ޔޯގާ ހެދުމަކީ ހަރާމް ކަމެއްކަމަށް ބުނާތީ ރައީސް ނަޝީދުގެ ކަންބޮޑުވުން
މިފަދަ ކަންކަމާ ދެކޮޅަށް އަޑު އުފުލުމަކީ ރާއްޖެ ހަލާކުގެ ތެރެއަށް ދާނެ ކަމެއް
އެމްޑީޕީން މާލެ ސިޓީގެ ރައްޔިތުންނާއެކު ބޭއްވި ބައްދަލުވުމުގެ ތެރެއިން
ޔޯގާ ހެދުމަކީ ހަރާމް ކަމެއްކަމަށްބުނެ ހިންގަމުންދާ ހަމަނުޖެހުންތަކާ ގުޅިގެން އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކަންބޮޑުވުން ފާޅުކުރައްވައިފިއެވެ.
ރައީސް ނަޝީދު މިފަދައިން ކަންބޮޑުވުން ފާޅުކުރެއްވީ ވެރިކަން ކުރާ މައި ޕާޓީ އެމްޑީޕީގެ 17 ވަނަ އަހަރީ ދުވަހުގެ މުނާސަބަތުގައި އެ ޕާޓީގެ ހަރުގޭގައި ބޭއްވި ދިދަ ނެގުމުގެ ހަފްލާގައި ވާހަކަފުޅުދައްކަވަމުންނެވެ.
ރައީސް ނަޝީދު ވިދާޅުވީ ރާއްޖޭގެ ރައްޔިތުންނަކީ މިނިވަންކަމުގައި، އުފަލުގައި ދިރިއުޅެމުންދާ ބައެއް ކަމަށެވެ. އެހެން މިކަން އޮއްވައި ބަޔަކު ނިކުމެ ޔޯގާ ހަދާ ކަސްރަތުކުރުމަކީ އިސްލާމްދީނާ ޚިލާފު ކަމެކޭ ބުނެ، ދިވެހިންގެ އާންމު ދިރިއުޅުމަށް ބުރޫ އަރުވަން ފަށައިފިނަމަ ދެން ދިވެހިރާއްޖެ ދާނީ ހަލާކުގެ ތެރެއަށް ކަމަށް ރައީސް ވިދާޅުވިއެވެ.
މިފަދަ ކަންކަމުގެ ސަބަބުން ހަލާކުގެ ތެރެއަށްގޮސް، ދުނިޔެއާ ބާކީވެ، އެކަހެރިވެފައިވާ ގައުމުތައް ފެނިފައިވާކަމަށް ރައީސް ނަޝީދު ވިދާޅުވިއެވެ. ދިވެހިރާއްޖެ އެ ހާލަތަށް ދިއުމަށް ޖާގަދެވިގެން ނުވާނެ ކަމަށް ނަޝީދު ވިދާޅުވިއެވެ.
ޖޫން 21 ވަނަ ދުވަހުގެ ހެނދުނު ގަލޮޅު ސްޓޭޑިއަމްގައި ކުރިއަށްދިޔަ ޔޯގާ ހަރަކާތް ހުއްޓުވުމަށް ހިންގި ހަމަނުޖެހުންތަކާ ގުޅިގެން މިހާތަނަށް 19 މީހަކު ވަނީ ހައްޔަރުކޮށްފައެވެ. ފުލުހުން ގެންދަނީ މި މައްސަލަ ސީރިއަސް މައްސަލައެއްގެ ގޮތުގައި ތަހުގީގުކުރަމުންނެވެ.
