މުދައްރިސުން ތައުލީމީ ދާއިރާއަށް ޝައުގުވެރިކަން ކުޑަވަނީ 4 ސަބަބަކާހެދި
މުދައްރިސުންނަށް ވަރކް-ލައިފް ބެލެންސް ނުކުރެވި، އެމީހުންގެ ދިރުއުޅުމަށް ވެސް ނޭދެވޭ އަސަރުކުރޭ
ސްކޫލް ދަރިވަރުން ފީލްޑަށް ނުކުމެ
މުދައްރިސުން ތައުލީމީ ދާއިރާއަށް ޝައުގުވެރިކަން ކުޑަވާ މައިގަނޑު 4 ސަބަބު ހާމަކޮށްފިއެވެ.
މިކަން ހާމަކޮށްފައިވަނީ ރާއްޖޭގެ ސްކޫލްތަކުގައި ކިޔަވައިދޭނެ މުދައްރިސުން ލިބުމުގައާއި، ލިބިފައިވާ މުދައްރިސުން ކިޔަވައިދިނުމުގައި ދެމިތިބުމަށް ދިމާވެފައިވާ ދަތިތަކާއި ގޮންޖެހުންތަކުގެ ސަބަބުތައް ދެނެގަތުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އެދިވަޑައިގަތުމަކަށް ކުރި ދިރާސާގެ ރިޕޯޓުގައެވެ.
މި ދިރާސާގައި މުދައްރިސުން ތައުލީމީ ދާއިރާއަށް ޝައުގުވެރިކަން ކުޑަވާ މައިގަނޑު 4 ސަބަބުން ފާހަކޮށްފައިވެއެވެ. އެގޮތުން ދިރާސާގައި ބައިވެރިވި މީހުންގެ 95 އިންސައްތަ ބުނަނީ އެއީ މުސާރައާއި އިނާޔަތްތައް ނިސްބަތުން ކުޑަވުމެވެ. އަދި ވަރކްލޯޑް ބޮޑުވުމާއި މަސައްކަތުގައި ހޭދަކުރަންޖެހޭ ވަގުތު ގިނަވުން ކަމަށް 70 އިންސައްތަ މީހުން ގަބޫލުކުރެއެވެ. ހައްގުތައް ކަށަވަރު ނުވުމާއި ހައްގުތަކަށް ރައްކާތެރި ނުވާކަމަށް 48 އިންސައްތަ މީހުން ގަބޫލުކުރި އިރު ބޭނުންވާ ވަސީލަތްތައް އެކަށީގެންވާ ވަރަށް ނެތް ކަމަށް 32 އިންސައްތަ މީހުން ގަބޫލުކުރެއެވެ.
ދިރާސާގައި ބައިވެރިވި 91 އިންސައްތަ މުދައްރިސުންނަކީ ކިޔަވައިދިނުމަށް ޝައުގުވެރިކަން ހުރެގެން އެންމެ ފުރަތަމަ ކުރިމަތިލާފައިވާ މީހުންނެވެ. ނަމަވެސް މުދައްރިސްކަމުގައި އެވްރޭޖްކޮށް ދިވެހި ނަސްލުގެ މުދައްރިސުން 14 ވަރަކަށް އަހަރު ހޭދަކުރާ އިރު، ޝައުގުވެރިކަން ހުންނަ މުދައްރިސުންގެ ނިސްބަތް އެވްރޭޖްކޮށް ހުރީ 74 އިންސައްތައިގައެވެ. ކިޔަވައިދިނުމުގެ ފަންނުގައި ދެމިހުރުމަށް ޝައުގުވެރިވާ ސަބަބުތަކުގެ ތެރޭގައި ކުދިންދެކެ ލޯބިވުން، ރަނގަޅު ޖީލެއް ބިނާކުރުން، ކިޔަވައިދިނުމުން އަމިއްލަ ނަފްސަށް ލިބޭ ހިތްހަމަޖެހުން ހިމެނެއެވެ. މިއީ އިންޓްރިންސިކް އަދި އެލްޓްރުއިސްޓިކް ޝައުގުވެރިކަމެވެ.
