ކަނޑުމަތިން ނޭޕާލް މީހަކު ގެއްލިއްޖެ
17 ޑިސެމްބަރު 2024 | އަންގާރަ 06:45ގެއްލުނު މީހާ ދަތުރު ކުރަމުން ދިޔައީ "ސީމެކްސް" ނަމަކަށް ކިޔާ ބޯޓަކުން
ތ. ބުރުނީގެ ބޭރުން ދަތުރުކުރަމުންދިޔަ ލޯންޗެއް ދިޔަވާތީ އެމްއެންޑީއެފް ސެންޓްރަލް އޭރިއާ ކޮމާންޑް ކުޑަހުވަދޫ ޕޯސްޓްގެ ސިފައިން އެހީތެރިކަން ފޯރުކޮށްދިނުން (ފައިލް)
އައްޑޫ ސިޓީން މާލެއަށް ދަތުރުކުރަމުންދިޔަ ބޯޓަކުން ނޭޕާލު މީހަކު ގެއްލިގެން ހޯދަން ފަށައިފިއެވެ.
ގެއްލުނު މީހާ ދަތުރު ކުރަމުން ދިޔައީ "ސީމެކްސް" ނަމަކަށް ކިޔާ ބޯޓަކުން ކަމަށް ފުލުހުން ބުނެއެވެ.
ހޯމަ ދުވަހުގެ ރޭ ގެއްލުނު ކަމަށް ރިޕޯޓު ކުރި ރާޖް ކުމާރު ކިޔާ މި މީހާ އަކީ ބޯޓުގެ ފަޅުވެރިއެއްގެ ގޮތުގައި މަސައްކަތް ކުރަމުން އަންނަ މީހެއް ކަމަށް ފުލުހުން ބުނެފައިވެއެވެ.
ފުލުހުން ހާމަ ކޮށްފައިވާ ގޮތުގައި ބޯޓު އައްޑޫ ސިޓީން ފުރީ ހޯމަ ދުވަހުގެ ރޭ 11:30 ހާއިރުއެެވެ.
ބޯޓު ފުރިއިރު އެމީހާ ބޯޓުގައި ހުރިކަން ޔަގީންވާ ކަމަށާއި ދަންވަރު 1:15 ހާއިރު ބޯޓުގެ ކެޕްޓަންއާ އޭނާ ވާހަކަދެއްކި ކަން އެނގޭ ކަމަށްވެސް ވެއެވެ.
އޭނާ ގެއްލުނު ކަމަށް ބެލިފައިވަނީ އައްޑޫ ސިޓީއާއި ފުވައްމުލައް ސިޓީއާ ދެމެދު ކަނޑުމަތިން، ފުވައްމުލަކާ 8 މޭލަށް ކައިރިވެފައި ވަނިކޮށްނެވެ.
ފުލުހުން މިކަން ހިނގި ގޮތް ތަހުގީގު ކުރަމުން ދާއިރު އެމްއެންޑީއެފް އިން އޭނާ ހޯދުމުގެ މަސައްކަތް ދަނީ ކުރަމުންނެވެ.
