ހައްޖާޖީންނަށް ފޯރުކޮށްދެވޭ ކާބޯތަކެތީގެ ރައްކާތެރިކަން ޔަގީންކޮށްފި
25 ޖޫން 2022 | ހޮނިހިރު 10:48ރައްކާތެރިނޫން ކެއުން ފޯރުކޮށްދީފިނަމަ 10 މިލިއަން ރިޔާލުން ޖޫރިމަނާކުރެވޭނެކަން އަންގާފައިވޭ
ހައްޖުވެރިނަށް ކެއުން ތައްޔާރުކުރާ ތަނެއް
ހައްޖާޖީންނަށް ފޯރުކޮށްދެވޭ ކާއެއްޗެއްސަކީ ސިއްހީގޮތުން ގެއްލުންހުރި ތަކެއްޗަށް ވެގެން ނުވާނެކަމަށް ބުނެ، ސައޫދީ އަރަބިއްޔާގެ ޕަބްލިކް ޕްރޮސެކިއުޓަރގެ އޮފީހުން ހަރުކަށި އިންޒާރެއް ނެރެފިއެވެ.
ސިއްހީގޮތުން ނުރައްކަލެއް ވެދާނެ ކާބޯތަކެތި ބެހުމާއި ވިއްކުމަކީ އެގައުމުގައި ވަރަށް ބޮޑަށް މަނާކޮށްފައިވާ ކަމެއްކަން ހަނދާން ކޮށްދެމުން ޕަބްލިކް ޕްރޮސެކިއުޓަރގެ އޮފީހުން ބުނީ، އެފަދަ ތަކެތި ވިއްކިކަން ނުވަތަ ބެހިކަން އެނގިއްޖެނަމަ އެފަރާތެއް ހައްޔަރުކުރެވޭނެ ކަމަށާއި، ބޮޑު އަދަދަކުން ޖޫރިމަނާކުރެވި އަދަބު ދެވޭނެ ކަމަށެވެ. މިގޮތުން ރައްކާތެރިކަމުގެ މިންގަނޑުތަކާ ޚިލާފުވާ ފަރާތްތައް 10 އަހަރަށް ޖަލަށްލެވޭނެކަމަށާއި 10 މިލިއަން ރިޔާލުން ޖޫރިމަނާކުރެވޭނެ ކަމަށް ޕަބްލިކް ޕްރޮސެކިއުޓަރުގެ އޮފީހުން ބުނެފައިވެއެވެ. މީގެ އިތުރުން އެފަދަ ފަރާތްތަކުގެ ލައިސަންސް އަތުލާނެކަމަށާއި، ދެން އެފަރާތަކަށް ކާބޯތަކެތި ތައްޔާރުކޮށް ވިއްކުމުގެ މަސައްކަތުގައި އުޅުން މަނާކުރެވޭނެކަން އަންގާފައިވެއެވެ. މީގެ އިތުރުން އެފަދަ ފަރާތްތަކުގެ ކުށް ގާނޫނީ ކޯޓެއްގައި ސާބިތުވެއްޖެނަމަ މީސްމީޑިޔާގައި ނަން ހާމަކުރެވޭނެ ކަމަށްވެސް ބުނެފައިވެއެވެ.
