ފަތުރުވެރިން ތަކަކަށް ދިން ޙަމަލާއާއި ގުޅިގެން ޓެގް އެޅުވި މީހުންގެ އަޑުއެހުމެއް މާދަމާ
16 ޖުލައި 2022 | ހޮނިހިރު 06:45ހުޅުމާލޭގައި 3 ފަތުރުވެރިންނަށް ވަނީ ޙަމަލާދީފައި
ކްރިމިނަލް ކޯޓް- އަޑުއެހުން ތާވަލުކޮށްފައިވަނީ އާދިއްތަ ދުވަހުގެ ހެނދުނު 10:00އަށް
ހުޅުމާލޭގައި ފަތުރުވެރިން ތަކަކަށް ދިން ޙަމަލާއާއި ގުޅިގެން ހައްޔަރުކުރި މީހުންގެ ތެރެއިން ޓެގް އެޅުވި 2 މީހެއްގެ މައްޗަށް ކުރާ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.
04 ފެބްރުއަރީ ވީ އަންގާރަ ދުވަހުގެ 19:00 އާއި 20:00އާ ދެމެދުގެ ވަގުތެއްގައި ހުޅުމާލޭގައި ބޭރުގެ 3 މީހަކަށް ވަނީ ޙަމަލާދީފައެވެ. އެއީ ޗައިނާ ފަތުރުވެރި އަކާއި، ރާއްޖޭގައި މަސައްކަތް ކުރަމުންދާ ޗައިނާ މީހަކާއި، އަދި ރާއްޖޭގައި މަސައްކަތް ކުރަމުންދާ އޮސްޓްރޭލިއާ މީހަކަށެވެ.
އެ މައްސަލައާއި ގުޅިގެން ހައްޔަރު ކުރި މީހުންގެ ތެރެއިން، އޭރު އެ މައްސަލައިގައި ދައުވާ ނުކުރެވި ދޫވި މީހުންގެ ފައިގައި ވަނީ ޓެގް އަޅުވާފައެވެ. ޓެރަރިޒަމް މަނާ ކުރުމުގެ ޤާނޫނުގެ ދަށުން އެ މީހުންގެ ޓެގް އެޅުވީ އެއް އަހަރުގެ މުއްދަތަށެވެ.
އެހެންނަމަވެސް އޭގެ ތެރެއިން ދެ މީހަކު މޮނިކޮން އަމުރާ ޚިލާފުވުމުގެ ސަބަބުން އެމީހުންގެ މައްޗަށް ދައުވާ އުފުލާފައިވާއިރު، އާދިއްތަ ދުވަހުގެ އަޑުއެހުމަކީ އެ ދެމީހުންގެ މައްޗަށް ކުރާ ދައުވާގެ އަޑުއެހުމެކެވެ. އެގޮތުން މޮނިކޮން އަމުރާ ޚިލާފުވުމުގެ ކުށުގެ ދައުވާ އުފުލާފައިވަނީ ގދ ވާދޫ ސީސަންގެ އަލީ ޙަމްޒަތާއި، ރ ކަނދޮޅުދޫ ފެހިވިލާ އިބްރާޙިމް އަޙްސަން މުޙައްމަދުގެ މައްޗަށެވެ.
އެ ދައުވާގެ އަޑުއެހުން ތާވަލު ކޮށްފައިވަނީ އާދިއްތަ ދުވަހުގެ ހެނދުނު 10:00 އަށެވެ.
މިޙަމަލާގެ ޒިންމާ ނަގާކަމަށްބުނެ، މޫނު ނިވާކޮށްގެން ތިބި ބަޔަކު، ތިމަންނާމެންމީ އިސްލާމިކް ސްޓޭޓްގެ ދިވެހިރާއްޖޭގެ ގޮފިކަމަށް ބުނެ ސޯޝަލް މީޑިއާއަށް އަޕްލޯޑް ކުރި ވީޑިއޯ އެއްވެސް އޭރު ދައުރު ވަމުން ދިޔައެވެ.
