ރާއްޖޭގެ އެކި ސަރަހައްދުތަކުގައި ކަސްޓަމްސްގެ ޚިދުމަތްތައް ފުޅާކުރުމަށް މި ސަރުކާރުން ޚާއްސަ އިސްކަމެއް ދޭ ކަމަށް މޯލްޑިވްސް ކަސްޓަމްސް ސާރވިސް އިން ބުނެފިއެވެ.
"ރާއްޖެ ޓީވީ" ގެ ފަލަސުރުޙީގައި ވާހަކަދައްވަަމުން ކަސްޓަމްސްގެ ޑެޕިއުޓީ ޗީފް ސުޕްރިޓެންޑެންޓް އަހުމަދު ނިޔާޒު ވިދާޅުވީ ކުރިއާ އަޅާ ބަލާއިރު ރާއްޖޭގެ އެކި ސަރަހައްދުތަކުގައި ގާއިމްކޮށްފައިވާ ކަސްޓަމްސްގެ ހިދުމަތްތައް ކުރިއަރާފައިވާ ކަމަށެވެ. އެގޮތުން، ރާއްޖޭގެ 9 ރަށެއްގައި ރީޖަނަލް ކަސްޓަމްސް ގާއިމްކޮށްފައިވާކަން އޭނާ ފާހަގަ ކުރެއްވިއެވެ.
ނިޔާޒު ވިދާޅުވީ 2020 ވަނަ އަހަރު އިމްޕޯޓް އެކްސްޕޯޓް ގާނޫނަށް ގެނައި ބަދަލާ ގުޅިގެން މާލެ ނޫން ސަރަހައްދުތަކަށް އިމްޕޯޓް ކުރާ މުދަލުގެ ނިސްބަތް 80 އިންސައްތައަށްވުރެ އިތުރުވި ކަމަށެވެ. އެގޮތުން، ވެހިކަލާއި އެނަރޖީ ޑްރިންކްތައް ސަރަހައްދީ ޕޯޓުތަކަށް އިމްޕޯޓް ކުރުން އިތުރުވެފައިވާ ކަމަށް އޭނާ ވިދާޅުވިއެވެ.
ރާއްޖޭގެ އެކި ސަރަހައްދުތަކަށް އިމްޕޯޓް އިތުރުވެގެންދިއުމަކީ އެ ސަރަހައްދުތަކުގައި އިގްތިސާދީ ހަރަކާތްތައް އިތުރުވެގެންދާ ކަމެއް ކަން ފާހަގަ ކުރައްވައި ނިޔާޒު ވިދާޅުވީ އޭގެ ސަބަބުން އެ ސަރަހައްދުތަކުގައި ވަޒީފާގެ ފުރުސަތުވެސް އިތުރުވެގެންދާނެ ކަމަށެވެ.
2020 ވަނަ އަހަރު ގެނައި މި ބަދަލާއެކު ގާތްގަޑަކަށް އިތުރުވެގެންދިޔަ 81 އިންސައްތަ އިމްޕޯޓް އިތުރުވެގެންދިޔަ. ސަރަހައްދީ ބަނދަރުތަކަށް ބޭލީމަ ޑިއުޓީ އިނާޔަތްތައް އެބަލިބޭ ބައެއް ތަކެތިން. މިސާލަކަށް ވެހިކަލް، ވެހިކަލް މިހާރު އިމްޕޯޓް މިކުރަނީ އައްޑުސިޓީއިން ނުވަތަ ކުޅުދުއްފުށި ސިޓީން. އެތަންތަނަށް ވެހިކަލް އެތެރެކުރީމަ 50 އިންސައްތަ ޑިއުޓީން އިނާޔަތް ލިބިގެންދޭ. އަދި އެނާޖީ ޑްރިންކްވެސް ފާހަގަ ކޮށްލެވޭ. އެނާޖީ ޑްރިންކްގެ 98 ޕަސެންޓް އެތެރެކޮށްފައި މިވަނީ ރީޖަނަލް ޕޯޯޓުތަކުން.ކަސްޓަމްސްގެ ޑެޕިއުޓީ ޗީފް ސުޕްރިޓެންޑެންޓް އަހުމަދު ނިޔާޒު
ސަރަހައްދީ ޕޯޓުތަކުގެ އިމްޕޯޓް އިތުރުވެގެންދިއުމަކީ އެ ސަރަހައްދުތަކުގައި ކަސްޓަމްސްގެ ޚިދުމަތް އިތުރަށް ފުޅާވުމަށް ލިބިގެންދާނެ ފުރުސަތުތަކެވެ. އެގޮތުން، ދެކުނުގެ އިމްޕޯޓް އިތުރުވުމާއި ގަން އިންޓަރނޭޝަން އެއަރޕޯޓު އޮތުމުގެ ސަބަބުން އެ ސަރަހައްދުގައި ކަސްޓަމްސްގެ ރީޖަނަލް އޮފީސް ގާއިމްކުރުމުގެ މަސައްކަތް މިހާރު ދަނީ ކުރަމުންނެވެ.
ކަސްޓަމްސްގެ އޮފީސްތައް ހުންނަ ސަރަހައްދުތަކުގެ ތެރޭގައި މާލޭގެ އިތުރުން ހއ. އުލިގަމާއި ހދ. ހަނިމާދޫ އާއި ކުޅުދުއްފުށި ސިޓީ އާއި ނ. މާފަރާއި ލ. ގަމާއި ގއ. ވިލިނގިއްޔާއި ސ. ހިތަދޫ އާއި ސ. ގަން ހިމެނެއެވެ.
