ބޭލް އަނބުރާ ޓޮޓެންހަމަކަށް ނާންނާނެ: ނޫނޯ

ކުރިއަށް އޮތް ސީޒަނަށް ވޭލްސްގެ ތަރި ގެރެތު ބޭލް އަނބުރާ ޓޮޓެންހަމް ހޮޓްސްޕާއަށް ނާންނާނެ ކަމަށް އެ ޓީމުގެ ކޯޗުގެ މަގާމާ ދާދި ފަހުން ހަވާލުވި ނޫނޯ އެސްޕިރީޓޯ ސަންޓޯ ބުނެފިއެވެ.

އުމުރުން 32 އަހަރުގެ ބޭލް ވަނީ މިދިޔަ ސީޒަނުގައި ލޯނު އުސޫލުން ޓޮޓެންހަމަށް ކުޅެފައެވެ. ޓޮޓެންހަމް ދޫކޮށް 2013 ވަނަ އަހަރު، އޭރު ދުނިޔޭގެ ރިކޯޑު އަގެއް ކަމަށްވާ 100 މިލިޔަން ޔޫރޯއަށް ރެއާލާ ގުޅުނު ބޭލް އަނބުރާ ޓޮޓެންހަމާ ލޯނު އުސޫލުން ގުޅުނުއިރު، މިދިޔަ ސީޒަނުގައި އޭނާ ވަނީ ޓޮޓެންހަމަށް ކުޅެދިން 34 މެޗުގައި 16 ލަނޑު ޖަހާފައެވެ. އެކަމަކު ލޯނު އެއްބަސްވުން ހަމަވުމުން ބޭލް ވަނީ އަނބުރާ ރެއާލަށް ބަދަލުވެފައެވެ.

ކުރިއަށް އޮތް ސީޒަނުގައިވެސް ޓޮޓެންހަމުގެ ޖާޒީގައި ބޭލް ފެނިގެންދާނެ ކަމަށް ބެލެވުނު ނަމަވެސް، ދާދި ފަހުން ދިން އިންޓަވިއުއެއްގައި ޓޮޓެންހަމުގެ ކޯޗު ނޫނީ ވަނީ ބޭލް އަނބުރާ ޓޮޓެންހަމަށް ނާންނާނެ ކަމަށް ބުނެފައެވެ.

ލޯނު އެއްބަސްވުން ހަމަވުމާއެކު ބޭލް އަނބުރާ ރެއާލަށް ބަދަލުވިއިރު، މީގެ ކުރިން ދިން އިންޓަވިއުއެއްގައި ބޭލް ވަނީ ޓޮޓެންހަމަށް ބަދަލުވުމުގެ ބޭނުމަކީ ދާއިމީ ގޮތެއްގައި މެޗުތަކެއް ކުޅެ، މި އަހަރު ބޭއްވި ޔޫރޯއަށް ތައްޔާރުވުން ކަމަށް ބުނެފައެވެ. އެހެންކަމުން އޭނާގެ ހަގީގީ ޕްލޭނަކީ މިދިޔަ ސީޒަނުގައި ޓޮޓެންހަމަށް ކުޅުމަށްފަހު، އަންނަ ސީޒަނަށް އެނބުރި ރެއާލަށް ދިއުން ކަމަށްވެސް ބޭލް އޭރު ވަނީ ބުނެފައެވެ.

ނަމަވެސް މި ފަހަރުގެ ޓްރާންސްފާ ބާޒާރުގައި ބޭލް ވިއްކާލަން ރެއާލުން މަސައްކަތްކުރަމުން އަންނަ ކަމަށް މީގެ ކުރިން ސްޕެއިނުގެ ބައެއް މީޑިއާތަކުން ވަނީ ރިޕޯޓުކޮށްފައެވެ. އެކަމަކު ރެއާލުގެ ކޯޗުގެ މަގާމުން ޒިނެދިން ޒިދާން ވަކިވެ، އެ ޓީމުގެ ކޯޗަކަށް ކާލޯ އަންޗެލޮޓީ ހަމަޖެއްސުމާއެކު އެ ނިންމުން ބަދަލުކުރުމުގެ ފުރުސަތު ބޮޑު ކަމަށްވެސް ރިޕޯޓުތައް ބުނެއެވެ.

މީގެ ކުރިން ރެއާލާއެކު ޖުމްލަ 12 ތަށި ބޭލް ހޯދާފައިވީ ނަމަވެސް، ރެއާލުގެ ކޯޗުގެ މަގާމުގައި ޒިދާން ހުރިއިރު ބޭލަށް މާ ގިނަ ފުރުސަތުތަކެއް ދީފައެއް ނުވެއެވެ. އެކަމަކު ބޭލް ވަނީ މީގެ ކުރިން އަންޗެލޮޓީގެ އިރުޝާދުގެ ދަށުން ރެއާލާއެކު ސްޕެނިޝް ކަޕާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕް ކާމިޔާބުކޮށްފައެވެ.