އާލިމްގެ ހެޓްރިކާއެކު ސިކްސް އެކްސް ބަލިކޮށް ސެމީ ފައިނަލްގެ ފަހު ޖާގަ އެކްސިޓޯއަށް

ރައްޒާގުބެ މެމޯރިއަލް ކަޕްގައި ސިކްސް އެކްސް ބަލިކޮށް ސެމީ ފައިންގެ ފަހު ޖާގަ އެކްސިޓޯއިން ހޯދައިފިއެވެ.

ބުދަ ދުވަހުގެ ހަވީރު އޮތް މެޗަށް ކުރިމަތިލީއިރު، ސެމީގެ ފުރުސަތު ބޮޑީ ސިކްސް އެކްސްއަށެވެ. މެޗު އެއްވަރުކޮށްލައިގެން ވެސް އެ ޓީމަށް ސެމީގެ ޖާގައެއް ލިބެން އޮތެވެ. ސެމީގެ ޖާގަ ބޭނުންނަމަ، އެކްސިޓޯއަށް ޖެހެނީ ސިކްސް އެކްސް ބަލިކުރާށެވެ. މަޖުބޫރު މެޗަކަށް ނިކުމެ، އެކްސިޓޯއިން ސިކްސް އެކްސް ބަލިކުރީ 3-0ންނެވެ.

މެެޗުގައި އެކްސިޓޯގެ ތިން ލަނޑު ވެސް ޖެހީ އާލިމް އަބްދުލް ގައްޔޫމްއެވެ. އޭނާގެ ފުރަތަމަ ލަނޑު ޖެހީ މެޗުގެ 16 ވަނަ މިނެޓުގައެވެ. ދެ ވަނަ ލަނޑު 55 ވަނަ މިނެޓުގައި ޖެހިއިރު، ތިން ވަނަ ލަނޑު ޖަހާފައިވަނީ 73 ވަނަ މިނެޓުގައެވެ. މެޗުގެ މޮޅު ކުޅުންތެރިޔަކަށް ވެސް ހޮވުނީ އާލިމްއެވެ.

މުބާރާތުގެ ސެމީގެ މެޗުތައް ކުރިއަށްދާނީ ޖުލައި އެއްވަނަ ދުވަހާއި ތިން ވަނަ ދުވަހުއެވެ. މުބާރާތުގައި ކުޅޭނީ ދެ ސެމީއެވެ. ފުރަތަމަ ސެމީގައި ބައްދަލުކުރާނީ އެއްވަނަ ޓީމާއި ދެވަނަ ޓީމެވެ. އެއީ ޗެލެންޖަރސްއާއި އޯލް އެޓޭކްއެވެ. މި ސެމީން މޮޅުވާ ޓީމަކަށް ފައިނަލްގެ ޖާގަ ލިބޭނެއެވެ. ބަލިވާ ޓީމު ޖެހޭނީ ތިންވަނަ ޓީމާއެކު، ދެވަނަ ސެމީ ކުޅޭށެވެ. މުބާރާތުގެ ފައިނަލް އޮތީ ޖުލައި ހަވަނަ ދުވަހުއެވެ.

އެހެންކަމުން ފުރަތަމަ ސެމީގައި ބައްދަލުކުރާނީ އެންމެ ފަހުގެ ޗެމްޕިއަން ޗެލެންޖަރސްއާއި އޯލް އެޓޭކެވެ. މެޗުން ބަލިވާ ޓީމު ދެވަނަ ސެމީގައި ބައްދަލުކުރާނީ އެކްސިޓޯއާއެވެ.