ޗެލްސީއާއި ސިޓީން ސްޓާލިންގެ އަގާމެދު އެއްބަސްވުމަކަށް!

ފޯވާޑް ރަހީމް ސްޓާލިންގ ވިއްކާލުމުގެ އަގާމެދު މެންޗެސްޓަރ ސިޓީއާއި ޗެލްސީން އެއްބަސްވުމަކަށް އައިސްފިއެވެ.

މެންޗެސްޓަރ ސިޓީގެ އިނގިރޭސި ފޯވާޑް ސްޓާލިންގ ވިއްކާލުމަށް ދެކްލަބުން އެއްބަސްވެފައިވަނީ 50 މިލިއަން ޕައުންޑަށްކަމަށް ރިޕޯރޓްތައް ބުނެއެވެ. ރިޕޯރޓްތައް ބުނާގޮތުން ސްޓާލިންގ ޗެލްސީއާއެކު ސޮއިކުރާނީ ފަސް އަހަރުގެ އެއްބަސްވުމެއްގައެވެ. 27 އަހަރުގެ ފޯވާޑާއެކު ސިޓީން ހަދާފައިވާ އެއްބަސްވުމުގައި ބާކީ އޮތީ އެއް އަހަރެވެ. ޗެލްސީގެ އިތުރުން އެހެން ބައެއް ކްލަބްތަކުގެ ހުށަހެޅުންވެސް ސިޓީން މިދިޔަ އަހަރުތަކުގައި ހޯދި ކާމިޔާބީތަކުގައި މުހިއްމު ހިއްސާއެއްވި ފޯވާޑަށް ލިބިފައިވެއެވެ. ސްޓާލިންގ 2015 ވަނަ އަހަރު މެންޗެސްޓަރ ސިޓީއަށް ބަދަލުވީ ލިވަޕޫލުންނެވެ. ސްޓާލިންގ ވަނީ ސިޓީގައި ހޭދަކުރި މުއްދަތުގެ ތެރޭގައި, އެކްލަބަށް 339 މެޗުން 131 ގޯލް ޖަހާފައެވެ. އިނގިރޭސި ޤައުމީ ޓީމަށް 77 މެޗު ކުޅެދީފައިވާ ފޯވާޑް ވެގެންދާނީ ޗެލްސީގެ އާވެރިން ހަވާލުވިފަހުން ކަލަބްގެ ފުރަތަމަ ބޮޑު ޓްރާސްފަރއަށެވެ.

އަންނަ ހަފްތާގައި ޗެލްސީން ޕްރީ ސީޒަން ޓުއަރއަށް އެމެރިކާއަށް ފުރުމުގެ ކުރިން ސްޓާލިންގ ޗެލްސީއަށް ބަދަލުވުމުގެ ކަންކަން ނިމޭނެކަމަށް ރިޕޯރޓްތައް ބުނެއެވެ. ސްޓާލިންގ ކްލަބް ބަދަލުކުރަނީ ސިޓީގައި ލިބޭ ފުރުޞަތު މަދުވުމާއެކު ކެރިއަރުގައި އާ ޗެލެންޖެއް ނެގުމަށެވެ. ސްޓާލިންގެ ކުރިން ސިޓީގެ ބްރެޒިލް ފޯވާޑް ޖީސޫސް ވަނީ އާސެނަލްއަށް ބަދަލުވެފައެވެ. ސިޓީން އެޓީމްގެ ކުރި ބަދަލުކުރީ ނޯވޭގެ ފޯވާޑް ހާލާންޑްއާއި, އާޖެންޓީނާގެ ޒުވާން ފޯވާޑް އަލްވާރޭޒްގެ ސޮއި ހޯދައިގެންނެވެ.