ހުންނަންވީ މިންވަރަށްވުރެ އިތުރަށް "ޕެސްޓިސައިޑް" ހުރުމުން އިންޑިއާގެ "ޔޫރޯ ފްރުޓްސް" ބްރޭންޑްގެ "ތޮމްސަން ސީޑްލެސް ގްރޭޕްސް" ވިއްކުމާއި، ބޭނުންކުރުން މަނާކޮށްފިއެވެ.
މޯލްޑިވްސް ފުޑް އެންޑް ޑްރަފް އޮތޯރިޓީ (އެމްއެފްޑީއޭ)އިން ބުނީ ޔޫރޯ ފްރުޓްސް ބްރޭންޑްގެ ތޮމްސަން ސީޑްލެސް ގްރޭޕްސް ރާއްޖެ އެތެރެވެފައިވާކަމުގެ މައުލޫމާތު ޔޫރަޕުގެ ރެޕިޑް އެލަރޓް ސިސްޓަމް ފޮރ ފުޑް އެންޑް ފީޑްއިން އެ އޮތޯރިޓީއަށް އަންގާފައިވާކަމަށެވެ.
މި އުފެއްދުން އެކްސްޕޯޓުކޮށްފައިވަނީ އިންޑިއާގެ ޔޫރޯ ފްރުޓްސް ޕްރައިވެޓް ލިމިޓެޑުންނެވެ. މި އުފެއްދުން ހޯލްސޭލްކޮށްފައިވަނީ ނެދަރލެންޑްސްގެ ކުންފުންޏެއް ކަމުގައިވާ "ގްލޯބަލް ގްރީން ޓީމް" އިން ކަމަށް އެމްއެފްޑީއޭއިން ބުނެއެވެ.
އެމްއެފްޑީއޭއިން ބުނީ މި އެލަރޓާއި ގުޅިގެން މި އުފެއްދުމުގެ ސަބަބުން ކާބޯތަކެތީގެ ރައްކާތެރިކަމަށް އޮތް ހިރާސްގެ މިންވަރު ދެނެގަތުމުގެ މަސައްކަތް އެ އޮތޯރިޓީން ކުރަމުންދާކަމަށެވެ.
އެހެންކަމުން، ރައްކާތެރިކަމުގެ ފިޔަވަޅެއްގެ ގޮތުން ޔޫރޯ ފްރުޓްސް ބްރޭންޑުގެ "ތޮމްސަން ސީޑްލެސް ގްރޭޕްސް" ނުވިއްކުމަށާއި، ބޭނުން ނުކުރުމަށް އެމްއެފްޑީއޭއިން ވަނީ އަންގާފައެވެ.
