ޝެއިޚް ފަޒްލޫނާއި ޝެއިޚް ނިޝާންގެ ދީނީ ތަގުރީރު ކުރުމުގެ ހުއްދަ ހިފަހައްޓައިފި
މި ދެ ޝެއިޚުންގެ ހުއްދަ ހިފަހައްޓާފައިވަނީ ޔޯގާ ހަރަކާތް ހުއްޓުވުމަށް ހިންގި ހަމަނުޖެހުންތަކާ ގުޅިގެން
ޝެއިޚް ނިޝާން އާއި ޝެއިޚް ފަޒްލޫން
ޝެއިޚް ފަޒްލޫން މުހައްމަދާއި ޝެއިޚް އާދަމް ނިޝާންއަށް ދީފައިވާ ދީނީ ތަގުރީރު ކުރުމާއި ވައުޟޫ ވިދާޅުވުމުގެ ހުއްދަ ވަގުތީގޮތުން ހިފަހައްޓައިފިއެވެ.
އިސްލާމިކް މިނިސްޓްރީން ބުދަ ދުވަހުގެ ރޭ ނެރުނު ބަޔާނެއްގައި ބުނެފައިވާ ގޮތުގައި ޝެއިޚް ފަޒްލޫންގެ ހުއްދަ ހިފަހައްޓާފައިވަނީ 21 ޖޫން 2022 ވަނަ ދުވަހު ގަލޮޅު ދަނޑުގައި ހިންގި ހަރަކާތަށް އަމާޒުކޮށް ފުލުހުންގެ ސަފުތައް ފޫއަޅުވާލައި ބަންދުކޮށްފައިވާ ސަރަހައްދަކަށް ވަދެ، ދައުލަތުގެ މުދަލަށް ގެއްލުންދީ ދައުލަތުގެ ވަޒީރުންނާއި ޢިއްޒަތްތެރިންނާއި އެކުވެރި ދައުލަތްތަކާއި ބައިނަލްއަގުވާމީ ޖަމާއަތްތަކުގެ ޑިޕްލޮމެޓުންނާއި މަންދޫބުންނަށް ހަމަލާދީ ހަމަނުޖެހުން ހިންގާފައިވާތީ އޭނާއާ ގުޅޭ ޖިނާއީ ތަހުގީގެއް ކުރަމުންދާކަން ފުލުހުން އެ މިނިސްޓްރީއަށް އަންގާފައިވާތީ ކަމުގައިވަނީ ބަޔާންކޮށްފައެވެ. އެގޮތުން އެ އެއްވުމަށް ދައުވަތުދީ އެއްވުމުގައި އޭނާ އިސްކޮށް ހަރަކާތްތެރިވެރިވެފައިވާ ކަމަށާއި ހަމަނުޖެހުން ހިންގައިގެން ހައްޔަރު ކުރި ފަރާތްތަކުގެ އަމަލުތަކަށް ހިތްވަރުދީ އެ އަމަލުތައް ދިފާއުކޮށްފައިވާ ކަމަށް ވެސް އިސްލާމިކް މިނިސްޓްރީގެ ބަޔާނުގައި ވަނީ ބުނެފައެވެ.
މީގެ އިތުރުން ހަމަނުޖެހުންތަކުގައި ހައްޔަރު ކުރި ފަރާތްތަކުގެ މައްޗަށް ޖިނާއީ އަދުލުގެ ނިޒާމުގެ ތެރެއިން ފިޔަވަޅު އެޅި ފަނޑިޔާރުންނަށް ނިސްބަތްކޮށް ތަކުރީފުގެ ޞީޢާއިން މީސްމީޑިއާގައި މުޙާތަބުކޮށްފައިވާކަން އެނގެން އެބައޮތް ކަމަށް ވެސް އިސްލާމިކް މިނިސްޓްރީގެ ބަޔާނުގައި ވަނީ ބުނެފައެވެ.
ޝެއިޚް ނިޝާންގެ ހުއްދަ ހިފަހައްޓާފައިވަނީ ޔޯގާ ހަރަކާތަށް އަމާޒުކޮށް ފުލުހުންގެ ސަފުތައް ފޫއަޅުވާލައި ބަންދުކޮށްފައިވާ ސަރަހައްދަކަށް ވަދެ، ދައުލަތުގެ މުދަލަށް ގެއްލުންދީ ދައުލަތުގެ ވަޒީރުންނާއި ޢިއްޒަތްތެރިންނާއި އެކުވެރި ދައުލަތްތަކާއި ބައިނަލްއަގުވާމީ ޖަމާއަތްތަކުގެ ޑިޕްލޮމެޓުންނާއި މަންދޫބުންނަށް ހަމަލާދީ ހަމަނުޖެހުން ހިންގާފައިވާތީ އޭނާއާ ގުޅޭ ޖިނާއީ ތަހުގީގެއް ކުރަމުންދާކަން ފުލުހުން އިސްލާމިކް މިނިސްޓްރީއަށް އަންގާފައިވާތީ ކަމަށް އެ މިނިސްޓްރީން ބުނެއެވެ.
