ސްކޫލްތަކަށް ބޭނުންވާ މުދައްރިސުންނާއި އެހެނިހެން މުވައްޒަފުން ހޯދައި ތަމްރީނުކުރުމަށް މެދު ރާސްތާގެ "ހިއުމަން ރިސޯސް ޑިވަލަޕްމަންޓް ޕްލޭން"އެއް އެކުލަވާލުމަށް ހުށަހަޅައިފިއެވެ.

މިގޮތަށް ހުށަހަޅާފައިވަނީ ރާއްޖޭގެ ސްކޫލްތަކުގައި ކިޔަވައިދޭނެ މުދައްރިސުން ލިބުމުގައާއި، ލިބިފައިވާ މުދައްރިސުން ކިޔަވައިދިނުމުގައި ދެމިތިބުމަށް ދިމާވެފައިވާ ދަތިތަކާއި ގޮންޖެހުންތަކާއި އޭގެ ސަބަބުތައް ދެނެގަތުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ އެދިވަޑައިގަތުމަކަށް ކުރި ދިރާސާގެ ރިޕޯޓުގައެވެ.

މި ރިޕޯޓުގައި; މުދައްރިސްކަމުގެ ފަށާ ތަމްރީނު ޕްރޮގްރާމުތަކަށް އޮތް ޑިމާންޑް ދަށްވެ، އޭލެވެލް ނިންމާ މޮޅެތި ކުދިން މި ޕްރޮގްރާމުތަކަށް ކުރިމަތިނުލާކަމަށް ވަނީ ބުނެފައެވެ. ތަރައްގީވަމުން އައިސްފައިވާ ބައެއް ގައުމުތަކުގެ ތަޖުރިބާއަށް ބަލާއިރު، 1990އާ 2002އާ ދެމެދު ޗިލީގައި މުދައްރިސުންގެ މުސާރަ ވަރަށް ބޮޑަށް ބޮޑުކޮށް، މުދައްރިސުންނަށް ވާން ބޭނުންވި ފެންވަރު ރަނގަޅު ކުދިންނަށް ސްކޮލަރޝިޕް ދިނުމުގެ ސަބަބުން ޗިލީގައި މުދައްރިސުން ތަމްރީނުކުރާ ކޯސްތަކުގައި ބައިވެރިވި އަދަދު 39 އިންސައްތައަށް އިތުރުވެފައިވާކަމަށް މި ރިޕޯޓުގައި ބުނެފައިވެއެވެ.

އެހެންކަމުން 2021 ވަނަ އަހަރު ސިއްހީ ދާއިރާއަށް، އަދި 2022 ވަނަ އަހަރު އެކައުންޓިންގ ދާއިރާއަށް ރައީސުލްޖުމްހޫރިއްޔާ އަލަށް އިއުލާން ކުރެއްވިފަދަ ޚާއްސަ ސްކޮލަރޝިޕް ސްކީމެއް، ކިޔަވައިދިނުމުގެ ދާއިރާއިން، އެންމެ ބޭނުންތެރި ބޮޑު، ތަމްރީނުވެފައިވާ މުދައްރިސުން ނެތް ދާއިރާތަކަށާއި ދަރިވަރުން ހޯދުމަށް އުނދަގޫ ޕްރޮގްރާމްތަކަށް ޚާއްސަކޮށްގެން އިއުލާންކުރުން މުހިންމުކަމަށް ރިޕޯޓުގައި ވަނީ ބުނެފައެވެ.

މި ރިޕޯޓުގައި މިކަމާގުޅިގެން 3 ހުށަހެޅުމަށް ވަނީ ހުށަހަޅާފައެވެ. ފުރަތަމަ ހުށަހެޅުމަކީ ސްކޫލްތަކަށް ބޭނުންވާ މުދައްރިސުންނާއި އެހެނިހެން މުވައްޒަފުން ހޯދައި ތަމްރީނުކުރުމަށް، މެރު ރާސްތާގެ 'ހިއުމަން ރިސޯސް ޑިވަލަޕްމަންޓް ޕްލޭން'އެއް އެކުލަވާލުމަށް ވަނީ ހުށަހަޅާފައެވެ.

