ގިނަ ޓީމުތަކަކުން ގަރެތު ބޭލްއަށް ހުށަހެޅުންތަކެއް ފޮނުވާފައިވާކަމަށް އޭނާ ބުނެފިއެވެ.
ސްޕެއިންގެ ރެއާލް މެޑްރިޑާއެކު ބޭލް ހަދާފައިވާ އެއްބަސްވުމުގެ މުއްދަތު މިމަހުގެ ނިޔަލަށް ހަމަވާނެއެވެ. މިއާއެކު އޭނާ އިތުރަށް ކުލަބުގައި މަޑު ނުކުރާނެއެވެ. މީގެ ކުރިންވެސް ބޭލް، ރެއާލްއިން ވަކިވާނެކަމުގެ އަޑުތައް ފެތުރުނެވެ. އޭނާ ޓީމު ދޫކޮށްލާނެކަމަށް އެންމެ ބޮޑަށް ބެލެވުނީ 2019 ވަނަ އަހަރުއެވެ. ނަމަވެސް ލޯނު އުސޫލުން ބޭލް ވަނީ އޭނާގެ ކުރީގެ ކްލަބު ޓޮޓެންހަމްއަށް ކުޅެފައެވެ.
ބޭލްގެ ކޮންޓްރެކްޓް ހަމަވުމާއެކު އޭނާގެ މުސްތަގުބަލާމެދު މިހާރު ވަނީ ސުވާލު އުފެދިފައެވެ. އެއްބަޔަކު ގަބޫލުކުރާ ގޮތުގައި މިއަހަރުގެ ވޯލްޑް ކަޕަށް ވޭލްސް ކޮލިފައި ނުވެއްޖެނަމަ އޭނާ ރިޓަޔަރ ކުރާނެއެވެ. ނަމަވެސް މިކަމާ ގުޅިގެން ބޭލް ބުނީ ވޯލްޑް ކަޕަށް ވޭލްސް ކޮލިފައިވުމާ އޭނާގެ ކެރިއަރާ ގުޅުމެއް ނެތް ކަމަށެވެ. އަދި މިއީ ކުޅުން ހުއްޓާލުމާމެދު ވިސްނަން އެންމެ ރަނގަޅު ވަގުތު ނޫން ކަމަށާއި، އޭނާގެ ހުރިހާ ސަމާލުކަމެއް އޮތީ ކުރިއަށް އޮތް ވޯލްޑް ކަޕް ކޮލިފައިން މެޗުކަމަށް 32 އަހަރުގެ ބޭލް ބުންޏެވެ.
ވޯލްޑް ކަޕް ކޮލިފައިންގގައި މިރޭ ވޭލްސް ނިކުންނާނީ ޔޫކްރެއިނާ ދެކޮޅަށެވެ. މި މެޗު ފަށާނީ ރާއްޖެ ގަޑިން 21:00 ގައެވެ.
ކުރިއަށް އޮތް ސީޒަންގައި ކުޅުމަށް އެއްވެސް ޓީމަކުން ބޭލްއަށް ހުށަހެޅުންތަކެއް ލިބުނުތޯ ކުރި ސުވާލަކަށް ޖަވާބުދެމުން ބޭލް ބުނީ ވަރަށް ބައިވަރު ޓީމުތަކުން އޭނާއަށް އެކި ކަހަލަ ހުށަހެޅުންތައް ފޮނުވާފައިވާ ކަމަށެވެ.
