ސަސްޕެންޝަން އުވާލާއިރު ޓީމް ތައްޔާރަށް ބޭއްވުމަށް ބިދޭސީ ހަތަރު ކުޅުންތެރިން ގެންނަން ނިންމާ, އެކުޅުންތެރިންގެ ކަންކަންވެސް ނިއުރޭޑިއަންޓުން ހަމަޖައްސައިފިއެވެ.
ނިއުރޭޑިއަންޓްގެ ޗެއަރމަން އަހުމަދު ވާސިފް ވިދާޅުވީ ދެވަނަ ޑިވިޝަންގައި ވާދަކުރުމަށް ތައްޔާރުވަމުން އަންނަ ޓީމަށް ގެންނަނީ ގާނާގެ ދެ ކުޅުންތެރިންނާއި, އުޒުބެކިސްތާންގެ ކުޅުންތެރިއަކާއި, މިސްރު ކުޅުންތެރިއެއްކަމަށެވެ. ގާނާއިން ގެންނަނީ ޑިފެންޑަރަކާއި, މިޑްފީލްޑަރެކެވެ. އުޒްބެކިސްތާނުން ގެންނަނީ ޑިފެންސިވް މިޑްފީލްޑަރެކެވެ. އަދި މިސްރުން ގެންނަނީ ފޯވާޑެކެވެ. ކުރިން ޕާކިސްތާން ކީޕަރެއް ގެންނަން ނިންމި ނަމަވެސް އެނިންމުން ބަދަލުކުރީ ރަނގަޅު ދިވެހި ކީޕަރެއް ލިބުމާއެކި, ފީލްޑަށް ކުޅުންތެރިން އިތުރުކުރަންކަމަށް ވާސިފް ވިދާޅުވިއެވެ.
ބިދޭސީ ހަތަރު ކުޅުންތެރިންގެ ތެރެއިން ދެ ކުޅުންތެރިންގެ ވިސާގެ ކަންތައްވެސް ހަމަޖެހިއްޖެ. އަނެއް ދެކުޅުންތެރިންގެ ކަންތައްވެސް ދެދުވަހެއްގެ ތެރޭގައި ހަމަޖެހޭނެކަމަށް އުއްމީދުކުރަނީ. އަންނަ މަހު ދެވަނަ ޑިވިޝަން ފަށާއިރު ތައްްޔާރަށް ތިބުން ބޭނުމަކީ. އިރާދަކުރެއްވިއްޔާ ކަންކަން ހަމަޖެހި ނިއުރޭޑިއަންޓް ވާދަކުރާނެއަހުމަދު ވާސިފް/ ނިއުރޭޑިއަންޓްގެ ޗެއަރމަން
ނިއުރޭޑިއަންޓްގެ ސަސްޕެންޝަން އުވާލުމަށް ކުރަންޖެހޭ މަސައްކަތްތައް ކުރިއަށްދާއިރު, އެކްލަބުން ދަނީ ނުރަސްމީކޮށް ޕްރެކްޓިސްވެސް ކުރަމުންނެވެ. ނިއުރޭޑިއަންޓް ސަސްޕެންޝަންގައި އޮތުމުން ރޭޑިއަންޓްގެ ނަމުގައި ކްލަބެއް ރަޖިސްޓްރީކޮށް ނުލާ ހުދުގައި ދަނޑަށް ނިކުންނަން ނިންމާ ކުރިން ވަނީ ދިވެހި ކުޅުންތެރިންގެ ސޮއި ހޯދާފައެވެ. އަދި ކޯޗަކަށް ނިއުރޭޑިއަންޓްގެ ކުރީގެ ޑިފެންޑަރ ސޮބާހު މުޙައްމަދު ވަނީ ހަމަޖައްސާފައެވެ.
މިހާރު އެޓީމް ސޮބާގެ އިރުޝާދުގެ ދަށުން ޕްރެކްޓިސް ކުރަމުން އަންނަނީ ދެވަނަ ޑިވިޝަންގައި ވާދަކުރާ ނިއުރޭޑިއަންޓްގެ ޓީމްގެ ގޮތުގައެވެ. ރޭޑިއަންޓްގެ ޗެއަރމަން ވާސިފްއަކީ ނިއުރޭޑިއަންޓްގެވެސް ޗެއަރމަންއެވެ. ދެވަނަ ޑިވިޝަން ފުޓްބޯޅަ މުބާރާތް ފަށާނީ އަންނަ މަހު 4 ވަނަ ދުވަހުއެވެ.
