ދަ ގްރާންޑޭ އަތުން އުނދަގޫ މޮޅެއް ހޯދައިގެން ކްލަބް ވެލެންސިޔާއިން ދިވެހި ޕްރިމިއަރ ލީގު ތާވަލްގެ ހަތަރުވަނައަށް ޖެހިލައިފިއެވެ.

ތާވަލްގެ ފުލުގައި އޮތް ދަ ގްރާންޑޭ އަތުން ވެލެންސިޔާ މޮޅުވީ 1-0ންނެވެ. ވެލެންސިޔާ މެޗުން މޮޅުކޮށްދިން ލަނޑު ފުރަތަމަ ހާފްގެ އިތުރު ވަގުތުގައި ޖެހީ އިސްމާއީލް އީސާއެވެ. މެޗުގެ މޮޅު ކުޅުންތެރިއަކީ މުހައްމަދު އުމެއިރެވެ. މިމޮޅާއެކު ވެލެންސިޔާއަށް ހަތަރުވަނަ ލިބެނީ 18 މެޗުން 25 ޕޮއިންޓް ހަމަކޮށްގެންނެވެ. ތިންވަނާގައި އޮތީ 17 މެޗުން 26 ޕޮއިންޓާއެކު ޓީސީއެވެ. ލީގުގައި ހޮނިހިރު ދުވަހުގެރޭ ޓީސީއަށް އޮތީ، އެއްވަނާގައި އޮތް މާޒިޔާއާ ވާދަކުރާ މެޗެވެ. ފަސްވަނާގައި އޮތް ގްރީން ސްޓްރީޓްސްއާއި ހަވަނާގައި އޮތް ޔުނައިޓެޑް ވިކްޓްރީ އާދިއްތަ ދުވަހުގެރޭ ވާދަކުރާނެއެވެ. އެ މެޗަށް ދާއިރު ދެޓީމް އޮތީ ޕޮއިންޓްގެ ގޮތުން އެއްވަރުވެފައެވެ.

ލީގު ތާވަލްގެ ފުލުގައި ދަ ގްރާންޑޭ އަދިވެސް އޮތީ ޕޮއިންޓަކާއެކުއެވެ.