ބޮޑު މޮޅެއް ހޯދައި ނިއު އެއްވަނަ އަށް

މިހާރު ކުރިއަށްދާ އެފްއޭއެމް ދެވަނަ ޑިވިޝަން ފުޓްބޯޅަ މުބާރާތުގައި ލޮރެންޒޯގެ ސްޕޯޓްސް ކުލަބުގެ މައްޗަށް ބޮޑު ނަތީޖާއަކުން ކުރި ހޯދައި ނިއު ރޭޑިއަންޓް ސްޕޯޓްސް ކުލަބް އެއްވަނަ އަށް ޖެހިލައިފިއެވެ.

ގިނަ ދުވަސްތަކެއް ސަސްޕެންޝަންގައި އޮތުމަށްފަހު އެނބުރި އައިސް މި އަހަރުގެ ދެވަނަ ޑިވިޝަންގައި ނިއު ކުޅުނު ފުރަތަމަ މެޗުގައި ޓީނޭޖް އަތުން މޮޅުވީ އެއް ނަންބަރު ޓާފްގައެވެ. ބުދަ ދުވަހުގެ ރޭގެ މެޗަކީ ސަސްޕެންޝަންގެ ފަހުން ގަލޮޅު ރަސްމީ ދަނޑުގައި ނިއު ކުޅުނު ފުރަތަމަ މެޗެވެ.

މެޗުގައި ނިއުގެ ގިނަ އަދަދެއްގެ ސަޕޯޓަރުން ވަނީ ދަނޑަށް ވަދެ، ބެރުގެ އަޑުން މުޅި ދަނޑު ގުގުމާލާފައެވެ. ގިނަ އަދަދެއްގެ ސަޕޯޓަރުންގެ ކުރިމަތީގައި ނިއު އިން ލޮރެންޒޯ ބަލިކުރީ 6-0 ންނެވެ. ފުރަތަމަ ހާފުގައި ނިއު އިން ވަނީ ފަސް ލަނޑު ޖަހާފައެވެ. ހަ ވަނަ ލަނޑު އެ ޓީމުން ޖެހީ ދެވަނަ ހާފުގައެވެ.

ފުރަތަމަ ހާފުގައި ނިއުގެ ލަނޑުތައް ޖެހީ ގާނާ މިޑްފީލްޑަރު ތޯރިގު، މުހައްމަދު ލިޔާހު، އަދި ކޯފޫއެވެ. މީގެ ތެރެއިން ތޯރިގު ވަނީ ތިން ލަނޑު ޖަހައި ހެޓްރިކް ހަދާފައެވެ. ނިއުގެ ހަވަނަ ލަނޑު ދެވަނަ ހާފުގެ 69 ވަނަ މިނެޓުގައި ޖެހީ އަލީ އަޒުމީއެވެ.

މުބާރާތުގައި ނިއުގެ މެޗެއް ދެން އޮންނާނީ 24 ވަނަ ދުވަހުއެވެ. އެ މެޗުގައި އެ ޓީމުން ނުކުންނީ ވިކްޓަރީ ސްޕޯޓްސް ކުލަބާ ދެކޮޅަށެވެ. ވިކްޓަރީ އަކީ ވެސް ސަސްޕެންޝަންގައި އޮތުމަށްފަހު، އެކަމުން ސަލާމަތްވެ ދެވަނަ ޑިވިޝަންގައި ކުޅޭ ޓީމެކެވެ. އެ ޓީމުގެ ފުރަތަމަ މެޗުގައި ބީޖީ ސްޕޯޓްސް ކްލަބް މޮޅުވިއިރު، ދެވަނަ މެޗުގައި ވަނީ އެލްޓީ އަތުން އެއްވަރުވެފައެވެ.