ފުރަތަމަ ހާފްގައި ސަސްއިން ކުރި ހޯދާފައިވަނިކޮށް, ފަހަތުން އަރާ ދެ ލަނޑު ޖަހައިގެން މޮޅުވެ, ދިވެހި ޕްރިމިއަރ ލީގު ތާވަލްގެ ތިންވަނައަށް ވެލެންސިޔާ ޖެހިލައިފިއެވެ.

ހޮނިހިރު ދުވަހުގެ ރޭ ކުޅުނު މެޗު ވެލެންސިޔާ ކާމިޔާބުކުރީ 2-1 ނެވެ. ފުރަތަމަ ހާފް ނިމުނުއިރު 1-0 ން ކުރީގައި އޮތީ ސުޕަރ ޔުނައިޓެޑް ސްޕޯރޓްސް (ސަސް) އެވެ. އެޓީމަށް ލަނޑު ޖަހައިދިނީ ޒުވާން ކުޅުންތެރިޔާ އަހުމަދު އައިހަމްއެވެ. ވެެލެންސިޔާގެ ފުރަތަމަ ލަނޑު ދެވަނަ ހާފް ފަށައިގެން ފަސްވަނަ މިނިޓްގައި ޖެހީ ހަލީލް ޖަމާލް އެވެ. އޭގެ ފަސް މިނިޓްފަހު ކުރި ހޯދައިދިނީ އަބުދުالله ޔާމީނު (ޔާނު) އެވެ.

މިމޮޅާއެކު ވެލެންސިޔާއަށް ތިންވަނަ ލިބެނީ 15 މެޗުން 22 ޕޮއިންޓް ހޯދައިގެންނެވެ. ވެލެންސިޔާގެ ފަހަތުގައި އޮތީ 20 ޕޮއިންޓާއެކު ޓީސީއާއި, ޔުނައިޓެޑް ވިކްޓްރީއެވެ. ދެވަނާގައި އޮތް އީގަލްސްއާ ވެލެންސިޔާއާ ދެމެދު 15 ޕޮއިންޓްގެ ފަރަޤެއް އެބައޮތެވެ.