ނުވަ އަހަރަށްފަހު ރެއާލް ދޫކޮށްލަން ބޭލް ނިންމައިފި

ސްޕެއިންގެ ރެއާލް މެޑްރިޑަށް ކުޅެމުން އަންނަ ވޭލްސްގެ ވިންގަރ ގެރެތު ބޭލް އެ ކުލަބު ދޫކޮށްލަން ނިންމައިފިއެވެ.

ނުވަ އަހަރަށްފަހު ރެއާލް ދޫކޮށްލަން ނިންމިކަން ބޭލް އިއުލާންކުރީ ޓުވިޓާގައި އާންމުކުރި މެސެޖަކުންނެވެ. ބޭލް ބުނީ ކުރިން ރެއާލަށް ކުޅުނު ކުޅުންތެރިންނާއި، މަސައްކަތް ކުރި ކޯޗުން އަދި މިހާރުގެ ކުޅުންތެރިންނާއި ކޯޗަށް އޭނާ ޝުކުރު އަދާ ކުރާކަމަށެވެ. އަދި ބެކް ރޫމް ސްޓާފުންނާއި ޓީމުގެ އެންމެހައި ސަޕޯޓަރުންނަށް ވެސް ޝުކުރު އަދާ ކުރާ ކަމަށެވެ.

ބޭލް ބުނީ ޒުވާން ކުޅުންތެރިއެއްގެ ގޮތުގައި މީގެ ނުވަ އަހަރު ކުރިން ރެއާލާ ގުޅި އެ ޓީމަށް ކުޅުމަކީ އޭނާގެ ވަރަށް ބޮޑު ހުވަފެނެއް ކަމަށެވެ. އަދި ރެއާލްގެ ހުދު ޖާޒީގައި ސެންޓިއާގޯ ބެރްނެބުއޭ ގައި ކުޅުމާއި، ރެއާލާއެކު ތަށިތައް ކާމިޔާބުކުރުމުގެ އިތުރުން ޔުއެފާ ޗެމްޕިއަންސް ލީގު ހޯދުމަކީ އޭނާގެ ހުވަފެނަކަށްވި ކަމެއްކަމަށެވެ. އަދި މިހާރު އެ ހުވަފެން ހަގީގަތަކަށް ވެއްޖެކަމަށް އޭނާއަށް ބުނެވޭނެކަމަށެވެ.

މީގެ އިތުރުން ބޭލް ބުނީ ރެއާލްގެ ތާރީޚުގެ ބަޔަކަށް އޭނާވުމާއި، ރެއާލްގެ ކުޅުންތެރިއެއްގެ ގޮތުގައި ހުރެ ލިބުނު ހުރިހާ ކާމިޔާބަކީ އޭނާއަށް ހަނދާނުން ނައްތާނުލެވޭނެ ތަޖުރިބާއެއްކަމަށެވެ. އަދި އޭނާ ރެއާލަށް ކުޅުމުގެ ފުރުސަތު ދިން ކަމަށްޓަކައި ރެއާލްގެ ރައީސް ފްލޮރެންޓިނޯ ޕެރޭޒް، ޖޯސް އެންހެލް ސަންޗޭޒް އަދި އެ ކުލަބުގެ ބޯޑަށް ޝުކުރު އަދާ ކުރާކަމަށެވެ. އަދި އެންމެން ގުޅިގެން ކުލަބުގެ ތާރީޚާއި ފުޓުބޯޅައަށް އަބަދަށް ހުންނާނެ އަގުހުރި ހަނދާންތަކެއް އުފެއްދުނު ކަމަށެވެ.

އުމުުރުން 32 އަހަރުގެ ބޭލް ރެއާލާ ގުޅުނީ 2013 ވަނަ އަހަރުއެވެ. އޭނާ ރެއާލަށް ބަދަލުވީ ޓޮޓެންހަމްގައި ހުރުމަށްފަހުއެވެ. ރެއާލަށް ބަދަލުވި ފަހުން 2020 ވަނަ އަހަރު ބޭލް ވަނީ ލޯނު އެއްބަސްވުމެއްގެ ދަށުން ޓޮޓެންހަަމަށް ކުޅެފައެވެ. ރެއާލާއެކު ހޭދަކުރި މުއްދަތުގައި އޭނާ ވަނީ އެ ޓީމަށް 258 މެޗު ކުޅެދީ 106 ލަނޑު ޖަހާފައެވެ. އަދި އޭނާ ވަނީ އެ ޓީމާއެކު 16 ތައްޓެއް ހޯދާފައެވެ. އޭގެ ތެރޭގައި ސްޕެނިޝް ލީގު ތިން ފަހަރު، ކޮޕަ ޑެލްރޭ އެއް ފަހަރު، ސްޕެނިޝް ސުޕަ ކަޕް އެއް ފަހަރު، ޔުއެފާ ޗެމްޕިއަންސް ލީގު ފަސް ފަހަރު، ޔުއެފާ ސުޕަ ކަޕް ތިން ފަހަރު އަދި ފީފާ ކުލަބް ވޯލްޑް ކަޕް ތިން ފަހަރު ކާމިޔާބުކުރުން ހިމެނެއެވެ.