ހުމާއި ރޯގާ ޖެހިގެން ފަރުވާ ހޯދާ މީހުންގެ އަދަދު އިތުރުވެ، އެފަދަ ބަލި މީހުން އައިޖީއެމްޗްގެ ފްލޫ ކްލިނިކަށް ދެއްކުމަށް އެ ހޮސްޕިޓަލުން އެދިއްޖެ އެވެ.
އައިޖީއެމްއެޗުން ނެރުނު ބަޔާނެއްގައި ބުނީ ހުމާއި ރޯގާ ޖެހިގެން ފަރުވާ ހޯދުމަށް ދާ ބަލި މީހުންގެ އަދަދު އިތުރުވެ، އެ ހޮސްޕިޓަލުގެ ފްލޫ ކްލިނިކްގައި އެފަދަ ބަލި މީހުންނަށް ޑޮކްޓަރަށް ދެއްކޭނެ އިންތިޒާމު ބުރާސްފަތި ދުވަހުން ފެށިގެން ހަމަޖައްސާފައިވާ ކަމަށެވެ. ފްލޫ ކްލިނިކްއިން ހިދުމަތް ދޭނީ ހެނދުނު 8:00ން ރޭގަނޑު 11:00 އަށް ކަމަށް އައިޖީއެމްއެޗުން ބުނެއެވެ.
މި ދުވަސްވަރު ހުމާއި ރޯގާ އިތުރުވަމުން އަންނައިރު ކޮވިޑް-19 އަށް ޕޮޒިޓިވް ވާ މީހުންގެ އަދަދު ވެސް ރާއްޖޭގައި އަންނަނީ އިތުރުވަމުންނެވެ. މިކަމާ ގުޅިގެން ހޮސްޕިޓަލުތަކުން ރައްކާތެރިކަމުގެ ފިޔަވަޅުތައް އަޅާފައިވާއިރު އާއްމުންވެސް ބޭރަށް ނުކުމެ އުޅޭއިރު ރައްކާތެރިވެ ތިބުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ އިލްތިމާސްކޮށްފައެވެ.
އެޗްޕީއޭގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރާ އަޅާބަލާއިރު މި އަހަރުގެ މި ދުވަސްވަރު އާންމު ރޯގާތައް ޖެހޭ މީހުންގެ އަދަދު އިތުރެވެ.