މެންޗެސްޓަރ ސިޓީއަށް ކުޅެމުން އަންނަ ރަހީމް ސްޓަރލިން، ޗެލްސީއަށް ބަދަލުވާން އެއްބަސްވެއްޖެކަމަށް ރިޕޯޓުތައް ބުނެފިއެވެ.
ޗެލްސީއަށް ބަދަލުވާން ސްޓަރލިން އެއްބަސްވިނަމަވެސް، އޭނާގެ ޓްރާންސްފަރ ފީގެގޮތުގައި ޗެލްސީން ސިޓީއަށް ދައްކާނެ އަދަދެއް މިހާތަނަށް ހަމަޖެހިފައިނުވާކަމަށް ރިޕޯޓުތައް ބުނެއެވެ. ނަމަވެސް ޓްރާންސްފަރ ފީއާގުޅޭ މަޝްވަރާތައް ދެކްލަބުގެ މެދުގައި ކުރިއަށްދާކަމަށް ބޭރުގެ މީޑިއާތަކުން ވަނީ ރިޕޯޓުކޮށްފައެވެ.
ލިވަރޕޫލްއަށް ކުޅުމަށްފަހު ސްޓަރލިން ސިޓީއަށް ބަދަލުވީ 2015 ވަނަ އަހަރުއެވެ. ސިޓީއާ ގުޅުމަށްފަހު އޭނާ ވަނީ ކުޅުނު 225 މެޗުގައި 91 ލަނޑު އެޓީމަށް ކާމިޔާބުކޮށްދީފައެވެ. ސިޓީއާއެކު ސްޓަރލިން ހަދާފައިވާ އެއްބަސްވުމުގެ މުއްދަތު ހަމަވާނީ މިއަންނަ އަހަރުއެވެ.
ރިޕޯޓުތައް ބުނާ ގޮތުން ކުރިއަށް އޮތް ދެތިން ދުވަހުގެ ތެރޭގައި ދެކްލަބުން މަޝްވަރާކުރުމަށްފަހު ޓްރާންސްފަރ ފީއެއް ކަނޑައަޅައި، ސްޓަރލިންގެ ޑީލް ނިންމާނެއެވެ. އުމުރުން 27 އަހަރުގެ ސްޓަރލިން ޓީމު ދޫކޮށްލަން ނިންމި މައިގަނޑު ސަބަބަކީ މިއަހަރުގެ ފަހުކޮޅު އޮންނަ ފީފާ ވޯރލްޑް ކަޕް ފެށެންވާއިރަށް ގިނަ މެޗުތަކެއް ކުޅުންކަމަށް ރިޕޯޓުތައް ބުނެއެވެ. ހާލަންޑް ފަދަ ފާހަގަކޮށްލެވޭ ފޯވާޑުން ސިޓީއަށް ގެންދިއުމާއެކު ސްޓަރލިންއަށް ޓީމުގެ ފުރަތަމަ 11ން ޖާގަ ލިބުން ދުރެވެ.
