ލަވެންޑަރ ބަލިކޮށް ގްރޭވްސް ސެމީއަށް

ނ. ހެނބަދޫ ޖޯޝް ޖަމްއިއްޔާއިން ކުރިއަށް ގެންދާ ޖޯޝް ޗެމްޕިއަންޝިޕް 2022ގައި ލަވެންޑަރ ޔުނައިޓެޑް ބަލިކޮށް ގްރޭވްސް އެފްސީން ސެމީ ފައިނަލުގެ ޖާގައެއް ކަށަވަރުކޮށްފިއެވެ.

މިއަދު ހަވީރު ލަވެންޑަރއާ ވާދަކުރި މެޗު ގްރޭވްސް ކާމިޔާބުކުރީ 3-0ންނެވެ. މެޗުގެ ކުރީ ކޮޅުގައި ގްރޭވްސްއަށް ލީޑު ނަގައިދިނީ އިބްރާހީމް ހުސައިން (އިބޫ)އެވެ. އޭގެ ކުޑަ އިރުކޮޅެއް ފަހުން ގްރޭވްސްގެ ދެވަނަ ލަނޑު ޖެހީ އެޓީމުގެ ކީޕަރު އަބްދުﷲ ރިމާޒްއެވެ. މިއީ ފައިން ފޮނުވާލި ބޯޅަ އިދިކޮޅު ގޯލަށް ވައްދާލައިގެން ރިމާޒް ކާމިޔާބުކުރި ލަނޑެކެވެ.

ފުރަތަމަ ހާފުގައި ލަވެންޑަރއަށް ލަނޑު ޖަހާނެ ރަނގަޅު ފުރުސަތުތަކެއް ލިބުނުނަމަވެސް ފުރުސަތުގެ ބޭނުން ނުހިފި ބޭކާރުވީއެވެ.

ގްރޭވްސްގެ ފަހު ލަނޑު ދެވަނަ ހާފުގައި ލިބުނު ޕެނަލްޓީއަކުން ކާމިޔާބުކޮށްދިނީ ޖުމައިލް އީސާއެވެ.

މި ނަތީޖާއާއެކު ގްރޭވްސްއަށް ފައިނަލުގެ ޖާގައެއް ޔަގީންވިއިރު ލަވެންޑަރއަށް ވަނީ މުބާރާތް ނިމިފައެވެ. އެއީ ހަތަރު މެޗު ކުޅުނުއިރު ލިބުނު ތިން ޕޮއިންޓާއެކު ތާވަލުގެ ހަތަރުވަނާގައި އޮތުމުންނެވެ. ލަވެންޑަރގެ އިތުރުން އެންމެ ފަހުގެ ތިން މުބާރާތް ކާމިޔާބުކުރި އެފްސީ ހާގަނޑުވެސް ވަނީ މުބާރާތުން ކަޓާފައެވެ.

މުބާރާތުގައި މާދަމާ ބައްދަލުކުރާނީ އެއްވަނާގައި އޮތް އެފްސީ ބްރަދަރސްއާއި ދެވަނާގައި އޮތް ޔަންގް ޝޫޓަރސްއެވެ. މި މެޗުން މޮޅުވެގެން ނުވަތަ އެއްވަރުކޮށްގެންވެސް ފައިނަލުގެ ސީދާ ޖާގަ ބްރަދަރސްއަށް ލިބޭނެއެވެ. ފައިނަލުގެ ސީދާ ޖާގަ ބޭނުންނަމަ ޔަންގް ޝޫޓަރސް ޖެހޭނީ މެޗުން މޮޅުވާށެވެ. ނޫންނަމަ އެޓީމަށް ޖެހޭނީ ފައިނަލުގެ ޖާގަ ހޯދުމަށް ސެމީގައި ގްރޭވްސްއާ ބައްދަލުކުރާށެވެ.