ސައޫދީން ތެޔޮ އުފައްދާ މިންވަރު އިތުރުކުރަނީ

ސައޫދީން ތެޔޮ އުފައްދާ މިންވަރު އިތުރުކުރުމަށް ނިންމާފައިވާކަމަށް އެ ގައުމުގެ ވަލީއަހުދު މުހައްމަދު ބިން ސަލްމާން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ހޮނިހިރު ދުވަހު ޖިއްދާގައި ފެށި، އެމެރިކާއާއި ސައޫދީގެ ސަމިޓެއް ފައްޓަވައިދެއްވައި ދެއްކެވި ވާހަކަފުޅުގައެވެ. އެގޮތުން، ސައޫދީން ތެޔޮ އުފައްދާ މިންވަރު 2027އާ ހަމައަށް ދުވާލަކު 13 މިލިއަން ފީފާއަށް އިތުރުކުރެވޭނެކަމަށް ވިދާޅުވިއެވެ.

ވަލީއަހުދު ވިދާޅުވިގޮތުގައި މިއީ އެ ގައުމުން ތެޔޮ އުފެއްދޭނެ އެންމެ ގިނަ އަދަދެވެ. އެހެންކަމުން އެއަށްވުރެ އިތުރުކުރެވޭވަރަށް ކެޕޭސިޓީ ނުހުންނާނެ ކަމަށްވެސް ވިދާޅުވިއެވެ.

ވަލީއަހުދު ވިދާޅުވީ ޖައްވަށް ދޫކުރާ ގޭސް މަދުކުރުމަށް ޚިޔާރުކުރާ ޕޮލިސީތަކުގެ ސަބަބުން، ކުރިއަށް އޮތް އަހަރުތަކުގައި ތަކެތީގެ އަގާއި ހަކަތައިގެ އަގު އުފުލޭނެކަމަށާއި، ވަޒީފާ ނެތް މީހުން ގިނަވުމާއި އިގުތިސާދީ އަދި އިޖުތިމާއީ މައްސަލަތައް ގިނަވާނެކަމަށް ލަފާކުރެއްވޭކަމަށެވެ.

ސައޫދީން ބާއްވާ މި ސަމިޓަކީ އެމެރިކާގެ ރައީސް ޖޯ ބައިޑަން އެ ގައުމަށް ވަޑައިގެންނެވުމާގުޅިގެން ބާއްވާ ސަމިޓެކެވެ. އެގޮތުން، ދެ ގައުމުގެ ގުޅުން އެކި ދާއިރާތަކުން އިތުރަށް ބަދަހިކުރުމަށް މި ސަމިޓުގައި މަޝްވަރާކުރާނެއެވެ.