ތިން އަހަރެއްހާ ދުވަސްފަހުން ދަނޑަށްއަރާ ވިކްޓްރީ މޮޅުވެއްޖެ

އެޑްމިނިސްޓްރޭޝަންއާއި މުސާރައިގެ މައްސަލަތަކާ ގުޅިގެން ތިން އަހަރެއްހާ ދުވަހު ސަސްޕެންޝަނުގައި އޮތުމަށްފަހު އަލުން ދަނޑަށްއަރާ ކުޅުނު ފުރަތަމަ މެޗު ވިކްޓްރީ ސްޕޯޓްސް ކްލަބް ކާމިޔާބުކޮށްފިއެވެ.

ސަސްޕެންޝަނުން ސަލާމަތްވެ ވިކްޓްރީ ވާދަކުރަނީ އެފްއޭއެމް ދެވަނަ ޑިވިޝަން ފުޓްބޯޅަ މުބާރާތުގައެވެ. މި މުބާރާތުގައި ވިކްޓްރީގެ ފުރަތަމަ މެޗުގައި ބައްދަލުކުރީ ބީޖީ ސްޕޯޓްސް ކްލަބްއާއިއެވެ. އެމެޗު ވިކްޓްރީ ކާމިޔާބުކުރީ 2-1ންނެވެ.

މެޗުގެ ފުރަތަމަ ހާފުގައި ވިކްޓްރީ އިން ދެލަނޑު ޖަހާ ރަނގަޅު ލީޑެއް ނެގިއެވެ. ފުރަތަމަ ހާފުގެ ނުވަ ވަނަ މިނެޓުގައި ވިކްޓްރީއަށް ލީޑު ނަގައިދިނީ އެ ޓީމުގެ ލެބަނަން ފޯވާޑް މުހައްމަދު ކުޑޫއެވެ. އޭގެ އިރުކޮޅެއް ފަހުން ވިކްޓްރީގެ އަހުމަދު ހުސެއިން ވަނީ ގޯލުގެ މަތީ ދާގަނޑަށް ބޯޅަ ފޮނުވާލައިގެން ވިކްޓްރީއަށް ލީޑު ފުޅާކޮށްދީފައެވެ.

ފުރަތަމަ ހާފުގެ ވިކްޓްރީގެ ކީޕަރު ޓެސްޓު ކޮށްލެވޭ ވަރުގެ ހަމަލާއެއް ބީޖީއަށް އުފެއްދިފައެއް ނުވެއެވެ. ބީޖީގެ ހަމައެކަނި ލަނޑު ދެވަނަ ހާފުގެ 61 ވަނަމިނެޓުގައި ކާމިޔާބުކޮށްދިނީ ޔަފާއު މުހައްމަދުއެވެ. މިއީ އެޓީމަށް ލިބުނު ޕެނަލްޓީއަކުން ޔަފާއު ޖެހި ލަނޑެކެވެ.

އޭގެ ފަހުން ބީޖީއިން އިތުރު ލަނޑެއްޖަހާ ނަތީޖާ ހަމަހަމަ ކުރުމަށް ހަމަލާތަކެއް އުފެއްދިއިރު، ވިކްޓްރީ އިންވެސް ވަނީ ލީޑު ފުޅާ ކުރުމަށް މަސައްކަތް ކޮށްފައެވެ.

މުބާރާތުގެ ދެވަނަ ގްރޫޕުގައި ހޮނިހިރު ދުވަހުގެ ހަވީރު ބައްދަލުކުރާނީ އެލްޓީ ސްޕޯޓްސް ކްލަބާއި ލޮރެންޒޯ ސްޕޯޓްސް ކްލަބްއެވެ. ރޭގަނޑު ކުޅޭ މެޗުގައި ނިއު ރޭޑިއަންޓް ސްޕޯޓްސް ކްލަބް ނިކުންނާނީ ކްލަބް ޓީނޭޖް އާއި ދެކޮޅަށެވެ. ސަސްޕެންޝަން އަށްފަހު އެނބުރިއައި ރާއްޖޭގެ އެންމެ ބޮޑު ދެކްލަބު ކަމުގައިވާ ނިއު އަދި ވިކްޓްރީވެސް މި މުބާރާތުގައި ވާދަކުރާނީ ދެވަނަ ގްރޫޕުގައެވެ.