ރައްކާތެރިކަން ނަގާލައި ހިންގި ހަމަނުޖެހުން ބަލައެއް ނުގަނެވޭނެ: ދިވެހި ސަރުކާރު
21 ޖޫން 2022 | އަންގާރަ 14:16މި ނުރައްކާތެރި އަމަލު ކުށްވެރިކުރަން
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ހަރަކާތުގެތެރެއިން ހިންގި ހަމަނުޖެހުން
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ހަރަކާތުގެ ތެރެއިން, ރައްކާތެރިކަން ނަގާލައި ހިންގި ހަމަނުޖެހުން ބަލައިނުގަނެވޭނެ ދިވެހި ސަރުކާރުން ބުނެފިއެވެ.
ގަލޮޅު ދަނޑުގައި ކުރިއަށްގެންދިޔަ ޔޯގާ ހަރަކާތަށް ބަޔަކު ހުރަސްއަޅައި، ހިންގި ހަމަނުޖެހުމާގުޅިގެން ދިވެހި ސަރުކާރުގެ ފަރާތުން ފޮރިން މިނިސްޓްރީން ނެރުނު ބަޔާނެއްގައި ބުނީ، މި ނުރައްކާތެރި އަމަލު ދިވެހި ސަރުކާރުން ކުށްވެރިކުރާކަމަށާއި، އާންމުންނާއި ޑިޕްލޮމެޓުންގެ ސަލާމަތާއި ރައްކާތެރިކަމަށް ނުބަލައި މި އަމަލު ހިންގާފައިވާތީ އެކަން ބަލައިނުގަނެވޭނެ ކަމަށެވެ.
ސަރުކާރުން ބުނީ، މި ހަމަނުޖެހުމާގުޅިގެން އިދާރާތަކުން ޚާއްސަ ތަހުގީގެއް ފަށާފައިވާކަމަށެވެ. އަދި މި އަމަލު ހިންގި މީހުން އިންސާފުގެ ކުރިމައްޗަށް ގެނެވޭނެކަމަށްވެސް ސަރުކާރުން ބުނެފައިވެއެވެ.
2015 އަހަރުން ފެށިގެން އިންޓަރނޭޝަނަލް ޔޯގާ ޑޭ އަންނަނީ ރާއްޖޭގައި ފާހަގަކުރަމުންނެވެ. ޔޯގާ ހަރަކާތުގެ ހަމަނުޖެހުމުގެ ފަހަތުގައި ތިބި ފަރާތްތައް ގާނޫނުގެ ކުރިމައްޗަށް ގެންނާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުވެސް ވަނީ ވިދާޅުވެފައެވެ. މައްސަލަ ބަލަމުންދަނީ ސީރިއަސް މައްސަލައެއްގެ ގޮތުގައިކަން ރައީސް ފާހަގަކުރެއްވިއެވެ.
