ވެލާނާ އިންޓަރނޭޝަނަލް އެއަރޕޯޓުގައި ތަރައްގީކޮށްފައިވާ ކޯޑްއެފް ރަންވޭ މިއަހަރުގެ ފަހު ކުއާޓަރގައި ބޭނުންކުރަން ފަށާނެކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޑެޕިއުޓީ މެނޭޖިންގ ޑިރެކްޓަރ އިބްރާހީމް ތޯހާ ވިދާޅުވެއްޖެއެވެ.

އައު ސީޕްލޭންޓަރމިނަލްގެ މަސައްކަތްތައް ދައްކާލުމަށް ނޫސްވެރިންނާއެކު ބޭއްވި ޓުއަރގައި ނޫސްވެރިންގެ ސުވާލުތަކަށް ޖަވާބުދެއްވަމުން ތޯހާ ވިދާޅުވީ، އެންމެ ބޮޑު އަމާޒަކީ އައު ރަންވޭ މިއަހަރު ނިމުމުގެ ކުރިން ބޭނުންކުރަން ފެށުން ކަމަށެވެ. ކުންފުނީގެ ޕްލޭނަކީ މިއަހަރުގެ ފަހު ކުއާޓަރގައި އައު ރަންވޭ ބޭނުންކުރަން ފެށުން ކަމަށާއި، އައު ސީޕްލޭން ޓަރމިނަލްގައި ކުރިއަށް ގެންދާ ޓްރަޔަލްތައް ނިމުމާއެކު ޓީއެމްއޭގެ ހުރިހާ މޫވްމަންޓްސްތަކެއް އައު ޓަރމިނަލަށް ބަދަލުވެގެންދާނެ ކަމަށެވެ.

ތޯހާ ވިދާޅުވީ އޭވިއޭޝަނަކީ ވަރަށް ބައިވަރު ރެގިއުލޭޓަރީ ރިކުއަރމެންޓްސް އަދި ސެކިއުރިޓީ ރިކުއަރމެންޓްސްތަކެއް ފުރިހަމަކުރަންޖެހޭ ކަމެއް ކަމަށާއި، އެ ހުރިހާކަމެއް ފުރިހަމަކުރުމަށް މަސައްކަތް ކުރަމުން އަންނަކަމަށެވެ. އަދި ރެކްރޫޓްކުރާ ސްޓާފުންނާއި އަދި އޮޕަރޭޓަރުންގެ ސްޓާފުންނަށް މި ފެސިލިޓީއަށް ފެމިލިއަރައިޒްކޮށްދީ، އައު ޓަރމިނަލް ބޭނުންކުރަން ދަސްކުރުމާއި ޓްރެއިނިންގަށް ވަގުތުނަގާނެ ކަމަށެވެ. އޭނާ ވިދާޅުވީ މި ހުރިހާކަމެއް ނިމި އިރާދަކުރެއްވިއްޔާ ވަރަށް ކައިރި މުސްތަގުބަލެއްގައި އެއްކޮށް އައުޓަރމިނަލް ބޭނުންކުރަން ފެށޭނެ ކަމަށެވެ.

ނޫސްވެރިންނާ ވާހަކަ ދައްކަވަމުން އެމްއޭސީއެލްގެ ޗީފް ޑިވަލަޕްމަންޓް އޮފިސަރ މުހައްމަދު ސޮލާހު ވިދާޅުވީ އެންމެ ބޮޑު ބޭނުމަކީ ރަންވޭ އޮޕަރޭޝަނަށް ގެނައުން ކަމަށެވެ. އަދި މިހާރު ކުރަނީ ރަންވޭގެ ނެވިގޭޝަން ލައިޓްތަކުގެ މަސައްކަތް ކަމަށެވެ.

ރަންވޭ ބޭނުންކުރެވެން އަންނަނީ މިހާރު ބޭނުންކުރަމުންދާ ސީޕްލޭން ޓަރމިނަލް އެތަނުން ބަދަލުކުރެވިގެންނެވެ. އަލަށް ހެދި، ރަންވޭ ހުޅުވާފައި ވަނީ 2018 ވަނަ އަހަރުގެ ސެޕްޓެމްބަރު މަހުގެ 5 ވަނަ ދުވަހުއެވެ. އިއްތިހާދުގެ އޭ 380 ބޯޓެއް ޖައްސައި، އައު ރަންވޭ ހުޅުވި ނަމަވެސް އޭގެ ފަހުން މިހާތަނަށް އެ ރަންވޭ ބޭނުން ކޮށްފައެއް ނުވެއެވެ. ސަބަބަކީ ރަންވޭއާއެކު ނިންމަން ޖެހޭ އެހެން ކަންކަން ނުނިމި ހުރުމުންނެވެ.

އައު ރަންވޭ ހަދާފައިވަނީ ޗައިނާގެ އެގްޒިމް ބޭންކުން 373 މިލިއަން ޑޮލަރުގެ ލޯނެއް ނަގައިގެންނެވެ. އެ މަސައްކަތް ހަވާލުކޮށްފައި ވަނީ ޗައިނާގެ ބީޔޫސީޖީއާއެވެ.