އޭކޭއައިއެލްއެފް ޔޫތު ޗެމްޕިއަންޝިޕްގެ ފުރަތަމަ މެޗުގައި ވިލުފުށި ބަލިކޮށް ތިމަރަފުށިން ފެށުން ރަނގަޅުކޮށްފިއެވެ.

ވިލުފުށީގައި ކުރިއަށްދާ މި މުބާރާތަކީ ރައިސިން ސްޓަރސް ފޯ ވިލުފުށި ރެކްރިއޭޝަން (އާރުއެސްވީއާރު)ގެ ފަރާތުން އިންތިޒާމުކޮށްގެން ތ.އަތޮޅަށް ހުޅުވާލައިގެން ކުރިއަށްދާ މުބާރާތެކެވެ. 23 އަހަރުން ދަށުގެ އުމުރުފުރާއަށް ޚާއްސަކުރެވިފައިވާ މި މުބާރާތުގައި މިއަހަރު ވަނީ ތިން ޓީމަކުން ބައިވެރިވެފައެވެ. އެއީ ވިލުފުށި، ތިމަރަފުށީގެ އިތުރުން ހިރިލަންދޫއެވެ.

ފުރަތަމަ މެޗުގައި ތިމަރަފުށިން ވިލުފުށީގެ މައްޗަށް ކުރި ހޯދީ 1-0 ންނެވެ. މެޗުގައި ތިމަރަފުށީގެ ހަމައެކަނި ލަނޑު ޖަހައިދިނީ އަލީ އިލްމާންއެވެ. މި ލަނޑު އޭނާ ޖެހީ މެޗުގެ ފަހު ވަގުތުގެ ތެރޭގައެވެ. މެޗުގެ މޮޅު ކުޅުންތެރިޔަކަށް ހޮވުނީ ވެސް އިލްމާންއެވެ.

މުބާރާތުގައި ހޮނިހިރު ދުވަހު ހަވީރު ތިމަރަފުށި ނުކުންނާނީ ހިރިލަންދޫއާ ދެކޮޅަށެވެ. ލީގު ބުރުގެ ފަހު މެޗުގައި ހޯމަ ދުވަހު ހިރިލަންދޫ ނުކުންނާނީ ވިލުފުއްޓާ ދެކޮޅަށެވެ. މުބާރާތް ކުރިއަަށްދާނީ ކޮންމެ ޓީމެއް ކޮންމެ ޓީމަކާ ވާދަކޮށް، އެންމެ ގިނަ ޕޮއިންޓު ލިބޭ ޓީމު ސީދާ ފައިނަލަށްދާ ގޮތަށެވެ. ދެ ވަނަ ޓީމާއި ތިން ވަނަ ޓީމު ޖެހޭނީ ސެމީ ފައިނަލް ކުޅެންށެވެ. ފައިނަލްގެ ފަހު ޖާގަ ލިބޭނީ ސެމީ މެޗު ކާމިޔާބުކުރާ ޓީމަކަށެވެ.

މި މުބާރާތަކީ އާރުއެސްވީއާރުގެ ފަރާތުން 2021 ވަނަ އަހަރު ބާއްވަން ފެށި މުބާރާތެވެ. އެއަހަރު މުބާރާތް ކާމިޔާބުކުރީ ހިިރިލަންދޫ އިންނެވެ.