އެމެރިކާގައި ބޭލް އުފަލުން

މިހާރުވެސް އަމިއްލަ ގައުމަށް އާދެވުނުކަމުގެ އިހުސާސް ކުރެވިއްޖެކަމަށް، ރެއާލް މެޑްރިޑް ދޫކޮށް އެމެރިކާ ލީގަށް ބަދަލުވި ވޭލްސްގެ ކެޕްޓަން ގެރެތު ބޭލް ބުނެފިއެވެ.

ލޮސް އެންޖެލެސް އެފްސީއަށް ބަދަލުވި ބޭލް ބުނީ އޭނާއަށް ކިޔާފައިވަނީ ހޫނު މަރުހަބާއެއް ކަމަށެވެ. އަދި އޭނާގެ ތަޖުރިބާގެ ބޭނުންކޮށް، ޓީމްގައި އޮތް ޒުވާން ޓީމަށް އެހީވެދޭނެކަމަށާއި, ޓީމަށް ކާމިޔާބު ހޯދައިދޭން ކެތްމަދުވެފައި ހުރިކަމަށް ބޭލް ބުނެފައިވެއެވެ. އެމެރިކާ ލީގަކީ ކުރިއެރުން ހޯދަމުން އަންނަ ލީގެއްކަން ފާހަގަކޮށް ބޭލް ބުނީ އޭނާއަށާއި އާއިލާއަށް ލިބުނީ ރަނގަޅު ފުރުސަތެއް ކަމަށެވެ.

ބޭލް އެމެރިކާގެ ކެލިފޯނިއާއަށް ދިޔައީ ހުކުރު ދުވަހުއެވެ. ރެއާލް މެޑްރިޑްގައި ކާމިޔާބު ނުވަ އަހަރު ހޭދަކޮށް ލޮސް އެންޖެލެސް އެފްސީއަށް ބަދަލުވީ ހިލޭ އެއްބަސްވުމެއްގެ ދަށުންނެވެ. އެއް އަހަރުގެ އެއްބަސްވުމެއްގައި ސޮއިކުރީ އެއްބަސްވުން އިތުރު އަހަރަކަށް އާކުރެވޭ ގޮތަށެވެ.

32 އަހަރުގެ ބޭލްއަށް މިދިޔަ ސީޒަންގައި ރެއާލްގައި ފުރުސަތު ނުލިބުނަސް އޭނާ ވަނީ ވޭލްސް ގައުމީ ޓީމް ވޯރލްޑްކަޕަށް ކޮލިފައިކޮށްދިނުމުގައި މުހިއްމު ދައުރެއް އަދާކޮށްފައެވެ. އެހެންކަމުން މިއަހަރަކީ ބޭލްގެ ކެރިއަރުގައި މުހިއްމު އަހަރެކެވެ. ނޮވެމްބަރު/ޑިސެމްބަރު މަހު ގަތަރުގައި އޮންނަ ވޯރލްޑްކަޕްގައި ވޭލްސްގެ ކެޕްޓަނެއްގެ ގޮތުގައި ބޭލްއަށް އޮތް ޒިންމާ ބޮޑެވެ.