ބަޔާންގައި މަޑުކުރަން ގްނަބްރީ ނިންމައިފި

ބަޔާން މިއުނިކް އަށް ކުޅެމުން އަންނަ ޖަރުމަނުގެ ވިންގަރ ސާޖް ގްނަބްރީ އެ ޓީމުގައި މަޑުކުރަން ނިންމައިފިއެވެ.

ގްނަބްރީ ބަޔާން އާއިއެކު ހަދާފައިވާ އެއްބަސްވުމުގެ މުއްދަތު ހުސްވި ޖޫން މަހުގެ ނިޔަލަށް ވަނީ ހަމަވެފައެވެ. އެއާއިއެކު ބަޔާނުން ވަނީ އޭނާއަށް ކުލަބުގައި މަޑުކުރުމަށް އެދި އައު އެއްބަސްވުމެއް ހުށައަޅާފައެވެ. ނަމަވެސް، ނިމުނު ސީޒަނަށްފަހު އޭނާ ބަޔާން ދޫކޮށްލަން އުޅޭކަމުގެ އަޑުތަކެއް އޭރު ވަނީ ފެތުރިފައެވެ. އެކަމުގައި ބަޔާން އާއި ގްނަބްރީއާ ދެމެދު އޭރު ޚިޔާލު ތަފާތުވުންތަކެއް އޮތް ކަމަށް ރިޕޯޓުތަކުގައިވެއެވެ.

އެކަމާ ގުޅޭ ގޮތުން ބަޔާންގެ ރައީސް ހާބާޓް ހައިނާ އޭރު ބުނީ، ބަޔާނުން ގްނަބްރީއާ މަޝްވަރާކުރަމުން އަންނަކަމަށާއި، އޭނާއާ ދެމެދު އެއްބަސްވުމަކަށް އޭދެވިފައި ނުވާކަމަށެވެ. އޭރު ހާބާޓް ބުނީ ބަޔާނުން އުންމީދުކުރަނީ ގްނަބްރީ ބަޔާންގައި މަޑު ކުރާނެ ކަމަށެވެ.

މަޝްވަރާތަކަށްފަހު ގްނަބްރީ މިހާރު މިވަނީ ބަޔާންގައި މަޑުުކުރަން ނިންމާފައެވެ. ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި އޭނާ ބަޔާންގައި އިތުރު ހަތަރު އަހަރު މަޑުކުރާނެއެވެ. އެހެންކަމުން ބަޔާން އާއިއެކު އޭނާ ދެން ހަދާ އެއްބަަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. މީގެ އިތުރުން ރޮމާނޯ ބުނި ގޮތުގައި އައު އެއްބަސްވުމުގައި ގްނަބްރީ ވަރަށް އަވަހަށް ސޮއިކުރާނެއެވެ.

އުމުުރުން 26 އަހަރުގެ ގްނަބްރީ ބަޔާނަށް ބަދަލުވީ 2017 ވަނަ އަހަރުއެވެ. އޭގެ ކުރިން އޭނާ ވަނީ އާސެނަލް އަށް ވެސް ކުޅެފައެވެ. ބަޔާން އަށް ބަދަވި ފަހުން އޭނާ ވަނީ ލޯނު އެއްބަސްވުމެއްގެ ދަށުން އެހެން ޓީމަކަށް ކުޅެފައެވެ. ގްންބަރީ ވަނީ ބަޔާނަށް 171 މެޗު ކުޅެދީ 63 ލަނޑު ޖަހައިދީފައެވެ. އޭނާ ވަނީ ބަޔާން އާއިއެކު ޖަރުމަނު ލީގު ހަތަރު ފަހަރު، ޖަރުމަނު ކަޕް ދެ ފަހަރު، ޖަރުމަނު ސުޕަ ކަޕް ދެ ފަހަރު ޔުއެފާ ޗެމްޕިއަންސް ލީގު އެއް ފަހަރު، ޔުއެފާ ސުޕަ ކަޕް އެއް ފަހަރު އަދި ފީފާ ކުލަބް ވޯލްޑް ކަޕް އެއް ފަހަރު ހޯދާފައެވެ.