މި ދެ ޝެއިޚުން ވެސް ވަނީ ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތް ކުރުމުގެ ޤާނޫނުގެ 4 ވަނަ މާއްދާގެ (ހ) އަދި ޤަވާއިދުގެ 5 ވަނަ މާއްދާގެ (ޅ) އާ ޚިލާފުވެފައި ކަމަށް ވެސް މިނިސްޓްރީގެ ބަޔާނުގައި ވަނީ ބުނެފައެވެ.
އިސްލާމިކް މިނިސްޓްރީން ވަނީ އިސްލާމް ދީނުގެ ނަމުގައި މަދުބަޔަކު ހިންގާ ނޭއްގާނީ އަމަލުތަކުގެ ނާޖާއިޒް ފައިދާ ނަގައި، ދީނަށާއި ދީނީ ޢިލްމުވެރިންނަށް ނިސްބަތްކޮށް ބަދުބަސް ބުނުމާއި މަދުބަޔަކު ހިންގާ ހަރުކަށި އަމަލުތައް ދީނީ އިލްމަށް ނިސްބަތްވާ އެންމެންގެ ބޮލުގައި އެޅުވުމަށް ބަޔަކު މަސައްކަތް ކުރަމުން އަންނަ ކަމަށް ބަޔާންކޮށް އެކަން ކުށްވެރިކޮށްފައެވެ. މުޖުތަމައުގައި ޢިލްމުވެރިންނަށް ދީފައިވާ ގަދަރާއި ހައިބަތު ކުޑަކުރުމަކީ ހަރުކަށި ފިކުރަށް ހުޅުވައިދޭ ދޮރެއް ކަމަށް ވެސް އެ މިނިސްޓްރީން ބުނެއެވެ.
މީގެ އިތުރުން ބާތިލު ފިކުރުތަކަށް އަފްރާދުންދާ އެއް ސަބަބަކީ ދީނުގެ ސައްޙަ ޢިލްމު ނެތުންކަން ފާހަގަކޮށް އިސްލާމިކް މިނިސްޓްރީން ބުނީ މިފަދަ ފިކުރުތަކާ ދެކޮޅަށް ހިންގަން ޖެހޭ އެންމެ މުހިންމު ހަރަކާތަކީ މުޖުތަމައުގެ ހުރިހާ ފަންތިއަކާއި ގިންތިއަކަށް އިސްލާމްދީނުގެ ޢިލްމު ފޯރުކޮށްދިނުން ކަމަށެވެ.
އެ މިނިސްޓްރީން ވަނީ އިސްލާމްދީނުގެ މައުލޫމާތު ފޯރުކޮށްދިނުމުގައި ޝަރުޢީ ރިވެތި އުސޫލުތަކާއި މިންގަނޑުތައް ހިފެހެއްޓުމަށް ހުރިހާ ދީނީ ޢިލްމުވެރިންނަށް އިލްތިމާސްކޮށްފައެވެ.
ބައިނަލްއަގުވާމީ ޔޯގާ ދުވަހުގެ ހެނދުނު ގަލޮޅު ދަނޑުގައި ކުރިއަށްދިޔަ ޔޯގާ ހަރަކާތް ހުއްޓުވުމަށް އެތަނަށް ވަދެ ބަޔަކު ވަނީ އެތަނުގައި ހުރި ތަކެއްޗާއި ހަރަކާތުގައި ތިބި މީހުންނަށް ވެސް ހަމަލާ ދީފައެވެ. މި ހަމަނުޖެހުންތަކާ ގުޅިގެން 10 މީހަކު މިހާތަނަށް ހައްޔަރުކޮށްފައިވާ ކަމަށް މައުލޫމާތު ލިބެއެވެ. މީގެ ތެރޭގައި ޝެއިޚް ފަޒްލޫން އާއި ޝެއިޚް ނިޝާންގެ އިތުރުން ޕީޕީއެމްގެ އިސްކޮށް ހަރަކާތްތެރިވާ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް އާއި އެޕާޓީގެ އިތުރު އެކްޓިވިސްޓެއް ހިމެނެއެވެ.
