ގެޓާފޭއަކަށް ނުދާނަން: ބޭލް

ސްްޕެއިންގެ ގެޓާފޭއަށް ނުދާނެކަމަށް ވޭލްސްގެ ފޯވާޑް ގަރެތު ބޭލް ބުނެފިއެވެ.

ބޭލް، ގެޓާފޭއަށް ބަދަލުވެދާނެކަމުގެ ވާހަކަތައް މިދިޔަ ހުކުރު ދުވަހު ވަނީ ފެތުރިފައެވެ. ނަމަވެސް ބޭލް ވަނީ އެކަން ދޮގުކޮށްފައެވެ. ބޭލް ބުނީ ހަމަ ޔަގީނުންވެސް އޭނާ ގެޓާފޭއަށް ނުދާނެކަމަށެވެ. އަދި ކޮންމެ ކްލަބަކަށް އޭނާ ބަދަލުވިނަމަވެސް ދެފަރާތަށްވެސް ފައިދާވާނެކަމަށް ބޭލް ބުންޏެވެ. އެގޮތުން ކުރިއަށް އޮތް ވޯލްޑްކަޕްގެ ކުރިން ގިނަ މެޗުތަކެއް އޭނާއަށް ކުޅެން ލިބުމަކީ އޭނާއަށް އޮތް އެންމެ ބޮޑު ފައިދާގެ ގޮތުގައި ބޭލް ފާހަގަކުރިއެވެ.

ފާއިތުވި ދެތިން ސީޒަންގައިވެސް ބޭލްއަށް ގިނަ މެޗުތަކެއް ކުޅުމުގެ ފުރުސަތެއް ނުލިބުނެވެ. އަދި ރެއާލް މެޑްރިޑުން އޭނާ ބާކީކޮށްލާފައިވާކަމަށް ގިނަ ބަޔަކު އައީ ބުނަމުންނެވެ. ރެއާލްއާއެކު ބޭލް ހަދާފައިވާ އެއްބަސްވުމުގެ މުއްދަތު ހަމަވުމާއެކު މިހާރު އޭނާ ހުރީ ފްރީ އެޖެންޓެއްގެ ގޮތުގައި ބޭނުން ކްލަބަކާ ގުޅެވޭގޮތަށެވެ.

2007 ވަނަ އަހަރުން 2013 ވަނަ އަހަރަށް ޓޮޓެންހަމްގައި މޮޅު ކުޅުމެއް ދެއްކުމަށްފަހު ބޭލް ރެއާލްއަށް ބަދަލުވީ 2013 ވަނަ އަހަރުއެވެ. ޓޮޓެންހަމްގައި ބޭލް ވަނީ 146 މެޗު ކުޅެ 42 ލަނޑު ޖަހާފައެވެ. ރެއާލްއަށް ބަދަލުވުމަށްފަހުވެސް ފުރަތަމަ ދެތިން ސީޒަންގައި އޭނާ މޮޅު ކުޅުމެއް ދެއްކިއެވެ. ރެއާލްގައި 176 މެޗު ކުޅެގެން 81 ލަނޑު ބޭލް ޖެހިއެވެ.