ކުކުރޭލާ ހޯދުމަށް ސިޓީން ކުރި ބިޑް ރިޖެކްޓްކޮށްފި

ބްރިޓަންގެ ވާތްފަޅިން ފަހަތް ބަލަހައްޓަމުން އަންނަ މާކް ކުކުރޭލާ ހޯދުމަށް މެންޗެސްޓަރ ސިޓީން ކުރި ބިޑް ރިޖެކްޓްކޮށްފިކަމަށް ރިޕޯޓުތައް ބުނެފިއެވެ.

ސްކައި ސްޕޯޓްސްއިން ރިޕޯޓުކޮށްފައިވާގޮތުގައި މެންޗެސްޓަރ ސިޓީން ބްރިޓަންއަށް ހުށަހަޅާފައިވަނީ 30 މިލިއަން ޕައުންޑުގެ ބިޑެކެވެ. ނަމަވެސް ބްރިޓަންއިން މި ބިޑް ރިޖެކްޓްކޮށްފައިވާ ކަމަށާއި، އެންމެ ކުޑަކޮށްވެސް ބްރިޓަންއިން ކުކުރޭލާ ދޫކުރާނީ 50 މިލިއަން ޕައުންޑުގެ އަގަކަށް ކަމަށް ސްކައި ސްޕޯޓްސްއިން ރިޕޯޓުކޮށްފައިވެއެވެ.

ބްރިޓަންއާއެކު ކުކުރޭލާ ހަދާފައިވާ އެއްބަސްވުމުގައި ބާކީ ހަތަރު އަހަރު އެބައޮތެވެ. އަދި އޭނާ ދައްކަމުން އަންނަ މޮޅު ކުޅުމަށް ބަލައި، ބްރިޓަންއިން އޭނާ ވިއްކާލާކަށް ބޭނުމެއް ނުވެއެވެ.

އެންމެ ފަހުގެ ޕްރިމިއަރ ލީގު ޗެމްޕިއަން، ސިޓީއަށް މިހާރު ދިމާވެފައިވާ އެންމެ ބޮޑު މައްސަލައަކީ ވާތްފަޅިން ފަހަތަށް ކުޅޭނެ ރަނގަޅު ޑިފެންޑަރެއް ނެތުމެވެ. މި މައްސަލަ ހައްލުކުރުމަށްޓަކައި އުމުރުން 23 އަހަރުގެ މާކް ހޯދަން އެޓީމުން މަސައްކަތްކުރަމުން އަންނައިރު، މާކްއަކީ ވަރަށް ބޮޑަށް ކުރިއަށް ޖެހިގެން އެޓޭކްގައިވެސް ބައިވެރިވާ ކުޅުންތެރިއެކެވެ. މިއީ ގާޑިއޯލާގެ ސަމާލުކަން އޭނާއަށް ހުއްޓުނު އެންމެ ބޮޑު އެއް ސަބަބެވެ.

ކުކުރޭލާއާ ގުޅޭގޮތުން ގާޑިއޯލާ ބުނީ އޭނާ ހޯދުމުގެ މަޝްވަރާތައް ބްރިޓަންއާއެކު މިހާރު ކުރިއަށްދާކަމަށެވެ. އަދި ކުކުރޭލާ ނުލިބިއްޖެ ހާލަތެއްގައި ކަންސެލޯއާއި ވިލްސަންފަދަ ކުޅުންތެރިން ބޭނުންކޮށްގެން ޓީމު ހަމައަކަށް އެޅުވޭނެކަމަށެވެ.