މުދައްރިސުންގެ މުސާރު ބޮޑުވުމުން، ރަސްމީގަޑީގެ ބޭރުން ކިޔަވައިދިނުމާ ގުޅޭ ގިނަ މަސައްކަތެއްގައި މުދައްރިސުން ސްކޫލާއި ސްކޫލުން ބޭރުގައި މަސްއޫލުވާންޖެހޭނެ ކަމަށް ބަލައި، އެކަށީގެންވާ ރަނގަޅު މިންވަރެއްގެ ފިކްސްޑް "ޓީޗަރ އެލަވަންސެއް" ހަމަޖެއްސުމަށް ހުށަހަޅައިފިއެވެ.

މިގޮތަށް ހުށަހަޅާފައިވަނީ ރާއްޖޭގެ ސްކޫލްތަކުގައި ކިޔަވައިދޭނެ މުދައްރިސުން ލިބުމުގައާއި ލިބިފައިވާ މުދައްރިސުން ކިޔަވައިދިނުމުގައި ދެމިތިބުމަށް ދިމާވެފައިވާ ދަތިތަކާއި ގޮންޖެހުންތަކާއި އޭގެ ސަބަބުތައް ދެނެގަތުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ އެދިވަޑައިގަތުމަކަށް ކުރި ދިރާސާގެ ރިޕޯޓުގައެވެ.

މި ރިޕޯޓުގެ ހުށަހެޅުންތަކުގައި ބުނެފައިވަނީ މި ދިރާސާއިން ފާހަގަކުރެވުނު އެންމެ މުހިންމު އެއް ކަމަކީ މުދައްރިސުންނާއި، ތައުލީމީ ދާއިރާގެ ފަންނީ މުވައްޒަފުން ކުރަންޖެހޭ މަސައްކަތަށް ބަލާއިރު، އެމީހުންގެ މުސާރައަށާއި އިނާޔަތްތަކަށް ރަނގަޅު ބަދަލެއް ނައިސް ގިނަ ދުވަސްތަކެއް ވެފައިވާ ކަމަށެވެ. އަދި އިތުރުގަޑިއަށްދޭ ފައިސާ 10 އިންސައްތައިގައި ހިފަހެއްޓިފައި ވުމާއި، ދެވަނަ ވަޒީފާއެއް އަދާކުރުން މަނާކުރާތީ އެޑިއުކޭޝަން މިނިސްޓްރީން ފަންނީ އިދާރާތަކުގެ ކަމާ ގުޅުން ހުރި މުވައްޒަފުންނަށް ދޭ އެލަވަންސް (ނޮން-ޕްރެކްޓިސް އެލަވަންސް) ފަދަ އިނާޔަތްތައް ތައުލީމީ ދާއިރާގައި ނުލިބޭކަން ވެސް ދިރާސާގައި ވަނީ ފާހަގަކޮށްފައެވެ.

ސަރުކާރުގެ އެހެނިހެން ބައެއް އިދާރާތަކުގައި އިތުރުގަޑިއަށް ދޭ ފައިސާ ތައުލީމީ ދާއިރާގައި ދޭ ރޭޓަށްވުރެ މަތީ ރޭޓްތަކުގައި އެބަހުރި ކަމަށް ބުނެފައިވެއެވެ. މިފަދަ ސަބަބުތަކާއި ހުރެ މުދައްރިސުންނާއި ތައުލީމީ ދާއިރާގައި މަސައްކަތް ކުރާ އެހެނިހެން ފަންނީ މުވައްޒަފުން މި ދާއިރާއަށް ޝައުގުވެރިކަން ކުޑަވެ މުދައްރިސުންނާއި ފަންނީ މުވައްޒަފުން ލިބުން ދަތިވެފައިކަމަށް ވެސް ބުނެފައިވެއެވެ.

