ރޫނީ އެމެރިކާގެ ކުލަބަކާ ހަވާލުވަނީ
ރޫނީ ކޯޗިން ކެރިއަރު ފަށާފައިވަނީ ކައުންޓީން
ވޭން ރޫނީ | ޓްވީޓަރ
ވޭން ރޫނީ އެމެރިކާގެ ޑީސީ ޔުނައިޓެޑުގެ ކޯޗުކަމާ ހަވާލުވާން ނިންމައިފިއެވެ.
ރޫނީ އޭނާގެ ސީނިއަރ ކެރިއަރު ހުއްޓާލީ 2021 ވަނަ އަހަރުއެވެ. ސީނިއަރ ކެރިއަރު ހުއްޓާލުމަށްފަހު ކޯޗިން ކެރިއަރު އޭނާ ފަށާފައިވަނީ އޭނާ އެންމެ ފަހުން ކުޅުނު ކުލަބް ކަމަށްވާ ޑާބީ ކައުންޓީންނެވެ. ދާދި ފަހުން އޭނާ ވަނީ އެ ޓީމުގެ ކޯޗުކަން ދޫކޮށްލަން ނިންމާފައެވެ.
ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި ޑީސީ ޔުނައިޓެޑުގެ ކޯޗުކަމަށް ރޫނީ ހަމަޖެއްސުމަށް މިހާރު އަންނަނީ ތައްޔާރުވަމުންނެވެ. އޭނާ ބުނި ގޮތުގައި ރޫނީ ޑާބީ ކައުންޓީ ދޫކޮށްލި ހިސާބުން ފެށިގެން ޑީސީ ޔުނައިޓެޑުން އޭނާ ގެންދަން ބޭނުންވިއެވެ. މީގެ އިތުރުން އޭނާ ބުނި ގޮތުގައި ޑީސީ ޔުނައިޓެޑުން މިހާރު ވަނީ ރޫނީއަށް ހުށަހަޅާނެ އެއްބަސްވުން ވެސް ތައްޔާރުކޮށްފައެވެ.
ރޫނީ އޭނާގެ ސީނިއަރ ކެރިއަރު ފަށާފައިވަނީ 2002 ވަނަ އަހަރު އެވަޓަން އިންނެވެ. އޭގެ ފަހުން 2004 ވަނަ އަހަރުގެ ތެރޭގައި އޭނާ ވަނީ އެވަޓަން ދޫކޮށް މެންޗެސްޓަރ ޔުނައިޓެޑަށް ބަދަލުވެފައެވެ. އޭނާ ވަނީ ޔުނައިޓެޑަށް ކުޅެދިން 559 މެޗުގައި 253 ލަނޑު ޖަހާފައެވެ. ރޫނީ ވަނީ ޔުނައިޓެޑާއެކު ހޭދަކުރި މުއްދަތުގައި އެ ޓީމާއެކު 16 ތައްޓެއް ކާމިޔާބުކޮށްފައެވެ. ޔުނައިޓެޑު ދޫކޮށް 2017 ވަނަ އަހަރު އޭނާ ބަދަލުވީ ކުރީގެ ކުލަބް އެވަޓަން އަށެވެ. އެއް އަހަރު އެ ޓީމަށް ކުޅުމަށް ފަހު ދެން އޭނާ ބަދަލުވީ ޑީސީ ޔުނައިޓެޑަށެވެ. އެ ޓީމަށް ދެ އަހަރު ކުޅެދިނުމަށް ފަހު އެންމެ ފަހުން އޭނާ ބަދަލުވީ ޑާބީ ކައުންޓީއަަށެވެ.
