ގަރާޖެއްގައި ރަޖިސްޓްރީކުރުން ލާޒިމުނުވާގޮތަށް ގާނޫނަށް އިސްލާހު ހުށަހަޅައިފި
30 ޖޫން 2022 | ބުރާސްފަތި 09:54އުޅަނދު ރަޖިސްޓްރީކުރުމުގައި އަމިއްލަ ފަރާތެއްގެ ގަރާޖެއްގައި ނުވަތަ އަމިއްލަ ފަރާތެއްގެ އެނޫންވެސް ތަނެއް ނުވަތަ ބިމެއްގައި އެ އުޅަނދު ބޭއްވުން ލާޒިމުވެގެންނުވޭ
އެއްގަމު ދަތުރުފަތުރުގެ ގާނޫނުގެ ދަށުން ހަތަރުފުރޮޅުލީ އުޅަނދު ގަރާޖެއްގައި ރަޖިސްޓްރީކުރަންޖެހޭ
ގަރާޖެއްގައި ނުވަތަ އަމިއްލަ ފަރާތެއްގެ އެނޫންވެސް ތަނެއް ނުވަތަ ބިމެއްގައި އެ އުޅަނދު ބޭއްވުން ލާޒިމުވެގެންނުވާގޮތަށް އެއްގަމު ދަތުރުފަތުރުގެ ގާނޫނަށް އިސްލާހު ހުށަހަޅައިފިއެވެ.
އެއްގަމު ދަތުރުފަތުރުގެ ގާނޫނަށް މި އިސްލާހު ހުށަހެޅުއްވީ ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲއެވެ. މެންބަރު ނަޝީދު ވިދާޅުވެފައިވަނީ އެއްގަމު ދަތުރުފަތުރުގެ ގާނޫނުގެ ދަށުން ހަދާފައިވާ ގަވާއިދުގެ ދަށުން، އެއްގަމުގައި ދުއްވާ އިންޖީނުލީ އުޅަނދުފަހަރު ރަޖިސްޓްރީކުރާއިރު، ދެފުރޮޅަށްވުރެ ގިނަ ފުރޮޅުލީ އުޅަނދު ގަރާޖެއްގައި ރަޖިސްޓްރީކުރާ ގޮތަށް މިހާރު އޮންނާތީ، އެކަމުގެ ސަބަބުން، އެކަމުގެ ނާޖާއިޒު ފައިދާ ނަގައި ބޮޑެތި އަދަދުތައް އަދި ގަރާޖުގައި އޮންނަ ޖާގައަށްވުރެ ގިނަ އުޅަނދުފަހަރު ގަރާޖުގައި ރަޖިސްޓްރީކޮށްދީ އެފަދަ އަމަލުތައް ބައެއް ފަރާތްތަކުން ހިންގަމުން ގެންދާ ކަމަށެވެ.
އަދި މިކަން ރަނގަޅަށް މޮނިޓަރކުރެވޭތަން ނުފެންނާތީ، އެކަމަށް ހުއްޓުމެއް ގެނައުމަށާއި، އަދި މިކަމުގެ ސަބަބުން ވެހިކަލް ރަޖިސްޓަރ ކުރަން ބޭނުންވާ ފަރާތްތަކަށް ބޮޑުތަކުލީފަކަށްވެ މިކަމުން ސަރުކާރުން ހާސިލް ކުރަން ބޭނުންވާ މަގުސަދު ހާސިލުނުވެ އެތަކެއް ދިވެހި ރައްޔިތުންގެ ކަންބޮޑުވާ މައްސަލައަކަށްވާތީ ގާނޫނުގެ ދަށުން އެއްގަމުގައި ދުއްވާ އިންޖީނުލީ އުޅަނދުފަހަރު ރަޖިސްޓްރީކުރާ އިރު ގަރާޖެއްގައި ރަޖިސްޓްރީކުރުން ލާޒިމުނުވާގޮތަށް ގާނޫނުގައި ހިމެނުމަށް ހުށަހަޅާ ކަމަށެވެ.
އެއްގަމު ދަތުރުފަތުރުގެ ގާނޫނަށް ހުށަހަޅާފައިވާ އިސްލާހަކީ މި ގާނޫނުގެ 13 ވަނަ މާއްދާއަށް އަކުރެއް އިތުރު ކުރުމެވެ. 13 ވަނަ މާއްދާގެ (ރ) ގެ ގޮތުގައި ހިމެނުމަށް ހުށަހަޅާފައިވާ އިސްލާހުގައި ބުނެފައިވަނީ މި މާއްދާގައިވާ ގޮތުގެ މަތިން ދިވެހިރާއްޖޭގައި އިންޖީނުލީ އެއްގަމު އުޅަނދު ރަޖިސްޓްރީކުރުމުގައި އަމިއްލަ ފަރާތެއްގެ ގަރާޖެއްގައި ނުވަތަ އަމިއްލަ ފަރާތެއްގެ އެނޫންވެސް ތަނެއް ނުވަތަ ބިމެއްގައި އެ އުޅަނދު ބޭއްވުން ލާޒިމުވެގެންނުވެއެވެ.
މި ގާނޫނަށް އަމަލުކުރަން ފަށާނީ، މި ގާނޫނު ފާސްވެ، ތަސްދީގުކޮށް، ދިވެހި ސަރުކާރުގެ ގެޒެޓުގައި ޝައިއުކުރާ ދުވަހުން ފެށިގެންނެވެ.