މުސާރައާއި އިނާޔަތްތަކާ ގުޅޭ ގޮތުން މުދައްރިސުން ފާހަގަކުރި މައިގަނޑު 4 ސަބަބުތަކުގެ ތެރޭގައި އެހެން ދާއިރާތަކާ އަޅާ ބަލާއިރު މުސާރަ އާއި އިނާޔަތްތައް ދަށްވަމުން ދިއުމާއި، އިތުރުގަޑީގެ ފައިސާ 10 އިންސައްތައުގައި ހިފެހެއްޓިގައި ހުރުން އަދި އަމިއްލަ ޖީބުން ކުރަންޖެހޭ ހަރަދު ބޮޑުވުމުގެ އިތުރުން ދިވެހިންނާއި ބިދޭސީ މުދައްރިސުންގެ އިނާޔަތްތަކުގެ ފަރަގު ހުރުން ހިމެނެއެވެ.
ވަރކްލޯޑް އިތުރުވެފައިވުމުގެ ސަބަބުން ވަރަށް ގިނަ މުދައްރިސުންނަށް ވަރކް-ލައިފް ބެލެންސް ނުކުރެވި، އެމީހުންގެ ދިރުއުޅުމަށް ވެސް ނޭދެވޭ އަސަރުކޮށް، އަމިއްލަ އާއިލާއަށާއި ދަރިންނަށް އަޅާލާންވާ ވަރަށް އަޅާނުލެވޭކަން ދިރާސާގައި ފާހަގަކޮށްފައިވެއެވެ. މި ތީމްގެ ދަށުން ހޯދުމުގެ އެންމެ މުހިންމު 4 ކަމުގެ ތެރެގައި ވަޒީފާގައި ހޭދަކުރަންޖެހޭ ވަގުތު ވަރަށް ބޮޑުތަން އިތުރުވުމާއި، ކުއްލިކުއްލިއަށް ނިންމަންޖެހޭ މަސައްކަތް ގިނަވުމުގެ އިތުރުން އާދަޔާ ހިލާފަށް އިތުރު ހަރަކާތްތައް ގިނަވުމާއި، އައު ޕޮލިސީތަކުން ޒިންމާތަކެއް އިތުރުވުން ހިމެނެއެވެ.
ދިރާސާގައި ބޭނުންކުރި ސަރވޭގެ ބައިވެރިންގެ ތެރެއިން 48 އިންސައްތަ މުދައްރިސުން ފާހަގަކުރި ގޮތުގައި މުދައްރިސުންގެ ހައްގުތައް ކަށަވަރުނުވުމަކީ އަދި އެ ހައްގުތަކަށް އިހްތިރާމުނުކުރުމަކީ މުދައްރިސުން މި ދާއިރާއަށް ޝައުގުވެރިކަން ކުޑަވާ ސަބަބެއްކަމަށް ބުނެފައިވެއެވެ. އަދި ތައުލީމީ ދާއިރާއަށް އަދި ވަކިން ހާއްސަކޮށް މުދައްރިސުންނާ މެދު ގަދަރު ކުޑަވާނެހެން އަދި އިހްތިރާމު ކުޑަވާނެހެން އަމަލުކުރެވޭ އަދި މުހާތަބުކުރެވޭ ހާލަތްތައް ސްކޫލުގެ މާހައުލުގެ ތެރެއިންނާ މުޖްތަމައުއިން އެކި މިންވަރަށް އެކި ހާލަތްތަކުގައި ދިމާވަމުންދާކަމަށް ވެސް މުދައްރިސުން ފާހަގަކޮށްފައިވެއެވެ.
މަސައްކަތްކުރާ ތަނާއި، ވަސީލަތްތަކުގެ ތީމުގެ ދަށުން ކިޔަވައިދިނުމުގެ ފަންނަށް ކުރިމަތިވެފައިވާ ގޮންޖެހުންތަކުގެ ތެރޭގައި، ސްޓާފްރޫމުގެ ހާލަތު ދަށްވުން، އިންޓަރނެޓުގެ ސްޕީޑް ލަސްވުން، ކިޔަވައިދިނުމުގައި ބޭނުންވާ ތަކެތި ނުލިބުން އަދި ލެބޯޓަރީތަކާއި ލައިބްރަރީތަކުގެ ބޭނުން އެންމެ އެދެވޭ ގޮތަށް ނުކުރެވުން ހިމެނެއެވެ.
