ބޭލްއާއި ރެއާލްގެ ގުޅުން ރަނގަޅު: އަންޗެލޯޓީ

ސްޕެއިންގެ ރެއާލް މެޑްރިޑްއާއި އެޓީމުގެ ފޯވާޑް ގަރެތު ބޭލްގެ ގުޅުން ރަނގަޅުކަމަށް އެޓީމުގެ ކޯޗު ކާލޯ އަންޗެލޯޓީ ބުނެފިއެވެ.

ރެއާލްއިން ސްޕެނިޝް ލީގު ކާމިޔާބު ކުރި މެޗުގައި ބޭލް ދަނޑަށް ހާޒިރުވެފައެއް ނުވެއެވެ. އަދި ޗެމްޕިއަންސް ލީގުގެ ސެމީ ފައިނަލުގައި ފަހަތުން އަރާ މެންޗެސްޓަރ ސިޓީ ބަލިކޮށް ފައިނަލުގެ ޖާގަ ހޯދި މެޗުގައިވެސް ބޭލް ބައިވެރިނުވެއެވެ. ބޭލް މި މެޗުތަކަށް ހާޒިރު ނުވީ އަނިޔާގެ ސަބަބުންނެވެ.

ނަމަވެސް ގިނަ ބަޔަކު ގަބޫލުކުރާ ގޮތުގައި އޭނާ މި މެޗުތަކަށް ހާޒިރުނުވީ ޓީމާއެކު އުފާފާޅުކުރަން ބޭނުން ނުވާތީއެވެ. ޓީމުގެ ސަޕޯޓަރުންގެ ފަރާތުންވެސް ފާޑުކިއުންތައް އަމާޒުވެފައިވާ ބޭލް އާއި ރެއާލްގެ ގުޅުން އެހާ ރަނގަޅު ނޫންކަމަށް މީގެ ކުރިންވެސް އެތައް ފަހަރަކު އަޑުތައް ފެތުރުނެވެ. އަނެއްކޮޅުން އަނިޔާގެ ސަބަބުން މި މެޗުތަކަށް ބޭލް ހާޒިރު ނުވިއިރު، ޓީމުގައި އަނިޔާގެ ސަބަބުން މެޗު ނުކުޅެވުނު އެހެން ހުރިހާ ކުޅުންތެރިންވެސް މި ދެމެޗު ބެލުމަށް ދަނދަށް ދިޔައެވެ.

މިކަމާއި ގުޅޭ ގޮތުން ކޯޗު އަންޗެލޯޓީއަށް ސުވާލުތައް ކުރިމަތިވުމުން އޭނާ ބުނީ ޓީމާއި ބޭލްގެ ގުޅުން ރަނގަޅުކަމަށެވެ. އަދި ބޭލް ދަނޑަށް ހާޒިރުނުވީ އޭނާގެ އުނަގަނޑަށް ލިބިފައިވާ އަނިޔާގެ ސަބަބުން ހެލިފެލިވެ އުޅެން އުނދަގޫވުމުން ކަމަށްވެސް އަންޗެލޯޓީ ބުންޏެވެ.

ސްޕެނިޝް ލީގު ކާމިޔާބުކޮށްފައިވާ ރެއާލްއާއި އެތުލެޓިކޯ މެޑްރިޑް ލީގުގައި އާދީއްތަ ދުވަހުގެރޭ ބައްދަލުކުރާނެއެވެ. އަންޗެލޯޓީ ބުނީ މި މެޗަށް ނިކުންނައިރު ޓީމުގެ އެއްނަންބަރު ކީޕަރު ކޯޓުއާ ނުފެންނާނެ ކަމަށެވެ. ކޯޓުއާއަށް އަރާމުކުރަން ވަގުތު ދިނުމަށްފަހު އެމެޗުގެ ފުރަތަމަ 11 ން ބަދަލު ކީޕަރު އެންޑްރީ ލޫނިންއަށް ފުރުސަތުދޭން އަންޗެލޯޓި ވަނީ ނިންމާފައެވެ. އޭނާ ބުނީ ޓީމުގެ ސަމާލުކަން މިހާރު އޮތީ ޗެމްޕިއަންސް ލީގު ކާމިޔާބު ކުރުމަށް ކަމަށެވެ. އެހެންކަމުން ސްޕެނިޝް ލީގު މެޗުތަކުގައި ޓީމުގެ މުހިންމު ކުޅުންތެރިންނަށް އަރާމުކުރަން ވަގުތު ދޭނެ ކަމަށެވެ.