މީގެ އިތުރުން މޮޅެތި ދަރިވަރުން މުދައްރިސްކަމަށް ހިތްޖައްސައި، ޝައުގުވެރިކުރުވުމަށްޓަކައި، އޭލެވެލް ނިންމާ ކުދިންގެ ތެރެއިން ރަނގަޅު ނަތީޖާ ހޯދާ، ކިޔަވައިދިނުމުގެ ފަންނު ޚިޔާރުކޮށް އެ ދާއިރާއިން ކިޔަވަން ބޭނުންވާ ކުދިންނަށް ރައީސުލްޖުމްހޫރިއްޔާގެ ޚާއްސަ ސްކޮލަރޝިޕް ސްކީމެއް ތައާރަފްކުރުމަށް ހުށަހަޅާފައިވެއެވެ.

ތިންވަނަ ކަމަކަށް ހުށަހަޅާފައިވަނީ ފެންވަރު ރަނގަޅު ދަރިވަރުން ޓީޗިންގ ޕްރޮގްރާމުތަކަށާއި، މިފަންނަށް ހިތްޖައްސުވައި ޝައުގުވެރި ކުރުވުމަށްޓަކައި، ކެރިއަރ ގައިޑެންސް ފުޅާ ދާއިރާއެއްގައި ސްކޫލްތަކުގެ ދަރިވަރުންނަށް ދިނުމާއި، މަސައްކަތުގެ ތަޖުރިބާއާއި އިންޓަރންޝިޕް ފަދަ ކަންކަމުގެ ތެރެއިން، ސްކޫލް ދަރިވަރުން އެ ކުދިން ސްކޫލްތަކުގައި ކިޔަވަމުންދާ ދުވަސްވަރު، ކިޔަވައިދިނުމުގެ ދާއިރާއިން ތައާރަފް ކުރެވޭނެ އިންތިޒާމް ހަމަޖެއްސުމަށް ވަނީ ހުށަހަޅާފައެވެ. އަދި މިކަމުގައި ބެލެނިވެރިންނާއި ކައުންސިލްތަކުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި އާންމުކޮށް މުޖްތަމައުގެ ބައިވެރިވުން އިތުރު ކުރުން މުހިންމުކަމުގައި ފާހަގަކޮށްފައިވެއެވެ.

މި ރިޕޯޓުގެ ކޯސްތަކުގެ ފެންވަރު ހިފެހެއްޓުމާއި ކަށަވަރުކުމުގެ ބައިގައި ބުނެފައިވަނީ، ކޯސްތަކުން ދަސްވެނި ވެގެން ނުކުންނަ މުދައްރިސުންގެ ފެންވަރު މިހާރަކަށް އައިސް ދަށްކަމަށް ހޯދުންތަކުން ދައްކާކަމަށެވެ. މީގެ ސަބަބުންތަކުގެ ތެރޭގައި ތަމްރީނު ޕްރޮގްރާމްތައް ފަރުމާކޮށް، ރާވައި ހިންގުމުގައި ހުރި މައްސަލަތައް ފާހަގަކޮށްފައިވެއެވެ. އޭގެ ތެރޭގައި ދަށް އެންޓްރީ ކްރައިޓީރިއާއަކުން ދަރިވަރުން ޕްރޮގްރާމުތަކަށް ވެއްދުމާއި، ޕްރޮގްރާމު މުޅިން ނުނިންމައި، ޕްރޮގްރާމުގެ އެކި ލެވެލްތަކުން ސަނަދު ހާސިލްކޮށްގެން ނުކުމެ މުދައްރިސުންގެ ގޮތުގައި މަސައްކަތްކުރެވޭގޮތަށް އޮތުމާއި، ޕްރޮގްރާމުގެ އޮނިގަނޑާއި، ކިޔަވައިދޭ މޯޑާއި މުއްދަތާގުޅޭ ކަންކަން ހިމެނެއެވެ.