މީގެ އިތުރުން ގިނަ އަދަދެއްގެ ބިދޭސީ މުދައްރިސުންނާއި، ތަމްރީނު ނުވާ ވަގުތީ މުދައްރިސުން ދާއިރާގައި މަސައްކަތް ކުރަމުންދާކަމަށް ފާހަގަކޮށްފައިވެއެވެ. އަދި މުސާރައަށް ހެޔޮ ބަދަލެއް ނާންނަތާ އަހަރުތަކެއް ފަހުން، މުދައްރިސުންގެ މުސާރަ 2022 ވަނަ އަހަރުގެ މެއި މަހުން ފެށިގެން ބޮޑުކުރުމަށް ސަރުކާރުން ނިންމާފައިވާ ކަން ރިޕޯޓުގައި ފާހަގަކޮށްފައިވެއެވެ.

މުދައްރިސުންގެ ފަންނުގެ އިތުރުގަޑި ކަނޑައެޅުމަކީ ފަސޭހަ ކަމެއް ނޫންކަން ވަނީ ފާހަގަކޮށްފައެވެ. އަދި ކިޔަވައިދިނުމުގެ ފަންނަކީ މުދައްރިސުން ކްލާސްރޫމުގައި ކިޔަވައިދޭ ވަގުތަށްވުރެ އިތުރުން ގިނަ ވަގުތުތަކެއް މަސައްކަތުގައި ހޭދަކުރަންޖެހޭ ކަމެއް ކަމަށް ބުނެފައިވެއެވެ. އަދި ދައުލަތުން ދެވޭ އިތުރުގަޑީގެ ފައިސާއަކީ އެއްވެސް ލިމިޓެއް ނެތި ދޫކުރެވޭ، ވަކި މިންގަނޑެއް ކަނޑަނޭޅޭ ކަމަކަށްވުމަކީ މުޅި މާލީ ނިޒާމަށް އޭގެ ނޭދެވޭ އަސަރުކުރާނެ ކަމެއްކަމަށް ބުނެފައިވެއެވެ. އަދި ކުރަންޖެހޭ މަސައްކަތަށް ކަނޑައެޅޭ އެކަށީގެންވާ މުސާރައާއި އިނާޔަތް ދިނުމަށްފަހު، އިތުރު ގަޑީގެ އުޖޫރަ ދެވޭ ރޭޓްތައް އިންސާފުވެރި އަދި ހަމަހަމަ ނުވަތަ ހާމަނައިޒޭޝަން އަންނާނެ ފަދަ ގޮތަކަށް ސިޔާސަތު ބައްޓަން ކުރުން މުހިންމު ކަމަށް ވަނީ ބުނެފައެވެ. އިތުރުގަޑިއަށް އުޖޫރަ ދޭނަމަ، ހުރިހާ ދާއިރާއަކަށް ވެސް ހަމަހަމަ ކަމާއެކު ލިބޭނެ އުސޫލެއް ގެންގުޅުންޖެހޭކަމަށް މި ރިޕޯޓުގައި ބުނެފައިވެއެވެ. ހަމަހަމަ ކަމާއެކު އުޖޫރަތައް ނުދެވޭނެމަ، އިޖްތިމާއީ އަދާލަތު ގެއްލި، ދުރު މުސްތަގުބަލަކަށް ގައުމަށް ނޭދެވޭ އަސަރު ކުރާނެ ކަމަށް ވަނީ ބުނެފައެވެ.

މިކަން ހައްލުކުރުމަށް އެއް ހުށަހެޅުން ހުށަހަޅާފައިވާ އިރު، 5 ކަމެއް ތަފްސީލުކޮށްފައިވެއެވެ. އެގޮތުން ހުށަހަޅާފައިވާ ހުށަހެޅުމަކީ މުދައްރިސުންނާއި ތައުލީމީ ދާއިރާގައި ފަންނީ މަސައްކަތް ކުރާ ފަރާތްތަކަށް، ކުރާ މަސައްކަތާ އެކަށޭނެ ރަނގަޅު މުސާރައަކާއި އިނާޔަތްތައް ހަމަޖެއްސުމެވެ.