ރިސޯޓް ހަދަން 4 ރަށެއް ކުއްޔަށް ދޭން ނިންމައިފި
29 ޖޫން 2022 | ބުދަ 11:42އެވޯޑް ލެޓަރގައި ހުރި ކަންކަން ފުރިހަމަ ކުރީ 4 ކުންފުންޏަކުން ކަމަށް މިނިސްޓްރީން ބުނޭ
ރިސޯޓެއް
ފަތުރުވެރިކަން ފުޅާ ކުރުމުގެ ގޮތުން ރިސޯޓް ތަރައްގީ ކުރުމަށް ސަރުކާރުން ހުޅުވާލި 4 ރަށެއް ކުއްޔަށް ދޫ ކުރަން އެންމެ ފަހުގެ ތައްޔާރީތައް ވަމުން އަންނަ ކަމަށް ޓޫރިޒަމް މިނިސްޓްރީން ބުނެފިއެވެ.
ބުދަ ދުވަހު ނެރުނު ބަޔާނެއްގައި ޓޫރިޒަމް މިނިސްޓްރީން ބުނީ އެ މިނިސްޓްރީން ހުޅުވާލި ފުރުސަތުގެ ދަށުން ބީލަން ހުށައެޅި ފަރާތްތަކުގެ ބީލަން އިވެލުއޭޓް ކުރުމަށްފަހު 5 ރަށެއްގެ ބީލަން ކާމިޔާބު ކުރި 5 ކުންފުންޏަށް އެވޯޑް ލެޓަރ ދީފައިވާ ކަމަށެވެ. ނަމަވެސް މީގެ ތެރެއިން ކުއްޔަށް ދޭން ނިންމާފައިވަނީ 4 ރަށެއް ކަމަށް ވެސް މިނިސްޓްރީން ބުންޏެވެ.
އެ މިނިސްޓްރީން 4 ރަށެއް ކުއްޔަށް ދޭން ނިންމީ ލީސް އިކުއިޒިޝަން ކޯސްޓް އާއި ޓޫރިޒަމް ޓްރެއިނިންގ ފަންޑަށް ހުށައަޅަން ޖެހޭ ފައިސާގެ 50 އިންސައްތަ 60 ދުވަހުގެ މުއްދަތުގެ ތެރޭގައި ދައްކާފައިވަނީ އެންމެ 4 ކުންފުންޏަކުން ކަމަށްވާތީއެވެ. މި ފައިސާގެ އިތުރުން ރަށުގެ އިނީޝަލް އެންވަޔަރަމަންޓް އެސެސްމަންޓް ރިޕޯޓް ހުށަހެޅީވެސް 4 ކުންފުނިން ކަމަށް ޓޫރިޒަމް މިނިސްޓްރީން މައުލޫމާތު ދެއެވެ.
މި 4 ކުންފުންޏާއެކު އެ ރަށްތައް ކުއްޔަށް ދިނުމުގެ އެއްބަސްވުމުގެ މަސައްކަތްތައް ކުރަމުން އަންނަ ކަމަށް ވެސް މިނިސްޓްރީން ބުނެފައިވެއެވެ.
ޓޫރިޒަމް މިނިސްޓްރީން ހުޅުވާލި ފުރުސަތުގެ ދަށުން ބީލަން ކާމިޔާބު ކޮށްފައިވަނީ ފ. އެނބުލުފުއްޓާއި ފ. ޖިންނަތުގައު އާއި ގދ. ކަނޑަހަލަގަލަ އާއި މ. ސީދިހުރާ ވެލިގަނޑާއެކު ސީދީހުރާގެއެވެ. މީގެ އިތުރުން ހއ. އަލިދުއްފަރުފިނޮޅުގެ ބީލަން ވެސް ކުންފުންޏަކުން ކާމިޔާބު ކުރިއެވެ. ނަމަވެސް އެވޯޑް ލެޓަރ ގައި ބަޔާންކޮށްފައިވާ މުއްދަތަށް އެ ލެޓަރގައި ހިމެނޭ ކަންކަން ނުކުރުމުން އެ ބީލަން ކާމިޔާބު ކުރި ކުންފުނިން ހުށަހަޅާފައިވާ ބިޑް ސެކިއުރިޓީ "ފޯފިޓް" ކުރަން ވަނީ ނިންމާފައެވެ.
ސަރުކާރުން ކުއްޔަށް ދޭން ނިންމާފައިވާ 4 ރަށްތައް ކާމިޔާބު ކުރި ކުންފުނިތައް
މި 4 ރަށުގެ އިކުއިޒިޝަން ކޯސްޓުގެ ގޮތުގައި ކަނޑައަޅާފައިވަނީ 10 މިލިއަން ޑޮލަރު (154.2 މިލިއަން ރުފިޔާ)އެވެ. އަދި ޓޫރިޒަމް ޓްރެއިނިން ފަންޑަށް 620،120 ޑޮލަރު (9.5 މިލިއަން ރުފިޔާ) ވަނީ ކަނޑައަޅާފައެވެ. މި ފައިސާގެ 50 އިންސައްތަ މިހާރު ވަނީ އެވޯޑު ލެޓަރ ލިބުނު ކުންފުނިތަކުން ސަރުކާރަށް ދައްކާފައެވެ.
ރިސޯޓް ތަރައްގީ ކުރުމަށް ސަރުކާރުން 26 އޮކްޓޯބަރު 2021 ވަނަ ދުވަހު 10 އަތޮޅަކުން 21 ރަށެއް ހުޅުވާލިއެވެ. މީގެ ތެރެއިން އެކި ރަށްތަކަށް 18 ފަރާތަކުން ޝައުގުވެރިކަން ފާޅު ކުރިއިރު ބީލަން އިވެލުއޭޓް ކުރުމަށްފަހު އެވޯޑް ކުރީ 5 ކުންފުންޏަކަށެވެ.
