭމްޕުގައި ބައިވެރިވި ޤައުމީ ޓީމު
ފަރިތަކުރުންތަކެއް ފުރިހަމަ ކުރުމަށް ޤައުމީ ކެރަމް ޓީމު ޅ.ހިންނަވަރަށް ގޮސްފިއެވެ.
މިއީ މިއަހަރުގެ އޮކްޓޫބަރުމަހު މެލޭޝިޔާގައި އޮންނަ ކެރަމް ވޯލްޑް ޗެމްޕިއަންޝިޕަށް ތައްޔާރުވުމުގެ ގޮތުން ޤައުމީ ކެރަމް ޓީމުން ކުރިއަށް ގެންދާ ކޭމްޕެކެވެ. ޤައުމީ ޓީމު ހިންނަވަރަށް ގޮސްފައިވަނީ މިއަދު ހެނދުނުއެވެ. އެއް ހަފްތާގެ މުއްދަތައް ކުރިއަަށްދާ މި ކޭމްޕަށްފަހު ޓީމު މާލެ އަންނާނީ މި މަހުގެ 30 ގައެވެ.
މިއީ ވޯލްޑް ޗެމްޕިއަންޝިޕަށް ތަޔްރާވުމުގެ ގޮތުން ކުރިއަށް ގެންދާ ފުރަތަމަ ކޭމްޕެވެ. ކޭމްޕުގެ މަޤްސަދަކީ ޓީމް ވޯކު ވަރުގަދަ ކުރުމާއި، ކުޅުންތެރިންގެ ހުނަރު އިތުރުކުރުން ކަމަށް ކެރަމް އެސޯސިއޭޝަނުން މައުލޫމާތު ދެއެވެ. ކޭމްޕުގައި ޖުމުލަ 12 ކުޅުންތެރިން ބައިވެރިވެއެވެ. އެއީ އަންހެން ހަ ކުޅުންތެރިންނާއި ފިރިހެން ހަ ކުޅުންތެރިންނެވެ.
ކޭމްޕަށްފަހު އަންނަ އޯގަސްޓު މަހުގެ ތެރޭގައި ވޯލްޑް ޗެމްޕިއަންޝިޕްގައި ވާދަކުރާނެ ޤައުމީ ޓީމު ހޮވުމަށް ބާއްވާ ސިލެކްޝަން ކުރިއަށްދާނެއެވެ. އެ ސިލްކްޝަނަށްފަހު، ޤައުމީ ޓީމު އިންޑިއާގައި ކޭމްޕެއް ކުރާނެކަމަށް ވެސް ކެރަމް އެސޯސިއޭޝަނުން ވަނީ މައުލޫމާތު ދީފައެވެ. ދާދި ފަހުން ވަނީ ކެރަމް ޤައުމީ މުބާރާތް ވެސް ކާމިޔާބުކަމާއެކު ނިންމާލާފައެވެ.
