19 އޯގަސްޓް 2022 ގައި ބޭއްވުމަށް ހަމަޖެހިފައިވާ އެމްޑީޕީ ކޮންގްރެސް 2022 ގައި ބައިވެރިވެވޭނީ، 15 ޖުލައި 2022 ގެ ނިޔަލަށް އުފައްދާފައިވާ ގޮފިތަކުގެ ރައީސުންނަށް ކަމަށް އެޕާޓީން ބުނެފިއެވެ.
ގޮފި އުފެއްދުމާއި މިހާރު ހުރި ގޮފިތައް އިސްލާޙު ކުރުމަށް ދީފައިވާ މުއްދަތު 15 ޖުލައި 2022 ވާ ބުދަ ދުވަހަށް ހަމަވާނެއެވެ. އެމްޑީޕީން ބުނީ މިމުއްދަތުގެ ތެރެއަށް ރަސްމީ ބަންދު ދުވަސްތަކެއް ވަންނާތީ މިބަންދު ދުވަސްތަކުގައި ހުށަހަޅާ ގޮފި ފޯމުތަކުގެ ޕީޑީއެފް އަދި ގޮފި ލިސްޓުތަށް އެކްސެލް ފޯމެޓުގައި [email protected] އަށް ހުށަހެޅޭނެ ކަމަށެވެ.
ހުށަހަޅާ ގޮފި ފޯމްތަކުގެ އަސްލު 17 އަދި 18 ޖުލައި 2022 ގެ މެންދުރު 1:30 ގެ ކުރިން ހުށަހެޅުމަށާއި އޭގެ ފަހުން ހުށަހެޅި ނަމަވެސް ބަލައި ނުގަނެވޭނެ ކަމަށް އެމްޑީޕީން ބުނެއެވެ. އެމްޑީޕީގެ ކޮންގްރެސް ބާއްވަނީ 19ން 21 އޯގަސްޓް 2022 އަށެވެ.
އެމްޑީޕީން ބުނީ 29 މެއި 2022 ގައި ބޭއްވި އެޕާޓީގެ ޤައުމީ މަޖިލީހުގެ މިދައުރުގެ 4 ވަނަ ޖަލްސާގައި ފާސްކޮށްފައިވާ ގަރާރުގައިވާ ބުނެފައިވާ ގޮތުން އެމްޑީޕީގެ މެންބަރުންގެ ގޮތުގައި ބަލަމުންދާ ޕާޓީގެ ދަފުތަރުގައި އެހެނިހެން ސިޔާސީ ޕާޓީތަކުގެ މެންބަރުން ހިމެނިފައިވުމުގެ ސަބަބުން އެ ޕާޓީގެ އިންތިހާބުތަކާއި ޕްރައިމަރީތަކުގައި އެ ޕާޓީއާއި ވާދަކުރާ ޕާޓީތަކުގެ މެންބަރުންނަށް ފަހިވާގޮތަށް ކެންޑިޑޭޓުން ހޮވުމުގެ ފުރުސަތު އޮތުމާއި، އެ ޕާޓީއަށް މާލީ އެއްވެސް މަންފާއެއް ނުކުރާގޮތަށް ހަމައެކަނި އިންތިހާބުތަކުގައި އެތައް ހާސް ބަޔަކު އެބަތިބި ކަމަށެވެ.
އެގޮތުން އެމްޑީޕީގެ އަސާސީ ގަވާއިދުގެ 19 ވަނަ މާއްދާގެ (ހ) ގައި ޕާޓީގެ މެންބަރުކަން ބާތިލްވަނީ ޕާޓީގެ މެންބަރު އެމްޑީޕީ ފިޔަވައި އެހެން ސިޔާސީ ޕާޓިއެއްގައި ބައިވެރިވުމުން އަދި އެހެން ސިޔާސީ ޕާޓީއެއްގައި ހަރަކާތެރިވުމުން ކަމަށާއި ސިޔާސީ ޕާޓީގެ މެންބަރަކަށް ނުހުރެވޭނެކަމަށް އޮންނާތީވެ މިވަގުތު އެމްޑީޕީއިން ބަލަހައްޓަމުން ގެންދާ ދަފްތަރުގައި ހިމެނޭ އިލެކްޝަންސް ކޮމިޝަންގެ އެމްޑީޕީގެ ދަފްތަރުގައި ހިމެނޭ 54،599 މެންބަރުންނަކީ އެމްޑީޕީގެ ރަސްމީ ދަފްތަރުކަމަށް ބަލައި، ދެންތިބި 39،911 މީހުންނަށް އެމްޑީޕީގެ މެންބަރުކަން ސައްހަކުރުމަށް ތިންމަސް ދިނުމަށާއި، މީގެ ތެރެއިން އިލެކްޝަންސް ކޮމިޝަންގައި އެހެންޕާޓީއެއްގެ ރަޖިސްޓްރީގައިވާ މީހުން އެމްޑީޕީން ވަކިކުރުމަށް ގަރާރުގައި ބުނެފައިވާ ކަމަށެވެ.
އަދި އެމްޑީޕީގެ އެއްވެސް މަގާމެއްގައި ހުރި މެންބަރަކު ނަމަ އެއްމަސް ދުވަސްތެރޭގައި މެންބަރޝިޕް ސައްހަ ކުރުމަށައި، މީގެ އިތުރުން ކުރިއަށް އޮތް އެމްޑީޕީގެ ކޮންގްރެސްގެ ބައިވެރިންނަށް ވެވޭނީ 30 ޖޫންގެ ނިޔަލަށް އީސީގެ ދަފްތަރުގައި ހިމެނޭ މެންބަރުންނަށާއި، އަދި އީސީގެ ދަފްތަރުގައި ހިމެނޭ މެންބަރުން ހިމަނައިގެން އުފައްދާ ގޮފިތަކުގެ ރައީސުންނަށް ކަމަށް މި ގަރާރުގައި ބުނެފައިވާކަމަށެވެ.
މީގެއިތުރުން އެމްޑީޕީގެ އަސާސީ ގަވާއިދުގެ 15 ވަނަ މާއްދާގެ (ށ) ގައިވާ ގޮތުގެ މަތިން މެންބަރުކަން ގަބޫލުކޮށް 18 ވަނަ މާއްދާގައި ބުނާ ހައްގުތައް ލިބޭނީ އިލެކްޝަންސް ކޮމިޝަންގައި އޮންނަ އެމްޑީޕީ ދަފްތަރުގައި ރަޖިސްޓްރީ ކުރުމުން ކަމަށް މި ގަރާރުގައި ބުނެފައިވާކަމަށެވެ.
އެމްޑީޕީގެ ކޮންގްރެސް އޮގަސްޓް މަހު ބޭއްވުމަށް އެ ޕާޓީގެ ގައުމީ މަޖިލީހުން ނިންމާފައިވަނީ މިއަހަރުގެ ފެބްރުއަރީ މަހުގެ 10ގައި ބޭއްވި އެމްޑީޕީ ގައުމީ މަޖިލީހުގެ 4ވަނަ ދައުރުގެ 2ވަނަ ޖަލްސާގައެވެ.
