ކްރިމިނަލް ކޯޓުގެ އިސްގާޒީ އަހުމަދު ޝަކީލުގެ މައްޗަށް ތުހުމަތު ކުރެވުނު ސުލޫކީ މައްސަލަ ސާބިތުނުވާކަމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމައިފިއެވެ.

ޖޭއެސްސީން އެގޮތަށް ނިންމާފައިވަނީ އާދިއްތަ ދުވަހުއެވެ. އެއީ ކޮމިޝަނުގައި ބައިވެރިވެލެއްވި މެމްބަރުންގެ އިއްތިފާޤުންނެވެ.

އިސްގާޒީ ޝަކީލްއާއި ގުޅިގެން ބަލާފައިވަނީ އައިއެސް ޖަމާއަތުގެ ރާއްޖޭގެ ލީޑަރު ކަމަށް ބުނާ ޏ. ފުވައްމުލައް މާދަޑު، ކަރިއްޔާވިލާ، މުހައްމަދު އަމީން ގޭބަންދަށް ބަދަލުކުރަން ނެރުނު އަމުރާއި ގުޅޭ މައްސަލައެކެވެ. އެ އަމުރު ހައިކޯޓުގެ މަރުޙަލާއިން އޮތީ ބާތިލުކޮށްފައެވެ.

އެހެންނަމަވެސް ޖޭއެސްސީން އެ މައްސަލަ ތަހުގީގު ކުރުމަށްފަހު ނިންމީ މައްސަލަ ސާބިތުނުވާ ކަމަށެވެ.

އަޙްމަދު ޝަކީލަކީ ފަނޑިޔާރުކަމުގައި 19 އަހަރަށް ވުރެ ގިނަ ދުވަހުގެ ތަޖުރިބާ ލިބިވަޑައިގެން ހުންނެވި ބޭފުޅެކެވެ. އޭނާ ކުރިން މަސައްކަތްކުރެއްވި ކޯޓުތަކުގެ ތެރޭގައި ޖުވެނައިލް ކޯޓާއި، ސިވިލް ކޯޓު އަދި ފެމިލީ ކޯޓާއި ކްރިމިނަލް ކޯޓު ހިމެނެއެވެ.

އޭނާ ކްރިމިނަލް ކޯޓުގެ އިސްގާޒީ ކަމަށް އައްޔަނު ކުރެއްވީ 26 ނޮވެމްބަރު 2020 ގައެވެ.