އުދައްޔުގެ މަރު: ހިތުގެ މައި ލޭހޮޅިއެއް ކަފައިގެން ގޮސް، 1345 މިލިލީޓަރުގެ ލޭ ފުއްޕާމެއަށް އެޅިފައި

ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައިގައި ދައުވާ އުފުލާފައިވާ ފަރާތްތަކުގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ. 

މި މައްސަލައިގައި ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވަނީ ގއ. މާމެންދޫ، ރިހިފަރުދާގެ، އަޙުމަދު ޝަމީމްއާއި، ގއ. މާމެންދޫ، ބިލަތްމާގެ، ޝަރަފު ރަޝީދުއާއި، ގއ. މާމެންދޫ، ގުލްފާމުގެ، މުޙައްމަދު މާޒިންގެ މައްޗަށެވެ. އެމީހުންގެ މައްޗަށް ވަނީ މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާވެސް އުފުލާފައެވެ.

Advertisement

މި އަޑުއެހުމުގައި އެންމެ ފުރަތަމަ ހާޒިރުކުރީ ޑރ ހަސަން އުމަރެވެ. އެއީ މި މައްސަލައިގެ ޕޯސްޓް މޯޓަމް ރިޕޯޓާއި ގުޅިގެން ހެކިބަސް ދެއްވުމަށެވެ.

ހެކިވެރިޔާ ވަނީ އުދައްޔުއަށް ލިބިފައިވާ ޒަޚަމްތަކާއި ގުޅޭގޮތުން ވާހަކަ ދައްކަވާފައެވެ. އެގޮތުން ފުރާނައަށް ނުރައްކާވާ ގޮތަށް ހުރި އެންމެ ބޮޑު ޒަޚަމަކީ ހަށިގަނޑުގެ ފުރަގަހުން މެޔާއި ދިމާއަށް (މިޑްލައިންއިން 5 ސެންޓިމީޓަރަށް އަދި ކަރުން ފެށިގެން 13.5 ސެންޓިމީޓަރު ތިރިއަށް) ލިބިފައިވާ ޒަޚަމްކަމަށް އޭނާ ވިދާޅުވިއެވެ.

ހެކިވެރިޔާ ވިދާޅުވީ، އުދައްޔުގެ މޭކަށިތަކުގެ ދޭތެރެއިން ގޮސްފައިވާ މި ޒަޚަމުގެ ސަބަބުން ހިތުގެ މައިނާރު (އައޯރޓާ) ގެ ތިރިން އޮންނަ މައި ލޭހޮޅި ކަފައިގެން ގޮސްފައިވާ ކަމަށެވެ. އެކަމުގެ ސަބަބުން 1345 މިލިލީޓަރުގެ ލޭ ފުއްްޕާމޭގެ ތެރެއަށް އެޅިގެން ގޮސްފައިވާކަން ހެކިވެރިޔާ ފާހަގަ ކުރެއްވިއެވެ.

މިއީ އެކަށީގެންވާ ފަރުވާ ނުދެވިއްޖެނަމަ 10 ވަރަކަށް މިނެޓު ތެރޭގައި މީހާގެ ފުރާނަ ގޮސްދާނެ ފަދަ ޒަޚަމެއްކަން ހެކިވެރިޔާ ފާހަގަކުރެއްވިއެވެ.

އޭގެ އިތުރުންވެސް އުދައްޔުއަށް ގިނަ ޒަޚަމްތައް ލިބިފައިވެއެވެ.

މި އަޑުއެހުމުގައި އިތުރު ހެއްކެއް ހާޒިރުވެފައެއް ނުވެއެވެ. އެގޮތުން ދައުލަތުން ހުށައަޅާފައިވާ 2 ޑޮކްޓަރެއް މިހާރު ރާއްޖޭގައި ނޫޅޭ ކަމަށާއި، އެމީހުންގެ ހެކިބަސް ނުނަގައި ކުރިއަށް ދިއުމާމެދު އިއުތިރާޒެއް ނެތްކަމަށް ދައުލަތުން ބުނެއެވެ. އަދިި ދެން ހިމެނޭ ޑޮކްޓަރުންނަށް އިމަރޖެންސީއެއް ދިމާވެފައިވާތީ މި އަޑުއެހުމަށް ހާޒިރު ނުވެވުނީކަން ދައުލަތުން ފާހަގަކުރިއެވެ.

މައްސަލަ ބައްލަވާ ގާޒީ އަލީ ނަދީމް ވިދާޅުވީ، ދެން މި މައްސަލައިގައި އަޑުއެހުމެއް އޮންނާނީ އަންނަ އޯގަސްޓު މަހުގެ ތެރޭގައެވެ. އަދިވެސް ދައުލަތުގެ 6 ހެއްކެއްގެ ހެކިބަސް ނުނެގި އެބައޮތެވެ.