ޝަންގްރިއްލާގެ ހިއްސާ ދޫކޮށްލެވޭ ގޮތަށް ގާނޫނަށް ގެނައި އިސްލާހު ފާސްކޮށްފި
ޝަންގްރިއްލާގައި ސަރުކާރުގެ 30 އިންސައްތަ ހިއްސާ އޮވޭ
އައްޑޫ ސިޓީގައި އޮންނަ ޝަންގްރިއްލާ ރިސޯޓް
ސަރުކާރުގައި އޮތް ޝަންގްރިއްލާ ރިސޯޓުގެ 30 އިންސައްތަ ހިއްސާ ދޫކޮށްލެވޭގޮތަށް ޓުއަރިޒަމް ޤާނޫނަށް ހުށަހެޅި އިސްލާހާއެކު، ދިވެހިރާއްޖޭގެ ޓުއަރިޒަމާއި ބެހޭ ގާނޫނަށް ގެނައި އިސްލާހު ރައްޔިތުންގެ މަޖިލީހުން ފާސްކޮށްފިއެވެ.
ޓުއަރިޒަމާއި ބެހޭ ގާނޫނަށް ގެނައި އައު އިސްލާހުގެ ސަބަބުން ސަރުކާރުގެ ހިއްސާ އޮންނަ ރިސޯޓްތަކުގެ ހިއްސާ ސަރުކާރުން ބޭނުންނަމަ ދޫކޮށްލެވޭނެއެވެ. އައްޑޫ ސިޓީގެ ޝަންގްރިއްލާ ރިސޯޓުގައި ސަރުކާރުގެ 30 އިންސައްތަ ހިއްސާ އޮތުމާއެކު، އެ ރިސޯޓް ނުހުޅުވި ގިނަ ދުވަސްވެގެން ދިއުމުގެ ސަބަބުން ސަރުކާރަށް ބޮޑު ބުރައެއް އުފުލަން ވަނީ ޖެހިފައެވެ.
30 އިންސައްތަ ހިއްސާ ބަދަލުކުރުމުގެ މަސައްކަތް ކުރުމަށް މަޖިލީހުން ޓުއަރިޒަމް ގާނޫނަށް ގެނައި 10 ވަނަ އިސްލާހުގެ އަލީގައި ޓުއަރިޒަމް މިނިސްޓްރީން މަސައްކަތް ފެށި ނަމަވެސް އެ ފޯމިއުލާގެ އަލީގައި އެ ރަށުގެ ސައިޒް ބޮޑުކަމުން 80 މިލިއަން ވަރު ޝެއަރ ބަދަލުކުރުމަށް އަރައެވެ. އެހެންކަމުން ޓުއަރިޒަމް ގާނޫނަށް ގެނައި 11 ވަނަ އިސްލާހުގެ ދަށުން 30 އިންސައްތައް ހިއްސާ އައްޑޫ އިންވެސްޓް ޕްރައިވެޓް ލިމިޓެޑަށް ގަނެވޭނެކަހަލަ ގޮތަކަށް މަގުފަހިވެގެންދާނެއެވެ.
މިކަން މަގުފަހިވާ ގޮތަށް ޓުއަރިޒަމާއި ބެހޭ ގާނޫނަށް ކޮމިޓީން އިތުރު ކުރި އިސްލާހަކީ މި ގާނޫނުގެ 6 ވަނަ މާއްދާގެ (ޅ) ގެ ފަހަތަށް 6 ވަނަ މާއްދާގެ (ކ) ގެ ގޮތުގައި އަކުރެއް އިތުރުކޮށް، އެ އިސްލާހު ބިލުގައި ހިމެނުމަށެވެ.
މި އިސްލާހުގައި ބުނެފައިވަނީ ފަތުރުވެރިކަމުގެ ބޭނުމަށް ތަރައްގީކުރުމަށް ސަރުކާރުން ކުއްޔަށް ދޫކޮށްފައިވާ ރަށެއްގައި ނުވަތަ ފަޅެއް ނުވަތަ ބިމެއްގައި ކޮށްފައިވާ އިންވެސްޓްމަންޓް ވިއްކާލަން ބޭނުންވެއްޖެނަމަ، ނުވަތަ ސަރުކާރާއި ރަށް ނުވަތަ ފަޅު ނުވަތަ ބިން ކުއްޔަށް ހިފާ ފަރާތާ ދެމެދުގައި ކޮށްފައިވާ އެގްރީމަންޓުގެ ދަށުން ކުއްޔަށް ހިފާ ފަރާތަށް ލިބިފައިވާ ހައްގުތައް އެހެން ފަރާތަކަށް ވިއްކާލާނަމަ ނުވަތަ ބަދަލުކުރާނަމަ، އަމަލުކުރާނެ ގޮތް ވަނީ މާއްދާގައި ހިމަނާފައެވެ.
ކޮމިޓީ ރިޕޯޓުގައިވާ ގޮތުން 6 ވަނަ މާއްދާއަށް އަކުރެއް އިތުރުކުރަމުން ނިންމީ، މި ގާނޫނުގެ 12 ވަނަ މާއްދާއަށް ކޮމިޓީން ހުށަހެޅި އިސްލާހާ ގުޅިގެން ތިންވަނަ ފަރާތަކަށް އިންވެސްޓްމަންޓް ވިއްކާލާނަމަ، ނުވަތަ އެގްރީމެންޓްގެ ދަށުން ލިބިފައިވާ ހައްގުތައް އެހެން ފަރާތަކަށް ވީއްލާނަމަ އަމަލުކުރާނެ ގޮތް މި މާއްދާއަށް އިތުރުކުރުމުގެ ގޮތުން އަކުރެއް އިތުރުކޮށް އެ އިސްލާހު ގެނައުމަށް ކޮމިޓީން ނިންމި ކަމަށެވެ.
މީގެ އިތުރުން މި ގާނޫނުގެ 12 ވަނަ މާއްދާއަށް ވަނީ އިސްލާހު ހުށަހަޅާފައެވެ. އެގޮތުން ކޮމިޓީން ހުށަހަޅާފައިވާ އިސްލާހަކީ ފަތުރުވެރިކަމުގެ ބޭނުމަށް ތަރައްގީކުރުމަށް ސަރުކާރުން ކުއްޔަށް ދޫކޮށްފައިވާ ރަށެއްގައި ނުވަތަ ފަޅެއްގައި ނުވަތަ ބިމެއްގައި ކޮށްފައިވާ އިންވެސްޓްމަންޓް ވިއްކާލެވޭނީ، ނުވަތަ ސަރުކާރާއި ރަށް ނުވަތަ ފަޅު ނުވަތަ ބިން ކުއްޔަށް ހިފާ ފަރާތާ ދެމެދުގައި ކޮށްފައިވާ އެގްރީމަންޓުގެ ދަށުން ކުއްޔަށް ހިފާ ފަރާތަށް ލިބިފައިވާ ހައްގުތައް އެހެން ފަރާތަކަށް ވިއްކާލެވޭނީ، ނުވަތަ ބަދަލުކުރެވޭނީ މި ގާނޫނުގެ ދަށުން ހަދާ ގަވާއިދުގައިވާ ޝަރުތުތަކެއްގެ މަތިން އަދި ކުއްޔަށް ހިފާ ފަރާތާ ދެމެދު ހެދިފައިވާ އެއްބްސްވުމުގައި ބަޔާންކުރާ ޝަރުތުތަކެއްގެ މަތިން ކަމަށެވެ.
