ރޫނީވެސް އެމެރިކާ ލީގަށް

މޭޖަރ ލީގު ސޮކަރގެ ޑީސީ ޔުނައިޓެޑްގެ ކޯޗުކަމާ ހަވާލުވާން ވޭން ރޫނީ އެއްބަސްވެއްޖެއެވެ.

މެންޗެސްޓަރ ޔުނައިޓެޑާއި އިންގްލެންޑްގެ ކުރީގެ ފޯވާޑް ރޫނީ ޑާބީ ކައުންޓީގެ ކޯޗުކަމުން ވަކިވީ މިދިޔަ މަހުއެވެ. 2020 ވަނަ އަހަރު ޑާބީ ކައުންޓީގެ ކޯޗުގެ އިތުރުން ކުޅުންތެރިއެއްގެ ގޮތުގައި އެކްލަބާ ހަވާލުވުމުގެ ކުރިން ރޫނީ ވަނީ 18 މަސްދުވަހު ޑީސީ ޔުނައިޓެޑަށް ކުޅެފައެވެ. ޑާބީ ކައުންޓީއަށް ބަދަލުވެ ތިން މަސް ފަހުން ރޫނީ ވަނީ ދެއަހަރާ ބައިގެ އެއްބަސްވުމެއްގެ ދަށުން އެޓީމްގެ ހެޑްކޯޗުކަމާ ހަވާލުވެފައެވެ.

ޑީސީ ޔުނައިޓެޑްގެ ކޯޗުކަމާ ރޫނީ ހަވާލުވާން އެއްބަސްވިއިރު އޭޕްރީލްމަހުން ފެށިގެން އެޓީމްގެ ކޯޗުގެ މަޤާމް އޮތީ ހުސްކޮށެވެ. އަންގާރަ ދުވަހުގެ ވަގުތެއްގައި އެޓީމްގެ ކޯޗުގެ ގޮތުގައި ރޫނީ ތަޢާރަފްކުރާނެކަމަށް ރިޕޯޓްތައް ބުނެއެވެ.

ރޫނީއަކީ މެންޗެސްޓަރ ޔުނައިޓެޑްގެ ޓޮޕް ސްކޯރަރއެވެ. މެންޗެސްޓަރ ޔުނައިޓެޑްގެ އިތުރުން އެވަޓަންއަށްވެސް ރޫނީ ކުޅުނެވެ. ވޭލްސްގެ ކެޕްޓަން ގެރެތް ބޭލްވެސް ވަނީ އެމެރިކާ ލީގަށް ބަދަލުވެފައެވެ.