އަމިއްލަ ވަޒަނުގައި ގެދޮރު ގެއްލި، ޢީދުގެ އުފަލުން މަޙްރޫމްވެފައިވާ ޞާލިޙްގެ ހިތުގެ ޝަކުވާ!

ދިގުލާ ދިޔަ ހަނގުރާމައާއި ހަމަނުޖެހުންތަކުގެ ސުންނާފަތިވެފައިވާ އިރާޤުގެ ސުލައިމާނިއްޔާއޭ ކިއުނު އަވަށުގައި އަޅާފައިވާ ވަޤުތީ މިސްކިތުގެ ޖަމާއަތުގައި ޢީދު ނަމާދުކޮށް ނިންމާލުމަށްފަހު، ގެދޮރު ގެއްލިފައިވާ، ޢުމުރުން 50 އަހަރުގެ ޤާސިމް ޞާލިޙް އިނީ ހެނދުނުގެ ނާސްތާއަށް އިންސާފު ކުރާށެވެ. އަޟްޙާ ޢީދެއް ކަމަކު، ނާސްތާގައި މާ ބޮޑު ހާއްސަކަމެއް ނެތެވެ. އާދައިގެ ކޭމެކެވެ. އަޝްތީ ކޭމްޕުގައި ދިރިއުޅެމުންދާ ޞާލިޙް ބުނާ ގޮތުގައި، މިއީ ކުރީގެ ޢީދުތަކާ ގާތްވެސް ކުރާ ވަރުގެ ކަމެއް ނޫނެވެ.

ޞާލިޙް ނިސްބަތް ވަނީ ޔަޘްރިބުގެ ޞަލާހުއްދީންއޭ ކިއުނު ޕްރޮވިންސްގެ ކުޑަ އަވަށަކަށެވެ. ނަމަވެސް ސަލާމަތާއި ރައްކާތެރިކަން ކަށަވަރު ކުރުމަށްޓަކާ، ހުރިހާ އެއްޗެއް ދޫކޮށް، ހަމަ އެކަނި 2 އަނބިންނާއި ދަރިންކޮޅު ގޮވައިގެން ޞާލިޙް ނުކުތީ 2014 ވަނަ އަހަރުއެވެ.

މިއަދު ނިކަމެތި ހާލުގައި އުޅެން ޖެހިފައިވާ ޞާލިޙްގެ ހަނދާނުގައި، މީގެ ކުރީގެ ޢީދުގެ އުފާވެރި މަންޒަރުތައް ތާޒާވަމުން ދެއެވެ. އަމިއްލަ ވަޒަނުގައި ދުރުތާ ތިމާގެ މީހުންނާވެސް އެކުވެގެން އުފާ ކުރި ދުވަސްވަރުގެ ހަނދާންތަކެވެ. ޢީދަށް ހާއްސަ ބިސްކޯދު ފިހުމާއި، އުޟްޙިޔާ ކަތިލުމާއި، މުޅި އަވަށަށް ދަޢުވަތު ދީ އުޅުނު އުފާވެރި ހަނދާންތަކެވެ. ނަމަވެސް މިއަދު ޞާލިޙް ދިރިއުޅެމުން ދަނީ އެ ހުރިހާ ކަމަކާ ދުރުގައެވެ. އުޟްޙިޔާ ކަތިލާނެ ފަދަ ތަނަވަސްކަމެއްވެސް މިއަދު އޭނާގެ އަތުގައި ނެތެވެ. 13 ދަރިންގެ ބައްޕަ، ޞާލިޙްގެ އުފަލަށް، އޮތް ހާވެސް އެއްޗަކީ، މާޒީވި ޢީދުގެ ފޮނި ހަނދާންތަކެވެ.

ކަން މިހެން އޮތް އިރު، އެ ދިރިއުޅުމަށް ރުޖޫއަވުމަކަށް އަދުގެ ހާލަތު ތަނެއް ނުދެއެވެ. އެންމެ ބޮޑު ހުރަހަކަށް ވަނީ އިޤްތިޞާދީ ތަކުލީފުތަކެވެ. ޞާލިޙްގެ މިއަދުގެ ހުރިހާވެސް އުއްމީދެއް ގުޅިފައި ވަނީ އިރާޤުގެ ސަރުކާރާއެވެ. އޭނާގެ އެދުމަކީ، އިރާޤުގައި ސަރުކާރެއް އެކުލަވާލެވި، ގެދޮރު ގެއްލިފައިވާ މީހުންގެ އިހުސާސްތައް ސަރުކާރަށް ފަހުމްވުމެވެ.  

ޞާލިޙްގެ 3 އަހަރަށް ދާ ދަރިފުޅު އުފަންވީވެސް ރެފިއުޖީ ކޭމްޕަށެވެ. އެ ދަރިފުޅުގެ އުފަން ފަސްގަނޑުގައި ދިރިއުޅުމުގެ ނަޞީބު ލިބިފައި ނުވާ އިރު، އެ ހިސާބަށް ދެވޭނެ ދުވަހެއްވެސް ނޭނގެއެވެ. އެ ދަރިންގެ މުސްތަޤުބަލާމެދު ސުވާލު މާކު ޖެހިފައި އޮތް އޮތުމަކީ، އަމިއްލަ ވަޒަނުގައި ގެދޮރު ގެއްލި، ޢީދުގެ އުފަލުން މަޙްރޫމްވެފައިވާ ޞާލިޙްގެ ހިތާ ހިތުން ކުރަމުންދާ އެންމެ ބޮޑު އެއް ޝަކުވާއެވެ.