އާބިދަށް ކުރާ ދައުވާ: އިތުރު ދެ ހެއްކެއްގެ ހެކިބަސް ނަގައިފި
މީގެ ކުރިން ބޭއްވި އަޑުއެހުމެއްގައި 4 ހެއްކެއްގެ ހެކިބަސް ނަގާފައިވޭ
ބަންގްލަދޭޝްގެ ވެއިޓަރަކަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދު
ހުޅުމާލޭގެ ޚާންޖީ ރެސްޓޯރަންޓްގައި ބަންގްލަދޭޝްގެ ވެއިޓަރަކަށް ހަމަލާދީ މަރާލިކަމަށް ތުހުމަތުކުރާ ޕާކިސްތާނުގެ ކައްކާ، މުހައްމަދު އާބިދުގެ މައްޗަށް ކުރާ ދައުވާގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ހިމެނޭ ގިނަ ހެކިންނަކީ ޕާކިސްތާނު އަދި ބަންގްލަދޭޝް ރައްޔިތުންކަން ފާހަގަކޮށް އެ ދުވަހުގެ އަޑުއެހުމުގައި ދައުލަތުން ވަނީ ޝަރީއަތުގެ މަރުޙަލާ ފެށުމުގެ ކުރިން ހެކިބަސް ކުރީބައިގައި ނެގުމަށް އެދިފައެވެ. ވުމާއެކު، ގާޒީ ޝަފީއު ވަނީ މި މައްސަލައިގައި ހިމެނޭ 11 މީހުންގެ ހެކިބަސް ނަގަން ފެށުމަށް ނިންމަވާފައެވެ. އެއީ ފަހަށް ރައްކާ ކުރެވޭ ގޮތަށް ޖިނާއީ އިޖުރާއަތުގެ ދަށުން ނަގާ ހެކިބަސްތަކެކެވެ.
އެގޮތުގެ މަތިން މީގެ ކުރިން ބޭއްވި އަޑުއެހުމެއްގައި 4 ހެއްކެއްގެ ހެކިބަސް ނަގާފައިވެއެވެ. އެއީ ޚާންޖީ ރެސްޓޯރަންޓްގައި މަސައްކަތް ކުރާ ޕާކިސްތާނު ރައްޔިތުން ތަކެކެވެ.
ބުރާސްފަތި ދުވަހުވެސް 2 ހެއްކެއް ހާޒިރުކޮށް ހެކިބަސް ނަގާފައިވެއެވެ. އެއީ ޝަމީމް ގޮވައިގެން އެމްބިއުލާންސްގައި ހޮސްޕިޓަލަށް ދިޔައިރު އޭގައި ދަތުރުކުރި މުހައްމަދު ޔޫނުސްއާއި، ރެސްޓޯރަންޓްގައި މަަސައްކަތް ކުރަމުން އައި ޒައިން އަލީއެވެ. އެ ދެމީހުންނަކީވެސް ޚާންޖީ ރެސްޓޯރަންޓުގައި މަސައްކަތް ކުރަމުންދިޔަ ދެމީހުންނެވެ.
އެދެމީހުންވެސް ވަނީ ޝަމީމްގެ މެއަށް ލިބިފައިވާ ޒަހަމްތައް ނުފެންނަކަން ބަޔާންކޮށްފައެވެ.
މި މައްސަލައިގައި އަދި ދައުލަތުން ހުށައަޅާފައިވާ 11 ހެއްކެއްގެ ތެރެއިން 5 ހެއްކެއްގެ ހެކިބަސް ނެގުން އެބައޮތެވެ. އެ ހެކިންގެ ހެކިބަސް އަންނަ ހަފްތާގެ ތެރޭގައި ނެގުމަށް މަސައްކަތް ކުރައްވާނެކަމަށް މައްސަލަ ބައްލަވާ ގާޒީ ވިދާޅުވެއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
އާބިދު ވަނީ ދައުވާއަށް އިންކާރުކޮށްފައެވެ. އޭނާ ބުނާ ގޮތުގައި އޭނާއާ ކައްކާއާ ދެމެދު ހިނގި ހަމަނުޖެހުމުގައި އޭނާ އަތް ހޫރާލީ ނަފްސުގެ ދިފާއުގައެވެ. އޭރު އެއީ ވަޅިއެއްކަންވެސް ނޭނގޭ ކަމަަށާއި، ޤަސްތު މަރުގެ ދައުވާއަށް އިންކާރު ކުރާކަމަށް އޭނާ ބުނެއެވެ.
