އެމެރިކާއިން ރާއްޖެއަށް ދެލައްކަ ރެޕިޑް އެންޓިޖެންޓް ޓެސްޓް ކިޓް ހަދިޔާކޮށްފި
1 ޖުލައި 2022 | ހުކުރު 04:09ކިޓްތަކާއި ދިވެހި ސަރުކާރުގެ ފަރާތުން ހަވާލުވެވަޑައިގަތީ މިނިސްޓަރ އޮފް ސްޓޭޓް ފޮރ ހެލްތު ޝާހު މާހިރު
އެމެރިކާއިން ރާއްޖެއަށް ދެލައްކަ ރެޕިޑް އެންޓިޖެންޓް ޓެސްޓް ކިޓް ހަދިޔާކުރުން
އެމެރިކާއިން ރާއްޖެއަށް ދެލައްކަ ރެޕިޑް އެންޓިޖެންޓް ޓެސްޓް ކިޓް ހަދިޔާކޮށްފިއެވެ.
އެމެރިކާއިން ހަދިޔާކުރި ޓެސްޓް ކިޓްތަކާއި ދިވެހި ސަރުކާރުގެ ފަރާތުން ހަވާލުވެވަޑައިގަތީ މިނިސްޓަރ އޮފް ސްޓޭޓް ފޮރ ހެލްތު ޝާހު މާހިރުއެވެ. ކޮވިޑާއި ދެކޮޅަށް ރާއްޖެއިން ކުރާ މަސައްކަތުގައި އެހީތެރިވެދިނުމުގެ ގޮތުން އެމެރިކާއިން ހަދިޔާ ކޮށްފައިވާ ކިޓުތަކުން ނަތިޖާ ވަގުތުން ލިބޭނެއެވެ.
ކޮވިޑް-19ން ރައްކާތެރިވުމަށް އެމެރިކާގެ ރައްޔިތުންގެ ފަރާތުން ރާއްޖެއަށް 100،000އަށްވުރެ ގިނަ ވެކްސިން ވެސް ވަނީ މީގެ ކުރިން ހަދިޔާ ކޮށްފައެވެ. ކޮވިޑް-19 ފެތުރެންފެށިފަހުން ޔޫއެސް އެއިޑުގެ ފަރާތުން ވަނީ ރާއްޖެއަށް 7 މިލިއަން ޑޮލަރަށްވުރެ ގިނަ އެހީ ފޯރުކޮށްދީފައެވެ. އަދި 60 ވެންޓިލޭޓަރުވެސް ޔޫއެސް އެއިޑުގެ އެހީގައި ރާއްޖެއަށް ވަނީ ހަދިޔާކޮށްފައެވެ.
ރާއްޖޭގެ ކޮވިޑުގެ ހާލަތަށް ބަލާއިރު ހުސްވި ހަފުތާގައި މުޅި ރާއްޖެއިން ކޮވިޑް-19ށް ޕޮޒިޓިވްވެފައިވަނީ 1202 މީހުން ކަމަށް ހެލްތު ޕްރޮޓެކްޝަން އެޖެންސީ(އެޗްޕީއޭ)އިން ވަނީ ބުނެފައެވެ. އެޗްޕީއޭއިން ހާމަކޮށްފައިވާ ތަފާސްހިސާބުތަކަކީ ޖޫން 19ން ޖޫން 25 ވަނަ ދުވަހާ ހަމައަށް ޕޮޒިޓިވްވެފައިވާ މީހުންގެ ތަފާސްހިސާބެވެ. މިތަފާސްހިސާބުތަކަށް ބަލާއިރު، މި މުއްދަތުގައި މާލެ ސަރަހައްދުން ޕޮޒިޓިވްވެފައިވަނީ 528 މީހުންނެވެ. އަތޮޅުތަކުން 452 މީހުން ޕޮޒިޓިވްވެފައިވާއިރު އެހެނިހެން ހިސާބުތަކުން ޕޮޒިޓިވްވެފައިވަނީ 222 މީހުންނެވެ. އޭގެކުރީ ހަފުތާގައި ޕޮޒިޓިވްވެފައިވަނީ މުޅި ޖުމްލަ 91 މީހުންނެވެ.
ފާއިތުވި ހަފުތާގައި މުޅި ރާއްޖެއިން އެންމެ ގިނަ މީހުން ޕޮޒިޓިވްވެފައިވަނީ ޖޫން މަހުގެ 22 ވަނަ ދުވަހުއެވެ. އެއީ 237 މީހުންނެވެ. އެންމެ މަދުން ޕޮޒިޓިވްވެފައިވަނީ ޖޫން 21 ވަނަ ދުވަހުއެވެ. އެއީ 120 މީހުންނެވެ.
މާލެ ސަރަހައްދުން ފާއިތުވި ހަފުތާގައި އެންމެ ގިނަ މީހުން ޕޮޒިޓިވްވެފައިވަނީ ޖޫން 22 ވަނަ ދުވަހާއި ޖޫން 23 ވަނަ ދުވަހުއެވެ. އެންމެ މަދުން މީހުން ޕޮޒިޓިވްވެފައިވަނީ ޖޫން 24 ވަނަ ދުވަހުއެވެ. އެދުވަހު ޕޮޒިޓިވްވީ 46 މީހުންނެވެ.
އަތޮޅުތަކަށް ބަލާއިރު އެންމެ ގިނަ މީހުން ޕޮޒިޓިވްވެފައިވަނީ ޖޫން 22 ވަނަ ދުވަހުއެވެ. އެއީ 92 މީހުންނެވެ. މިއާއެކު މުޅި ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 181،586ށް އަރާފައެވެ. މިހާތަނަށް ރާއްޖެއިން މިބަލީގައި ނިޔާވި މީހުންގެ އަދަދަކީ 305އެވެ.
ވެކްސިންގެ ތަފާސްހިސާބުތަކަށް ބަލާއިރު، ފުރަތަމަ ޑޯޒް ޖެހި މީހުންގެ އަދަދު ވަނީ 398،865ށް އަރާފައެވެ. ދެޑޯޒް 384،510 މީހުން ޖަހާފައިވާއިރު، ބޫސްޓަރ ޑޯޒް ޖެހި މީހުންގެ އަދަދު ވަނީ 163،499ށް އަރާފައެވެ.
އެޑްމިޓްކޮށްގެން ފަރުވާދޭ މީހުންގެ ފަރާތުން ކޮވިޑަށް ޕޮޒިޓިވްވާ މީހުންގެ އަދަދު އިތުރުވެފައިވާ ކަމަށާއި، މިއީ ކޮމިއުނިޓީ ތެރޭގައި ކޭސްތައް އިތުރުވެފައިވާކަމުގެ ހެތްކެއްކަމަށް އައިޖީއެމްއެޗްގެ އެތެރެހަށީގެ ޑޮކްޓަރު، ޑރ. މުހައްމަދު އަލީ ވަނީ ދާދިފަހުން ވިދާޅުވެފައެވެ.