މިކަންކަން ރަނގަޅުކުރުމަށް 4 ހުށަހެޅުމެއް ވަނީ ހުށަހަޅާފައެވެ. އެގޮތުން މުދައްރިސްކަމުގެ ފަށާ ތަމްރީނު ޕްރޮގްރާމުތަކަށް ވަނުމުގެ ޝަރުތަކީ އޭލެވެލް ނުވަތަ އެއާ އެއްފެންވަރުގެ، ދާއިރާއަކާ ގުޅުންހުރި ފައުންޑޭޝަން ކޯހެއްކަމަށް ކަނޑައަޅައި، އޯލެވެލްގެ އިނގިރޭސިން ފާސްވުން ނުވަތަ އެ ފެންވަރު ހުރިކަން ސާބިތުކޮށްދިނުން ކަމުގައި ހަމަޖެއްސުމެވެ. އަދި މެދު ރާސްތާގެ ހިއުމަން ރިސޯސް ޑިވަލަޕްމަންޓް ޕްލޭނެއް އެކުލަވައިލުމެވެ.

ދެވަނަ ހުށަހެޅުމަކީ މުދައްރިސުންގެ ގައުމީ ކޮންޕިޓެންސީ ސްޓޭންޑަރޑް ވީހާ އަވަހަކަށް ނިންމުމާއި ޝާއިއު ކުރުމާއި ތަންފީޒުކުރުމެވެ. އެގޮތުން މުދައްރިސުންގެ ތައުލީމުގެ ޕްރޮގްރާމުތަކުގެ އެކި ލެވެލްތަކުން އެގްޒިޓް ކޮލިފިކޭޝަނެއް ދޭނަމަ، އެލެވެލްއަކުން ފުރިހަމަކުރަންޖެހޭ ނުވަތަ ހާސިލުކުރަންޖެހޭ އެންމެ ކުޑަ މިންވަރެއް (ކޮމްޕިޓެންސީ ސްޓޭންޑަރޑްސް) ހާސިލުވެފައިވާކަން ޔަގީންވާގޮތަށް މި ޕްރޮގްރާމްތައް ފަރުމާކުރުމާއި ހިންގުމަށް ލާޒިމުކޮށް، އަދި އެގޮތުގެމަތިން ނޫނީ އެ ޕްރޮގްރާމުތައް މޯލްޑިވްސް ކޮލިފިކޭޝަން އޮތޯރިޓީން ފާސްނުކުރުމަށް ވަނީ އެދިފައެވެ.

އަދި ހިލޭ ޑިގްރީ ސްކީމުގެ ދަށުން ކިޔަވަމުން ގެންދާ މުދައްރިސުންގެ ތައުލީމުގެ ޕްރޮގްރާމްތަކުގެ އަވަސް ކޮލިޓީ އޮޑިޓެއް ހެއްދުން ވެސް ހިމެނެއެވެ.

ތިންވަނަ ހުށަހެޅުމަކީ އޭލެވެލް ނުވަތަ އެއާ އެއްފެންވަރުގެ، ދާއިރާއާ ގުޅުންހުރި ފައުންޑޭޝަން ކޯހެއް ހެދުމަށްފަހު، ތިން އަހަރު ދުވަހުގެ ފުރަތަމަ ޑިގްރީއަކާއެކު، އެއް އަހަރު ދުވަހުގެ މުދައްރިސްކަމުގެ ޚާއްސަ ތަމްރީނު ނިންމައި ސަނަދު ހޯދުމަށްފަހު، ނުވަތަ ހަތަރު އަހަރު ދުވަހުގެ ބެޗްލަރ އޮފް އެޑިއުކޭޝަން ޕްރޮގްރާމެއް ފުރިހަމަކުރުމަށްފަހު ސްކޫލުތަކުގައި ކިޔަވައިދިނުމަށް ނުކުންނަ ގޮތަށް ހަމަޖެއްސުމެވެ.

4 ވަނަ ހުށަހެޅުމަކީ މުދައްރިސުން ތަމްރީނުކުރާ ޕްރޮގްރާމުތަކުގެ ކޮލިޓީ ހިފެހެއްޓުމަށްޓަކައި، ދަސްކުރާ މުދައްރިސުން ހުށަހަޅާ އެސައިންމަންޓްތައް ޕްލެޖަރިޒަމްއަށް ޓެސްޓްކުރެވޭނެ ނިޒާމެއް މުދައްރިސުންގެ ތަމްރީނުކުރާ ހުރިހާ މަރުކަޒުތަކުގައި ގާއިމްކޮށްފައިވާކަން ކަމާބެހޭ އިދާރާތަކުން ކަށަވަރު ކުރުމާއެކު، ގަވާއިދުން މޮނިޓަރކުރުމެވެ.