އަމީންގިރި ރިސޯޓުން ގެއްލުނު ފަތުރުވެރިޔާ އަދިވެސް ނުފެނޭ، ބޮޑު ސަރަހައްދެއް ބަލައިފި
5 އެޕްރީލު 2023 | ބުދަ 01:31ޑައިވްކޮށްގެން ކޯސްޓްގާޑުގެ ޑައިވަރުން ވަނީ މިހާތަނަށް 124600 އަކަ މީޓަރުގެ ސަރަހައްދެއް ބަލާފައި
އެމްއެންޑީއެފުން ކުރިއަށްގެންދާ ސަރޗް އެންޑް ރެސްކިޔު އޮޕަރޭޝަނުގެ ތެރެއިން
ކ.އަމީންގިރި ރިސޯޓުން ގެއްލުނު ފަތުރުވެރިޔާ ހޯދުމަށް ބޮޑު ސަރަހައްދެއް ބަލާފައިވާ ކަމަށާއި އަދިވެސް އޭނާ ނުފެންނަ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
އެމްއެންޑީއެފުން ބުނި ގޮތުގައި އެ ފަތުރުވެރިޔާ ގެއްލުނު ކަމަށް ބެލެވެނީ މިދިޔަ އާދީއްތަ ދުވަހު އަމީންގިރި ރިސޯޓު ހުޅަނގުދެކުނު ފަރާތަށް ސްނޯކްލިންގ އަށް ދިޔަފަހުންނެވެ. އަދި އެ ފަތުރުވެރިޔާ ހޯދުމަށް ކޯސްޓްގާޑުން ކުރިއަަށްގެންދާ ސަރޗް އެންޑް ރެސްކިޔު އޮޕަރޭޝަންގައި އަންގާރަ ދުވަހު ވެސް ބޮޑު ސަރަހައްދެއް ބަލައިފައިވާ ކަމަށެވެ.
އެމްއެންޑީއެފުން ބުނި ގޮތުގައި ޑައިވްކޮށްގެން ކޯސްޓްގާޑުގެ ޑައިވަރުން ވަނީ މިހާތަނަށް 124600 އަކަ މީޓަރުގެ ސަރަހައްދެއް ބަލާފައެވެ. އަދި ކަނޑުމަގުން 123 އަކަނޯޓިކަލް މޭލުގެ ސަރަހައްދެއް ކޯސްޓްގާޑްގެ އުޅަނދުފަހަރުން ބަލާފައިވާއިރު ވައިގެ މަގުން 330 އަކަ ނޯޓިކަލް މޭލުގެ ސަރަހައްދެއް ވަނީ ބަލައިފައެެވެ.
ނަމަވެސް މިހާތަނަށް އެ ފަތުރުވެރިޔާގެ އެއްވެސް ނިޝާނެއް ފެނިފައިނުވާ ކަމަށް އެމްއެންޑީއެފުން ބުނެއެވެ.
އެ ފަތުރުވެރިޔާގެ އެއްވެސް ޚަބަރެއް ވޭތޯ އެ ސަރަޙައްދުން ދަތުރުކުރާ އުޅަނދު ފަހަރުން ވެސް ބަލައިދިނުމަށް ކޯސްޓްގާޑުން އެދެއެވެ. އަދި އޭނާއާބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކޮށް ކޯސްޓްގާޑްގެ ހިލޭ ގުޅޭނަމްބަރު 191 ނުވަތަ 3395981 އަދި 3398898 ފޯނަށް ގުޅުމަށް ވަނީ އެދިފައެވެ.
