ރައީސް އެންމެ ބޮޑު ސަމާލުކަމެއް ދެއްވަނީ ހައްޖުގެ ކަންކަން ވީ އެންމެ ރަނގަޅަކަށް ހަމަޖައްސަވަން: ނައިބު ރައީސް
ނައިބުރައީސް ވަނީ ހައްޖާޖީން ފުރުމުގެ ކަންކަން ރޭވިފައިވާ ގޮތް ބައްލަވާލައްވާފައި
ހުރަވީ ސްކޫލް ރަސްމީކޮށް ހުޅުވި ދުވަހުގެ ޖަލްސާގައި އެޑިއުކޭޝަން މިނިސްޓަރ ޑރ. އައިޝަތު އަލީ (ވ)، ރައީސް ސޯލިހު (މ)، އަދި ނައިބު ރައީސް ފައިސަލް ނަސީމް (ކ)
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު އެންމެ ބޮޑު ސަމާލުކަމެއް ދެއްވަނީ ހައްޖުގެ އަޅުކަމަށް ފުރުމުގެ އިންތިޒާމުތައް ހުރިނެތްގޮތް ބައްލަވައި، ވީ އެންމެ ރަނގަޅަށް އެކަންކަން ހަމަޖެއްސެވުމަށް ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ހައްޖުވެރިންނަށް ފަސޭހަކަމާއެކު އެއަރޕޯޓަށްދިއުމުގެ ކަންކަން ހަމަޖެއްސުމަށް ކަމާގުޅޭ މުއައްސަސާތަކާއެކު މަޝްވަރާކުރެއްވުމަށް ބޭއްވި ބައްދަލުވުމުގައި ބައިވެރިވެވަޑައިގެން ނައިބު ރައީސް ވަނީ، ހައްޖާޖީންގެ ދަތުރުފަތުރުގެ އިންތިޒާމްތައް މާލެއާއި ހުޅުމާލޭގައި ހަމަޖެހިފައިވާގޮތާއި، އެއަރޕޯޓްތެރޭގައި ހައްޖުވެރިންނަށް އިސްތިގުބާލްކުރުމާއި، އަދި މީގެ އިތުރުން އެއަރޕޯޓްތެރެއިން ހަމަޖައްސަންޖެހޭ އެހެނިހެން އިންތިޒާމުތައް ހަމަޖެހިފައިވާ ގޮތުގެ މަޢުލޫމާތުތައް އޮޅުންފިލުއްވާފައެވެ.
މި ބައްދަލުވުމުގައި ހައްޖާޖީންނަށް ފަސޭހަކަމާއެކު ގެއިން އެއާޕޯޓަށް ދިއުމާއި، އަދި އެއަރޕޯޓްތެރޭގައި ފަސޭހަ ގޮތެއްގައި އިންތިޒާމުތައް ހަމަޖެއްސުމާ ގުޅޭގޮތުން ކަމާގުޅޭ މުއައްސަސާތަކުން ވަނީ މަޝްވަރާ ކޮށްފައެވެ. އެގޮތުން ބަސްތައް ދަތުރުކުރާނެ މަގުތަކާއި، ގަޑިތަކާއި، އެއާޕޯޓުން ހައްޖުވެރިންނަށް އިސްތިގުބާލުކުރާނެ ގޮތްތަކާއި، އެކަމަށް އެހީތެރިވުމަށްޓަކައި ކަނޑައެޅިފައިވާ ފަރާތްތައް އަމަލުކުރަންވާނެގޮތާއި، އެއާޕޯޓްތެރެއިން ހައްޖާޖީންނަށް ފޯރުކޮށްދޭން ޖެހޭ އެންމެހާ އެހީތެރިކަމާ ގުޅޭގޮތުން ވަނީ މަޝްވަރާކޮށްފައެވެ.
އިސްލާމިކް މިނިސްޓްރީން މައުލޫމާތުދޭގޮތުގައި މިފަހަރު ހައްޖާޖީން ފުރަން ހަމަޖެހިފައިވަނީ 3 ފްލައިޓެއްގައެވެ. އެއީ މި ހިނގާ ޖޫންމަހުގެ 26 ވަނަ ދުވަހާއި، 29 ވަނަ ދުވަހާއި، ޖުލައި މަހުގެ 2 ވަނަ ދުވަހު އޮންނަ ފްލައިޓްތަކުގައެވެ. ހައްޖުވެރިން ދަތުރުކުރާ ފުރަތަމަ ފްލައިޓް ފުރުމަށް ހަމަޖެހިފައިވަނީ މި މަހުގެ 26 ވަނަ ދުވަހުގެ ރޭގަނޑުއެވެ.
މިއަހަރު ހައްޖުގެ އަޅުކަން އަދާކުރުމަށް ރާއްޖެއަށް ލިބުނީ 453 ކޯޓާއެވެ. މި ކޯޓާތަކުގައި މީހުން ގެންދަން ހަވާލުކޮށްފައިވަނީ ހައްޖު ކޯޕަރޭޝަނާއެވެ.
