ކްރިމިނަލް ކޯޓަށް ގާޒީއަކު ހޯދަނީ
ކްރިމިނަލް ކޯޓުގެ ގާޒީއެއްގެ އަސާސީ މުސާރައަކީ މަހަކު 30,000.00 ރުފިޔާ
ކްރިމިނަލް ކޯޓް
ކްރިމިނަލް ކޯޓަށް ގާޒީއަކު ހޯދުމަށް ޖުޑީޝަލް ސަރވިސް ކޮމިޝަން (ޖޭއެސްސީ)ން އިއުލާނުކޮށްފިއެވެ.
ޖޭއެސްސީން ބުރާސްފަތި ދުވަހު ވަނީ އެ މަގާމަށް ޝައުގުވެރިވާ ފަރާތްތަކުން 10 އޮގަސްޓް 2022ގެ 13:00ގެ ކުރިން އީމެއިލް މެދުވެރިކޮށް، ފަނޑިޔާރުކަމަށް އެދި ހުށަހަޅާ ފޯމާއި ލިޔުންތައް ކޮމިޝަންގެ ރަސްމީ އީމެއިލް އެޑްރެހަށް ލިއުންތައް ފޮނުއްވުމަށް އެދިފައެވެ.
ކްރިމިނަލް ކޯޓުގެ ގާޒީއެއްގެ އަސާސީ މުސާރައަކީ މަހަކު 30,000.00 ރުފިޔާއެވެ. ލިވިންގ އެލަވަންސް ގޮތުގައި މަހަކު 15,000.00 ރުފިޔާ ލިބޭއިރު، ރިސްކް އެލަވަންސަކީ މަހަކު 3,300.00 ރުފިޔާއެވެ. ހަމައެއާއެކު ގާނޫނު ނަންބަރު 2010/13 (ދިވެހިރާއްޖޭގެ ފަނޑިޔާރުންގެ ގާނޫނު)ގައި ވާ ގޮތުގެ މަތިން، ރައްޔިތުންގެ މަޖިލީހުން ކަނޑައަޅާފައިވާ ގޮތުގެ މަތިން މެޑިކަލް އެލަވަންސްއާއި ފޯނު އެލަވަންސްވެސް ލިބިދެއެވެ.
ކްރިމިނަލް ކޯޓަށް ފަނޑިޔާރަކު ހޯދުމަށް އިއުލާނުކޮށްފައި މިވަނީ، އެ ކޯޓުގެ ފަނޑިޔާރު ކަމުގައި ހުންނެވި ދީބާނާޒް ފަހުމީ ހައިކޯޓަށް އައްޔަނުކުރެއްވުމާ ގުޅިގެންނެވެ.
